دۇنيەجۇزىلىك دەنساۋلىق ساقتاۋ ۇيىمى وسى ەكى دەرتتىڭ دە باستى سەبەبى تاماققا بايلانىستى ەكەنىن دالەلدەدى. قاراڭىز: دەنساۋلىقتىڭ 50 پايىزى – تاماقتانۋعا, 18 پايىزى – سىرتقى ورتا فاكتورلارىنا, 20 پايىزى – ادامنىڭ گەنەتيكاسىنا, تەك 5-10 پايىزى عانا دارىگەرلەردىڭ قولىندا. دەمەك, دۇرىس تاماقتانۋ, قاۋىپسىز ازىق-ت ۇلىكتى تۇتىنۋ – ادام دەنساۋلىعىنىڭ كەپىلى.
اۋرۋ-سىرقاۋدىڭ ورشۋىنە كۇندەلىكتى تۇتىنىپ جۇرگەن تاعامنىڭ قۇرامى دا سەبەپ. استانا قالاسىنىڭ قوعامدىق دەنساۋلىق ساقتاۋ دەپارتامەنتى ەلورداداعى ونىمدەردىڭ ساپاسىن تۇراقتى تەكسەرۋدى قولعا العان. ماماندار بيىلعى 8 ايدىڭ ىشىندە ازىق-ت ۇلىك, باسقا دا ونىمدەردەن 1645 سىناما الىپ زەرتتەپتى. سونىڭ 22,8 پايىزى, ياعني 376-سى ءتيىستى تالاپتارعا سايكەس بولماي شىققان. تارقاتىپ ايتقاندا, سىناما الىنعان اسپازدىق ونىمدەردىڭ – 43 پايىزى, قۇس ەتىنىڭ – 21 پايىزى, ءسۇت ونىمدەرىنىڭ – 21 پايىزى, كوكونىستەردىڭ – 11 پايىزى, بالىق تۇرلەرىنىڭ – 17 پايىزى ەت ونىمدەرىنىڭ 28 پايىزى ءتيىستى تالاپتارعا ساي كەلمەگەن. مونيتورينگتىڭ قورىتىندىسى بويىنشا 23 اكىمشىلىك قۇقىق بۇزۋشىلىق تۋرالى ءىس قوزعالىپ, كەمشىلىكتى جويۋ جونىندە 52 نۇسقاما بەرىلگەن. سوندىقتان ماماندار تاعام ونىمدەرىن ساتىپ الاردا سىرتقى سيپاتىنا, ساقتالۋ مەرزىمىنە, تەمپەراتۋرالىق رەجىمىنە قاراپ الۋعا كەڭەس بەرەدى.
استانا قالاسى قوعامدىق دەنساۋلىق ساقتاۋ دەپارتامەنتى تامىز ايىنان بەرى «قاۋىپسىز ءونىمدى تاڭدا» اتتى اكتسيا وتكىزىپ كەلەدى. كەشە «استانالىق» ساۋدا ورتالىعىندا وتكەن شارانىڭ بىرىنە ءبىز دە كۋا بولدىق. حالىقتى دۇرىس تاماقتانۋ مادەنيەتىنە باۋلۋدى ماقسات ەتكەن اكتسيادا جۇرتشىلىق ساتىپ العان ءسۇت, ەت ونىمدەرى, جەمىس-جيدەك, كوكونىس قۇرامىن تەكسەرتۋگە مۇمكىندىك الدى. ءبىز دە ەلدەن قالىسپاي, بالالارىمىز كوپ تۇتىناتىن باناندى, «بيوس» ۇيىعان ءسۇتىن, «بارني», «ورەو» پەچەنەسىن قانشالىقتى تالاپقا ساي ەكەنىن انىقتاتىپ كوردىك. ونىمدەردى ەكسپرەسس-تەست ارقىلى بىرنەشە مينۋتتىڭ ىشىندە تەكسەرىپ بەرگەن ماماندار ولاردىڭ قۇرامىندا نيتراتتار, ميكروبتار جوق ەكەنىن قۋانا جەتكىزدى.
استانا قالاسى قوعامدىق دەنساۋلىق ساقتاۋ دەپارتامەنتىنىڭ الماتى اۋداندىق باسقارماسى باسشىسىنىڭ ورىنباسارى گاۋھار شاپاتاەۆانىڭ ايتۋىنشا, بۇگىندە باقىلاۋ-قاداعالاۋ قىزمەتتەرى قىسقارتىلعانىمەن, كامەرالدىق باقىلاۋ, ونىمدەردى سۇرىپتاپ الۋ, سانيتارلىق-ەپيدەميولوگيالىق اۋديت سەكىلدى تەكسەرۋدىڭ جاڭا تۇرلەرى ەنگىزىلىپ جاتقانىن ايتتى. بىراق قانداي جاعداي بولسىن, تۇتىنۋشىنىڭ ارىز-شاعىمى مىندەتتى تۇردە ەسكەرىلەدى. ەگەر كىمدە-كىم ساتىپ العان ءونىمىنىڭ ساپاسىنا كۇدىكتەنسە, اتالعان دەپارتامەنتكە شاعىمدانۋعا بولادى, سوندا ماماندار ارنايى تەكسەرۋ جۇرگىزىپ, ازىق-تۇلىك قۇرامىن كاسىبي دەڭگەيدە انىقتاپ بەرەتىن بولادى.
قىمبات توقتامۇرات,
«ەگەمەن قازاقستان»
سۋرەتتى تۇسىرگەن
ەرلان ومار,
«ەگەمەن قازاقستان»
