پاۆلودار وبلىسىنىڭ الەۋمەتتىك-ەكونوميكالىق دامۋىنا ارنالعان ءباسپاسوز ءماسليحاتىندا اكىم بيىلعى جىلدىڭ 8 ايىنداعى دامۋ قورىتىندىلارى تۋرالى بايانداپ, جۋرناليستەر تاراپىنان قويىلعان سان سالالى سۇراقتارعا جاۋاپ بەردى. ب.باقاۋوۆتىڭ مالىمدەۋىنشە, پاۆلودار وبلىسىنىڭ بيىلعى يندۋستريالىق-يننوۆاتسيالىق دامۋى قارقىندى. ماسەلەن, جالپى وڭىرلىك ءونىم 5,6 پايىزعا وسكەن. ال وبلىستىڭ جالپىرەسپۋبليكالىق ءىجو كولەمىندەگى ۇلەسى 4,7 پايىزعا ارتقان. بۇعان دەيىن بۇل كورسەتكىش 4,4 پايىز بولعان ەدى.
«بيىل ونەركاسىپتىڭ بارلىق سەكتورىندا وڭ ديناميكا بايقالدى. مىس كونتسەنتراتىن وندىرەتىن بوزشاكول تاۋ-كەن بايىتۋ كومبيناتىنىڭ تولىق قۋاتتىلىق دەڭگەيىنە شىعۋىنا بايلانىستى ءوندىرىس كولەمى 12 پايىزعا دەيىن ءوستى. مەتاللۋرگيا, حيميا, مۇناي حيمياسى جانە ماشنيا جاساۋ كاسىپورىندارى تۇراقتى جۇمىس ىستەۋدە. ەلەكتر ەنەرگياسىن ءوندىرۋ كولەمى 23,2 پايىزعا ۇلعايىپ, 26,3 ملرد كۆت/ساعاتتى قۇرادى. ەكىباستۇز №1 قاەس-ىڭ شينالارىنان وندىرىلگەن 3,3 ملرد كۆت/ساعات ەلەكتر ەنەرگرياسى رەسەي فەدەراتسياسىنىڭ كورشىلەس وڭىرلەرىنە ەكسپورتقا شىعارىلدى. جىلدىڭ سوڭىنا دەيىن ەلەكتر ەنەرگياسى ەكسپورتىنىڭ كولەمى 6 ملرد كۆت/ساعاتتى قۇرايدى», دەدى ب.باقاۋوۆ.
دينارا بىتىك,
«ەگەمەن قازاقستان»
