سالتاناتتى شارادا ءسوز العان اۋدان اكىمىنىڭ ورىنباسارى رادجان سەيىتقانوۆ اۋداندا ءبىلىم سالاسىنا ايرىقشا كوڭىل ءبولىنىپ وتىرعانىن اتاپ ءوتتى. ونىڭ ايتۋىنشا, بيىل اۋداننىڭ ءبىلىم سالاسىنا 4 ميلليارد تەڭگەگە جۋىق قارجى ءبولىنىپ, 20 مەكتەپ مۋلتيمەديالىق قۇرال-جابدىقتارعا قول جەتكىزىپتى. مەكتەپكە باراتىن وقۋشىلار سانى دا ۇلعايىپ, بيىل 7 مىڭعا جەتىپ جىعىلىپتى. وڭىردەگى مىڭعا تارتا مۇعالىمنىڭ 806-سى جوعارى كاسىبي بىلىمگە يە بولسا, 180-ءى جوعارى ساناتتى, 289-ى ءبىرىنشى ساناتتى ۇستازدار ەكەن. وسىنداي دەرەكتەردى العا تارتقان ر.سەيىتقانوۆ ۋۆاروۆ ورتا مەكتەبىنىڭ ديرەكتورى ليكا بوزتاەۆاعا, و.بوكەي اتىنداعى قازاق ورتا مەكتەبىنىڭ ديرەكتورى ساۋلە دوسقاليەۆاعا جانە چەرەمششانكا ورتا مەكتەبىنىڭ ديرەكتورى تاتيانا كورياكوۆاعا اۋدان اكىمىنىڭ گراموتاسىن سالتاناتتى تۇردە تابىس ەتتى. سونىمەن قاتار بۇل كۇنى وزگە دە ۇزدىك مۇعالىمدەرگە اۋدان اكىمىنىڭ گراموتاسى مەن وبلىستىق ءبىلىم جانە عىلىم قىزمەتكەرلەرى كاسىپوداعى ۇيىمىنىڭ ارنايى توسبەلگىلەرى تاپسىرىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى,
گلۋبوكوە اۋدانى
سۋرەتتەردى تۇسىرگەن اۆتور
