– ەرتەڭگى ويىننان نە كۇتەسىز؟ فۋتبولشىلارىڭىز ماتچقا قانشالىقتى دايىن؟
– مەنىڭشە, ەرتەڭ جاقسى ويىن بولادى. قازاقستان مەن رۋمنيا قۇرامالارىنىڭ جانكۇيەرلەرى ءۇشىن تارتىستى ماتچ بولماق. ارينە, ماقساتىمىز – جەڭىسكە جەتۋ. شاكىرتتەرىم ويىنعا ساقاداي ساي دەسەم دە بولادى.
– رۋمىنيا جانە ارمەنيا قۇرامالارىنا قارسى ويىن الدىندا بىرقاتار ويىنشىمىزدى جوعالتتىق. بۇل الداعى ويىنعا كەرى اسەرىن تيگىزبەي مە؟
– ماتچ الدىندا نەگىزگى قۇرامنىڭ ويىنشىلارى جاراقات الىپ قالعانى ويىن تاكتيكاسىنا ءوز اسەرىن تيگىزبەي قويمايدى. فۋتبولدا الماستىرىلمايتىن ادام بولمايدى دەگەن ءسوز بار عوي. ۇلتتىق قۇرامانىڭ باسقا دا ويىنشىلارىنا مۇمكىندىك بەرىپ كورەمىز. شاكىرتتەرىم ەرتەڭگى ويىننىڭ ماڭىزدى ەكەنىن, بارلىق كۇشتى سالىپ ويناۋ كەرەكتىگىن جاقسى تۇسىنەدى.
– ءبىر سۇحباتىڭىزدا رۋمىنياعا قارسى دايىندىققا ۋاقىتتارىڭىز از بولعانىن ايتىپ ەدىڭىز. ەرتەڭگى ويىنعا قانداي توسىن سىي دايىندادىڭىز؟
– ەرتەڭ ءبىز وتكەن ويىندارعا قاراعاندا تاكتيكامىزدى ازداپ وزگەرتەمىز. پوزيتسيالاردا وزگەرىس بولادى. الاڭعا شىعاتىن ويىنشىلاردى دا شامامەن انىقتاپ قويدىق.
– رۋمىنيا قۇراماسىن قانشالىقتى زەرتتەپ ۇلگەردىڭىز؟
– 2-3 كۇننىڭ ۇشىندە رۋمىن قۇراماسىنىڭ ويىندارىن, جەكەلەگەن ويىنشىلاردىڭ مۇمكىندىكتەرىن قاراپ, سارالاپ كوردىك. جاتتىعۋ كەزىندە تەوريالىق ساباق كوبىرەك كوڭىل بولدىك. دەگەنمەن, رۋمىنيا قۇراماسىنا جاڭا باپكەر, جاڭا ويىنشىلار كەلگەنىن اتاپ وتكەن ءجون. ولار دا الداعى ويىنعا توسىن سىي دايىنداعانى بەلگىلى. ەرتەڭگى ماتچ ەكى قۇراما ءۇشىن وتە ماڭىزدى.
– ءبىزدىڭ توپتان قاي قۇراما 2018 جىلعى الەم چەمپيوناتىنا بارۋى مۇمكىن؟
– مەنىڭ بولجامىم بويىنشا, دانيا, پولشا جانە چەرنوگوريا قۇرامالارىنىڭ ءبىرى شىعۋى مۇمكىن. ۇشەۋى دە ءبىر-بىرىنە لايىقتى قارسىلاستار.
ءالي بيتورە,
«ەگەمەن قازاقستان» –
بۋحارەستتەن
سۋرەت اۆتورى – ءىلياس وماروۆ
