كانتري مۋزىكاسىنىڭ كونتسەرتىنە جينالعان حالىققا ماندالاي-بەي قوناقۇيىنىڭ 32-قاباتىنان قالا توڭىرەگىنىڭ تۇرعىنى, 64 جاستاعى ستيۆەن پاددوك اۆتوماتتى ۆينتوۆكامەن وق اتىپ, 59 ادامدى جەر جاستاندىرىپ, 527 ادامدى جارالادى. بۇل قانتوگىس اقش-تاعى ەڭ قانقۇيلى قىلمىس دەپ تىركەلدى.
كوڭىل كوتەرىپ, ءان-مۋزىكا تىڭدايمىز دەپ جينالعان بەيبىت حالىق قاندى ويرانعا تاپ بولدى. ەگەر باسقا ءبىر ەلدە وسىنداي قانتوگىس بولسا تۇرمىستا مۇقتاجدىق كورىپ, اشىنعان ادامنىڭ قىلىعى شىعار دەپ بولجار ەدىك. بىراق الەمدەگى ەڭ باي ەلدىڭ ەسى دۇرىس, زەينەتاقى الاتىن ادامىن مۇقتاجدىقتان, ومىردەن ءتۇڭىلىپ, وسىنداي قىلمىسقا باردى دەپ ايتا المايسىڭ.
بۇگىنگە دەيىن بەلگىلى بولعان جاعدايعا قاراعاندا, ستيۆەن پاددوك بۋحگالتەر بولىپ قىزمەت ىستەگەن ادام كورىنەدى. شەشەسىمەن ەكەۋىنىڭ جالعا بەرىپ, اقشا تاباتىن پاتەرلەرى دە بولعان. ودان باسقا پاددوكتىڭ جەڭىل موتورلى ۇشاقتى قولدانۋعا ليتسەنزياسى بار ەكەنى جانە ۇشاتىن ەكى اپپاراتى بارلىعى دا انىقتالعان. ازىرگە پوليتسيا اكەسىنىڭ قاۋىپتى قىلمىسكەر بولىپ, 1969 جىلى ىزدەۋدە بولعانى تۋرالى دەرەك تاۋىپ, پاددوكتىڭ قىلىعى وسى ىسپەن بايلانىستى ەمەس پە ەكەن دەگەن سۇراقتى وزدەرىنە قويىپ وتىر. بۇل كۇماندى كۇدىك, ويتكەنى اكەسىنىڭ كەگىن 40 جىلدان كەيىن زەينەتكە شىققان سوڭ ەسى دۇرىس ادام قايتارامىن دەپ ويلامايتىن شىعار...
قوناقۇيدىڭ ءوزى قونعان نومىرىنە پاددوكتىڭ 23 اۆتوماتتى ۆينتوۆكانى قالاي الىپ كىرگەنى دە جۇرتتىڭ ءبارىن تاڭعالدىرۋدا. وسىنشا قارۋدى ەنگىزگەنىنە قاراعاندا, قانىشەر حالىقتى قىرۋعا ابدەن دايىندالعان سياقتى. كەيبىر كۋاگەرلەردىڭ ايتۋىنشا, ول ۆينتوۆكانىڭ 30-40 ماگازينىن بوساتىپ, 1 مىڭعا جۋىق وق اتقان. ەستەرى شىعىپ, قايدا قاشارلارىن بىلمەي ۇيلىققان 20 مىڭ كورەرمەندى اياماي قىرعان.
قالانىڭ بارلىق پوليتسياسى قانىشەردى قۇرىقتاۋعا تارتىلىپ, وسى جەردەگى كازينونىڭ جانىنان جەدەل شتاب قۇرىلعان. اۋەجايدىڭ جۇمىسىنا دەيىن ۋاقىتشا تەجەلىپ, ۇشۋلار توقتاتىلعان... بارلىق 1,5 ميلليوندىق قالا بويىنشا توتەنشە جاعداي جاريالانعان. قوناقۇيدىڭ جانىنا دابىلىمەن بەزىلدەتىپ, پوليتسيا ماشينالارى كەلگەندە پاددوك ولارعا دا وق جاۋدىرعان. قوناقۇي ءنومىرىنىڭ ەسىگىن بۇزىپ كىرگەن پوليتسيا قىزمەتكەرلەرى قانىشەردىڭ ءوزىن-ءوزى اتىپ ولتىرگەنىن كورگەن.
قانىشەردىڭ تۇراتىن ءۇيىن تەكسەرۋ بارىسىندا 20-عا جۋىق اتاتىن قارۋلار, بىرنەشە مىڭ پاترون جانە جارىلعىش زاتتار تابىلعان. پاددوك اسكەرگە دە بارماعان ادام ەكەن, قارۋ-جاراق جيناۋمەن دە بۇرىن اينالىسىپ كورمەگەنىن جاقىندارى مەن كورشىلەرى ايتىپ بەرگەن.
تىپ-تىنىش, بەيبىت كاسىپتىڭ يەسى وسىنداي قانقۇمارلىققا قالاي بارعاندىعىنىڭ جۇمباعىن ازىرگە ەشكىم تابا الماي, ءدۇدامال بولىپ وتىر. بىراق ۇيىنەن ءبىر ەلەكتروندى قۇرىلعىلار تابىلعان, ونىڭ سىرى ءالى اشىلعان جوق.
بارلىق جاماندىقتى, قانتوگىستى موينىنا العىسى كەلىپ تۇراتىن «يسلام مەملەكەتىنىڭ» (قازاقستاندا تىيىم سالىنعان) جيھادشىلار توبى بۇل تەراكتىنىڭ جاۋاپكەرشىلىگىن موينىنا العانىمەن, وعان سەنۋ قيىن. ءفىب (فبر) پاددوكتىڭ ەشقانداي حالىقارالىق تەرروريستىك ۇيىمدارمەن بايلانىسى انىقتالعان جوق, دەپ مالىمدەدى.
ال ستيۆەن پاددوك اقىل-ەسى دۇرىس ەمەس ادام سەكىلدى دەگەن بولجامعا سۇيەنۋشىلەر كوپ. ازىرگە وسى بولجام باسىم بولىپ تۇر. ارينە ءبارى دە انىقتالىپ, قىلمىسكەردىڭ وسىنشا ادامدى قىرۋىنا نە سەبەپ بولعانى اشىلار. بىراق قىرشىنىنان قيىلعان قانشاما جاستىڭ ءومىرىن قالپىنا كەلتىرە المايسىڭ.
قازاق مۇنداي جاماندىقتى «مال قۇلاعى ساڭىراۋ» دەپ اۋىزعا المايتىن. بىراق قازىر ەشكىمنەن ەشتەڭەنى جاسىرۋعا بولمايدى, تەك ساقتىق شارالارى تەرەڭدەتىلىپ, قارۋ-جاراق ۇستايتىنداردى شەكتەۋ عانا ادامدارىمىزدىڭ تىنىش ءومىرىن ساقتاۋعا مۇمكىندىك بەرەتىنىن ەشقاشان ەستەن شىعارماعانىمىز ابزال.
جاقسىباي سامرات,
«ەگەمەن قازاقستان»
