شاراعا جوعارعى سوت جانىنداعى سوتتاردىڭ قىزمەتىن قامتاماسىز ەتۋ جونىندەگى دەپارتامەنت باسشىسى نۇرسەرىك ءشارىپوۆ پەن جوعارعى سوتتىڭ باق-پەن جۇمىس جونىندەگى ۇيلەستىرۋشى سۋدياسى ەلەنا ماكسيۋتا قاتىستى.
ء«بىز بۇگىنگى تاڭدا ەلەكتروندى سوت تورەلىگى سوت ءىسىن جۇرگىزۋدى جەڭىلدەتۋگە, ونىڭ جەدەلدىگىن, قولجەتىمدىلىگى مەن اشىقتىعىن قامتاماسىز ەتۋگە باعىتتالعان تىڭ باستامالاردى قولعا الۋدامىز. ونىڭ ناتيجەسىندە سالاداعى قىزمەتتىڭ بارلىعى دا تۇرعىنداردىڭ سوت جۇيەسىنە دەگەن سەنىم دەڭگەيىنىڭ وسۋىنە نەگىز بولىپ تابىلادى», دەدى ورتالىقتىڭ اشىلۋ سالتاناتىندا ءسوز العان ن.ءشارىپوۆ.
ايتا كەتەيىك, احۋالدىق ورتالىق الاڭىندا اۋديوبەينەتىركەۋ (ابت) جۇيەسى مەن بەينەبايلانىس جۇرگىزۋ مۇمكىندىكتەرى قولجەتىمدى.
سونىمەن قاتار بۇگىنگى تاڭدا ۇلت جوسپارىنىڭ 20-قادامىن ورىنداۋ ماقساتىندا ەلىمىزدەگى بارلىق سوت زالدارى (1 418 زال) ابت جۇيەسىمەن تولىق جاراقتاندىرىلعانىن اتاپ وتكەن ءجون. وسىلايشا, سوت وتىرىستارىنىڭ 98 پايىزى ابت جۇيەسىن قولدانا وتىرىپ جۇرگىزىلەدى. سول سياقتى سوتتار جۇمىسىنا ەلەكتروندى حاتتاما دا ەنگىزىلگەنىن ەسكەرتە كەتەيىك.
جاڭا ورتالىق جۇمىسىن تانىستىرۋ اياسىندا سوت سالاسىنىڭ ماماندارى قىلمىستىق-اتقارۋ جۇيەسى كوميتەتىنىڭ مەكەمەلەرىمەن جانە ۋاقىتشا ۇستاۋ اباقتىسىمەن تىكەلەي بەينەبايلانىسقا شىقتى. مۇنداي ادىسپەن بيىلدىڭ وزىندە 9 589 ماتەريال قارالعان. سونداي-اق قاجەتتىلىك بولعان جاعدايدا كەز كەلگەن سوت وتىرىسىنىڭ قاتىسۋشىسى وزىنە جاقىن تۇرعان سوتقا بارۋ ارقىلى سوت پروتسەسىنە قاشىقتىقتان قاتىسۋ مۇمكىندىگىن پايدالانا الادى ەكەن. جىل باسىنان بەرى ەلىمىزدەگى سوت قىزمەتىندە ءموبيلدى سوت كابينەتى ىسكە قوسىلعانى بەلگىلى. ەندىگى جەردە تاراپتاردىڭ قايسىبىرى سوتقا كەلمەسە دە بولادى. ياعني, سوت پروتسەسىنە ينتەرنەتكە قوسىلعان موبيلدىك قۇرىلعى ارقىلى شەتەلدە ءجۇرىپ تە قاتىسىپ, سۇراق قويىپ, جاۋاپ الا الاسىڭ دەگەن ءسوز. احۋالدىق ورتالىقتىڭ ارتىقشىلىعى دا وسىعان ۇقساس. بۇل ونلاين رەجىمدە تاۋلىك بويى وزەكتى سوت اقپاراتىن جيناۋ مەن تالداۋعا مۇمكىندىك بەرەتىن سوتتار قىزمەتىنە مونيتورينگ جۇرگىزۋدىڭ بىرىڭعاي جۇيەسى. جوعارعى سوتتىڭ ءاربىر قىزمەتكەرى وسى ورتالىق ارقىلى جۇمىس پروتسەسىندەگى ىقتيمال ىركىلىستەردى كورىپ, ولاردى جەدەل تۇردە تۇزەتۋ بويىنشا شارالار قابىلداي الادى. ياعني, 370 جەرگىلىكتى سوتتىڭ جۇمىسىن ورتالىقتاعى 700 كورسەتكىش بويىنشا باقىلاۋ مۇمكىندىگى تۋدى. ال ورتالىققا كەلىپ تۇسەتىن اقپاراتتىق ءىس قاعازدار مەن سوت ءىسىن جۇرگىزۋ, «تورەلىك» جۇيەسىنىڭ قۇرامداس بولىكتەرىنە مونيتورينگ جۇرگىزۋ سىندى شارۋالار 4 بلوكقا ءبولىنۋ ارقىلى جۇزەگە اسىرىلادى.
ونىڭ ءبىرىنشىسى – رەسپۋبليكاداعى بارلىق سوتتار كەڭسەلەرىنىڭ جاڭا حات-حابارلارىن تىركەۋ, ىستەر مەن ماتەريالداردى اۆتوماتتى تۇردە ءبولۋ جۇمىسىن قاداعالاسا, ەكىنشىسى – «تورەلىك» جۇيەسىنىڭ بارلىق سەرۆەرلىك قۇرامداس بولىكتەرىنىڭ جۇمىس ىستەۋ مۇمكىندىكتەرىن باقىلايدى. بۇل جۇيە 25-تەن استام كورسەتكىشتەن تۇرادى جانە بەلگىلەنگەن پارامەترلەردەن اۋىتقۋشىلىقتارعا جەدەل تۇردە دەن قويۋعا, ولاردىڭ جۇمىسىن تۇراقتاندىرۋ بويىنشا قاجەتتى شارالاردى قابىلداۋعا مۇمكىندىك بەرەدى. ءۇشىنشى بلوك كيبەرقاۋىپتەرگە دەر كەزىندە دەن قويادى جانە ولاردىڭ بولاشاقتا پايدا بولۋ ىقتيمالدىعىن جويادى. سوڭعى بلوك رەسپۋبليكاداعى بارلىق سوت وتىرىسى زالدارىنداعى احۋالدى جەدەل قاداعالايدى.
نۇرلىبەك دوسىباي,
«ەگەمەن قازاقستان»
