تاۋەلسىزدىكتىڭ ەلەڭ-الاڭىندا ەلىمىزدىڭ باس باسىلىمىن باسقارعان, «رەداكتورلاردىڭ رەداكتورى» اتانعان شەرحان مۇرتازانىڭ ون جىل ىشىندەگى گازەت بەتىنە جاريالانعان سۇحباتتارى, ماقالالارى, ەسسلەرى, وي-تولعانىستارى, كوسەمسوزدەرى مەن ادەبي-كوركەم دۇنيەلەرى توپتاستىرىلعان «نامىس نايزاعايى» كىتابىنىڭ تۇساۋكەسۋ راسىمىندە «ەگەمەن قازاقستان» رەسپۋبليكالىق گازەتىنىڭ اق باسقارما توراعاسى دارحان قىدىرالى قر اقپارات جانە كوممۋنيكاتسيالار ءمينيسترى داۋرەن اباەۆتىڭ قۇتتىقتاۋ حاتىن وقىپ بەردى. شەر-اعاڭنىڭ زامانداس دوستارى مەن قالامداس ءىنى-باۋىرلارى جينالعان شارادا قازاقستان جازۋشىلار وداعىنىڭ توراعاسى نۇرلان ورازالين, قازاقستان ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ باستاعان ەل اعالارى ءبىرتۋار قالامگەر شىعارماشىلىعى مەن قايراتكەرلىگى جايلى سىر شەرتىپ, جىلى لەبىزدەرىن ءبىلدىردى.
شەر-اعاڭ مەرەيتويىنا تۇركيادان تۇركى الەمى جازۋشىلار وداعىنىڭ ارنايى سىيلىعى مەن «اي مەن ايشا» كىتابىن تۇرىك تىلىنە اۋدارىپ, ءسۇيىنشى داناسىن الىپ كەلگەن اۋدارماشى-جازۋشى مالىك وتارباەۆ: «تۇتاس ءبىر ءداۋىردىڭ تىنىس-تىرشىلىگىن قامتيتىن, جازۋشى ءوزىنىڭ بالالىق شاعىن بايانداپ بەرەتىن «اي مەن ايشا» رومانى و باستا جارىق كورە سالىسىمەن-اق, سونى اۋدارسام دەگەن وي كەلگەن ەدى. شىعارماداعى ايشا اپانىڭ ءوزىن ءبىز بالا كەزدە كورگەنبىز, ال ءوزىن شىعارمادا بارىسحان دەگەن كەيىپكەر ارقىلى كورسەتكەن شەرحان اعامىزدى تۋىپ-وسكەن, تۇلعا بولىپ قالىپتاسقان ورتاسى مەن ءۇشىن دە تانىس ءارى بەيتانىس الەم ەدى. بىراق ول ءۇشىن اۋدارما سالاسىندا ءبىراز جۇمىس ىستەپ, ىزدەنىستە ءجۇرىپ, تاجىريبە جيناقتاۋ كەرەك بولدى, قىسقاسى, بۇل بايىپتى دايىندىقتى قاجەت ەتەتىن جۇمىس ەدى. كەيىننەن كىتاپتى قازاقشادان تۇرىكشەگە ەكى جىلداي ءجۇرىپ اۋدارعان سوڭ قازاقستاننىڭ تۇركياداعى ەلشىلىگىنىڭ قولداۋىمەن تۇركيانىڭ انكارا قالاسىنداعى ەۋرازيا جازۋشىلار قاۋىمداستىعىنىڭ «بەنگۋ» دەپ اتالاتىن باسپاسىنان جارىققا شىعاردىق. اتالمىش قاۋىمداستىق بيىل تۇركى دۇنيەسى ادەبيەتىنە سىڭىرگەن ەڭبەگى ءۇشىن شەر-اعاڭا ارنايى سىيلىق تاعايىنداپ ءارى وسى كىتاپتىڭ شىعۋىنا مۇرىندىق بولدى. كىتاپتى وقىپ شىعۋ ءبىر بولەك تە, وقىپ وتىرىپ اۋدارۋ ءبىر بولەك قوي. ءار ءسوزدىڭ ماعىناسىنا تەرەڭ ءۇڭىلىپ وتىرىپ, بۇل روماننىڭ تەك قازاق وقىرمانى ءۇشىن عانا قۇندى دۇنيە ەمەس, جالپى ادامزات تاريحىنداعى ولمەس تۋىندىلاردىڭ ءبىرى ەكەنىن سەزىنەسىز», – دەدى.
