فوتو: ورىنباي بالمۇرات, «ەگەمەن قازاقستان»
بيىل 7 ماۋسىمنان باستاپ 15 قىركۇيەككە دەيىن ەلىمىزدىڭ تۇكپىر-تۇكپىرىنەن جوباعا قاتىسۋشىلاردان وتىنىشتەر قابىلداندى. وسى ۋاقىت ىشىندە El.kz پورتالىندا 2212 كانديدات تىركەلدى. قازىرگى كۇنى ولاردى ىرىكتەۋ جۇمىستارى جۇرگىزىلىپ جاتىر. ءمينيستردىڭ سوزىنشە, ارنايى كوميسسيا توبى تاڭداۋلى 515 ۇمىتكەردەن 300 ادامدى ىرىكتەپ الادى.
«قازان ايىنىڭ باسىنا جوسپارلانىپ وتىرعان ونلاين داۋىس بەرۋگە 300 ۇمىتكەردى ىرىكتەۋ ءۇشىن سىزدەردىڭ ۇسىنىستارىڭىزدى كۇتەمىز. بارشا قازاقستاندىقتار داۋىس بەرۋگە بەلسەنە قاتىسادى دەپ ويلايمىن. بارلىعىڭىزدى وسى ىسكە شاقىرامىز. جالپى حالىقتىق داۋىس بەرۋ قازان ايىنىڭ سوڭى اياقتالادى. وسىدان كەيىن بارىپ قازاقستاننىڭ 100 جاڭا ەسىمى ناقتىلاناتىن بولادى», – دەگەن مينيستر «رۋحاني جاڭعىرۋ» باعدارلاماسىنىڭ اياسىندا ىسكە اسىرىلىپ جاتقان اتالعان جوبانىڭ ونەرىمەن, بىلىمىمەن, قوعامعا سىڭىرگەن ەڭبەگىمەن, ەرەكشە قاسيەتىمەن دارالانعان تالانتتى ازاماتتارعا ۇلكەن مۇمكىندىك ەكەنىن ايتتى.
قازاقستان حالقى اسسامبلەياسى توراعاسىنىڭ ورىنباسارى دارحان مىڭباي ءوز كەزەگىندە بۇل باعىتتى ىسكە اسىرۋ بويىنشا جۇيەلى شارالاردى قولعا العان اسسامبلەيانىڭ جۇمىس رەتىنە توقتالىپ ءوتتى.
– جوباعا قوعامدىق ۇيىمدار مەن اسسامبلەيانىڭ قۇرىلىمدارى ءوز تاراپىنان ۇمىتكەرلەردى ۇسىندى. 15 قىركۇيەكتە وتىنىمدەردى قابىلداۋ اياقتالادى. ودان كەيىنگى جۇمىس الگوريتمىن بىرگە جاسايمىز. جوبا باستالعالى بەرى اسسامبلەيا 520 ءومىربايان تىركەدى, ايماقتاردان 900-گە تارتا ۇسىنىس جاسالدى, – دەدى اسسامبلەيا توراعاسىنىڭ ورىنباسارى دارحان مىڭباي.
ال «قازكونتەنت» اق باسقارماسىنىڭ توراعاسى ەۆگەني كوچەتوۆتىڭ ايتۋىنشا, ىرىكتەۋدىڭ كەلەسى كەزەڭى 2 قازاندا باستالادى.
– El.kz رەداكتسياسى 100esim.el.kz سايتىنا كەلگەن بارلىق وتىنىشتەردى قابىلداپ, وڭدەدى. وڭدەۋ ەكى كەزەڭمەن جۇرگىزىلدى. ءبىرىنشى كەزەڭ دە جەرگىلىكتى اتقارۋ ورگاندارىمەن فاكتچەكينگ جاسالدى. بۇل ادامدار ومىردە بار ما, وتىنىشتە ايتقان دەرەكتەرى شىندىققا جاناسا ما؟ وسى ماسەلەلەر تەكسەرىلدى. ەكىنشى كەزەڭدە رەداكتسيالىق وڭدەۋ جاسالىپ, وتىنىشتەر سايتتا جاريالاندى. قازىرگى ساتتە سايتتا 2112 ءوتىنىش جاريالانعان. ەندى 2 قازاندا ىرىكتەۋدىڭ ەكىنشى كەزەڭى باستالادى, – دەگەن باسقارما توراعاسى داۋىس بەرۋدىڭ ءادىل تۇردە جۇرگىزىلەتىندىگىن اتاپ ءوتتى.
ياعني, سايتقا تىركەلۋ ەلەكتروندى پوچتا مەن الەۋمەتتىك جەلىلەردەگى اككاۋنتتار ارقىلى جۇرگىزىلەدى. قولدانۋشىلار ەڭ كوپ دەگەندە ءۇش تۇلعاعا ءبىر رەت قانا داۋىس بەرە الادى. داۋىس سانى اۆتوماتتى تۇردە كورىنىپ تۇرادى. ساراپشىلاردىڭ مالىمەتىنشە, ازىرگە دەيىن ىرىكتەلگەن ۇمىتكەرلەردىڭ 70 پايىزىنا جۋىعى ەر ادامدار, 33 پايىزى ايەل ادامدار.
ايا ءومىرتاي,
«ەگەمەن قازاقستان»
