تۇركەشتىڭ «كوڭىل اشار» كۇيىمەن باستالعان ونەر مەرەكەسى كورەرمەنگە ەرەكشە اسەر سىيلادى. وبلىسىمىزداعى دينا نۇرپەيىسوۆا اتىنداعى اكادەميالىق حالىق اسپاپتار وركەسترىنە ديريجەرلىك ەتكەن ارمان جۇدەباەۆتىڭ شىعارماشىلىق شەبەرلىگى اتىراۋلىقتاردى ءتانتى ەتتى. قۇرمانعازى مەن دينانىڭ, ىقىلاستىڭ, نۇرعيسا تىلەنديەۆ پەن ايتقالي جايىموۆتىڭ, قارشىعا احمەدياروۆتىڭ كۇيلەرى جايىق جاعاسىندا سالتانات قۇردى. شەتەل كلاسسيكتەرىنىڭ شىعارمالارىمەن بىرگە, وتاندىق كومپوزيتورلاردىڭ اندەرى دە ورىندالدى. وركەستردىڭ سۇيەمەلدەۋىمەن كونتسەرتكە كەلگەن كورەرمەن قوسىلا ءان شىرقادى.
شاراعا قاتىسقان وبلىس اكىمى نۇرلان نوعاەۆ «بۇگىندە قۇرمانعازى وركەسترىنىڭ العاشقى قارلىعاشتارى, ەڭ ءبىرىنشى دومبىراشىلارىنىڭ جولىن جاڭا بۋىن جالعاپ كەلەدى. سولاردىڭ اراسىندا ارمان جۇدەباەۆتىڭ دا ەسىمى ماقتانىشپەن ايتىلادى» دەپ اتاپ ءوتتى.
بەلگىلى ديريجەر اتىراۋعا ساپارى اياسىندا ايماقتاعى حالىق اسپاپتار وركەسترلەرىنىڭ كوركەمدىك جەتەكشىلەرى مەن ديريجەرلەرىنە شەبەرلىك ساباقتارىن وتكىزىپ, تاجىريبەسىمەن ءبولىستى.
باقىتگۇل باباش,
«ەگەمەن قازاقستان»