كىتاپتار تۇساۋكەسەرى شاراسىنان كەيىن وتكىزىلگەن شەرxان مۇرتازا اتىنداعى بيلياردتان ءداستۇرلى تۋرنير شاراسىندا «ەگەمەن قازاقستان» رگ» اق باسقارما توراعاسى دارحان قىدىرالى: «بۇرىن الماتىدا سەيداحمەت بەردىقۇلوۆ اتىنداعى فۋتبولدان ءداستۇرلى شارا بولاتىن, بىراق ول قازىر استانادا وتەتىن بولدى. ال شەر-اعاڭنىڭ سۇيىكتى ويىنى بولعان تاستاياقتىڭ بۇدان بىلاي الماتىداعى زيالى قاۋىمنىڭ باسىن قوساتىن, جىلدا وسى ۋاقىتتا وتكىزىلەتىن ءداستۇرلى شاراعا اينالارىنا كۇمان جوق», – دەسە, عالىم, پۋبليتسيست نامازالى وماشەۆ: «اسەم الماتىمىزدا شەرحان مۇرتازا اتىنداعى ءتۋرنيردىڭ ءوتىپ تۇرۋى – شەراعاڭنىڭ اتى ءۇشىن دە, جالپى قالام ۇستاعان قاۋىم ءۇشىن, جۋرناليستەر ءۇشىن دە وتە پايدالى شارا بولماق. ويتكەنى تۋرنير بارىسىندا شەراعاڭنىڭ مىنەز-قۇلقى, ۇلتقا جاساعان جاقسىلىعى, سىڭىرگەن ەڭبەگى ايتىلادى, ال شىعارماشىلىق ادامدارى ءبىر-بىرىمەن جاقىن تانىسىپ, پىكىر الىسادى, سىرلاسادى. جۋرناليستەر – شىعارماشىلىق يەلەرى. كەزىندە عابيت مۇسىرەپوۆ, عابيدەن مۇستافين اعالارىمىز بيليارد جالپىحالىقتىق ويىن بولماي تۇرعان كەزدىڭ وزىندە ونى كوپ ويناعان ەكەن. باسقا ويىن تاپپاعاندىقتان ەمەس, شىعارماشىلىق ادامىنا وتە پايدالى ويىن بولعاندىقتان. سوندىقتان «ەگەمەن قازاقستان» گازەتىنىڭ باسشىسى دارحان قىدىرالىنىڭ باستاۋىمەن ءوتىپ جاتقان تۋرنير ەلگە دە, جۇرتقا دا, جۋرناليستەرگە پايدالى بولاتىنى انىق», – دەپ اعىنان جارىلدى.
شەرحان مۇرتازا اتىنداعى اتالمىش تۋرنير قاتىسۋشىلارىنىڭ اقساقالدار توبىنان ءوز مەرگەندىگىمەن كوزگە تۇسكەن ساتيريك جازۋشى تولىمبەك الىمبەك ۇلى ىنتالاندىرۋ سىيلىعىنا يە بولسا, بەلگىلى عالىم, پروفەسسور نامازالى وماشەۆ 3-ءشى ورىندى, گەنەرال-مايور ءادىل شاياحمەتوۆ 2-ءشى ورىندى, ال 1-ءشى ورىندى جۋرناليست-جازۋشى اياعان ساندىباي يەلەندى. سونداي-اق, جاستار توبىنان «ان-ارىس» باسپاسىنىڭ باس رەداكتورى, اقىن كادىربەك قۇنىپيا ۇلىنا ىنتالاندىرۋ سىيلىعى بۇيىرسا, 3-ءشى ورىندى ساياساتتانۋشى ايدوس سارىم, 2-ءشى ورىندى «قازاق ادەبيەتىنىڭ» باس رەداكتورى جاناربەك ءاشىمجان, 1-ءشى ورىندى جازۋشى-جۋرناليست بەكەت مومىنقۇل ۇتىپ الدى. ايتپاقشى, باۋىرجان مومىش ۇلىنىڭ نەمەرە ءىنىسى, جازۋشى بەكەت مومىنقۇل شەرحان مۇرتازانىڭ ء«بىر كەم دۇنيە» كىتابىنىڭ ءوزى اۋدارعان «ودين يزيان بىتيا» اتتى ورىسشا نۇسقاسىنىڭ ءبىر-ءبىر داناسىن جينالعان قاۋىمعا سىيعا تاراتتى.
ميرا بايبەك,
«ەگەمەن قازاقستان»
الماتى
