سايىن كوشەسى مەن رايىمبەك باتىر كوشەسىنىڭ قيىلىسىندا ورنالاسقان اكتەر تۇرعان ۇيگە استانا جانە الماتى قالالارىنىڭ زيالى قاۋىم وكىلدەرى, ارىپتەستەرى مەن تۋعان-تۋىستارى جينالدى.
تەاتر ونەرىنىڭ مايتالمانى ساحنادا ءجۇرىپ 300-دەن اسا ءرولدى سومداعان. العاش اتاقتى ناتاليا ساتس قولىنان جەتەكتەپ تەاترعا اكەلگەندە, بار بولعانى 19 جاستاعى جىگىت «التىن كىلت» ەرتەگىسىندەگى بازيليو مىسىقتىڭ رولىمەن-اق بولاشاعىنىڭ زور ەكەنىن بايقاتىپ ۇلگەرەدى. وسى ۋاقىت ارالىعىندا ساحنا ونەرى ءۇشىن تۋعان سايىپقىران بالالارعا ارنالعان قويىلىمنان باستاپ ەرەسەك كورەرمەنگە ارنالعان سالماقتى سپەكتاكلدەرگە دەيىنگى ءار ءتۇرلى وبرازدى وزىنە عانا ءتان شەبەرلىگىمەن شيراتتى. ق.جاكىباەۆ كينو سالاسىنا دا ەلەۋلى ۇلەس قوسقان تانىمال اكتەر. «دەرسۋ ۋزالا», «جانسەبىل», «قان مەن تەر», «ۇشەۋ», «دانەكەر», «وتىرار», «ماحاببات بەكەتى», «توعىسقان تاعدىرلار» فيلمىندەگى رولدەرى كينو ونەرى تاريحىندا قالدى.
الماتى قالاسى اكىمى قابىلداعان قاۋلىعا سايكەس, ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ۇيىمداستىرۋىمەن, قازاقستاننىڭ حالىق ءارتىسى, قازاقستاننىڭ ەڭبەك سىڭىرگەن قايراتكەرى, تاۋەلسىز «پلاتينالى تارلان» سىيلىعىنىڭ يەگەرى قاسىم ابەك ۇلى جاكىباەۆتىڭ قۇرمەتىنە ورناتىلعان تاقتانىڭ اق شىمىلدىعى تۇرىلگەن سوڭ سالتاناتتى راسىمدە ءسوز العان ساتىبالدى نارىمبەتوۆ, نۇرجۇمان ىقتىمباەۆ, روزا اشىربەكوۆا سىندى ونەردەگى ارىپتەستەرى تالانتتىڭ سان قيلى تاعدىرى تۋرالى جان تەبىرەنتەتىن ەستەلىكتەرىمەن ءبولىستى.
ايگۇل احانبايقىزى,
«ەگەمەن قازاقستان»
الماتى
