بۇگىندە ەلىمىزدىڭ ەكونوميكاسى دامىپ, حالقىمىزدىڭ الەۋمەتتىك جاعدايى كۇننەن-كۇنگە كوركەيىپ كەلەدى. ءوز كەزەگىندە ازاماتتارىمىزدىڭ ءومىر ساپاسى دا جاقسارىپ, تۇرعىنداردىڭ دەنساۋلىعى تۇزەلىپ, ءومىر ءسۇرۋ جاسى ۇلعايۋ ۇستىندە. بۇل بۇگىنگى كۇنى مەملەكەت تاراپىنان اتقارىلىپ جاتقان, ەلباسىمىز نۇرسۇلتان نازارباەۆتىڭ ەرەن ەڭبەگى مەن قامقورلىعىنىڭ ارقاسىندا قول جەتكىزگەن يگى جەتىستىكتەرىمىز بولىپ تابىلادى. الداعى ۋاقىتتا دا اتقارىلار ءىستىڭ اۋقىمى كەڭ ەكەنى داۋسىز. سونىڭ ءبىرى – ەل تۇرعىندارىن ساپالى اۋىز سۋمەن قامتاماسىز ەتۋدى جالعاستىرۋ.
اۋىز سۋ ماسەلەسى بۇل قازاقستاننىڭ عانا ەمەس, بۇكىل الەمدىك دەڭگەيدەگى ماسەلەگە اينالىپ وتىر. ويتكەنى ادام دەنساۋلىعى مەن ءومىرىنىڭ ساپاسى وسى اۋىز سۋعا تىكەلەي بايلانىستى. سوندىقتان دا مەملەكەتىمىز بۇل ماسەلەگە ۇنەمى زور جاۋاپكەرشىلىكپەن قاراپ, حالىقتى اۋىز سۋمەن قامتۋدا كوپتەگەن شارۋالاردى اتقارىپ كەلەدى. ونىڭ ىشىندە ءتيىمدى جاسالعان «اقبۇلاق» باعدارلاماسىنىڭ ماڭىزى زور. دەگەنمەن, وسىنداي باعدارلامالار اياسىندا ەلدى مەكەندەردى اۋىز سۋمەن قامتاماسىز ەتۋ جۇمىستارى كەيبىر جەرلەردە ءوز دارەجەسىندە اتقارىلماي قالىپ جاتىر. ەلگە اۋىز سۋ جەتكىزىپ بەرۋ ماقساتىندا بيۋدجەتتەن بولىنگەن قاراجات قۇمعا سىڭگەن سۋداي جوعالىپ كەتۋدە.
سونداي جايتتاردىڭ ءبىرى الماتى وبلىسى ۇيعىر اۋدانى ۇلكەن ديحان اۋىلىندا ورىن الىپ وتىر. بۇل اۋىلدىڭ ءبىر توپ تۇرعىندارىنان وسى جىلدىڭ ماۋسىم ايىندا مەنىڭ اتىما حات كەلگەن بولاتىن. حاتتا ۇلكەن ديحان اۋىلىن اۋىز سۋمەن قامتۋ بويىنشا مەملەكەت تاراپىنان 3 جىل بۇرىن باستالعان قۇرىلىس جۇمىستارىنىڭ اياقسىز قالعانى جانە 2016 جىلدىڭ قازان ايىندا پايدالانۋعا بەرىلۋى ءتيىس جوبانىڭ ورىندالماعانى باياندالىپتى. مەن ءوز كەزەگىندە بۇل ماسەلەنى قازاقستان رەسپۋبليكاسىنىڭ ينۆەستيتسيالار جانە دامۋ مينيسترلىگىنىڭ الدىنا قويعانىمدا ول مينيسترلىك اتالعان قۇرىلىس جۇمىستارى بيىلعى جىلدىڭ قىركۇيەك ايىنا دەيىن اياقتالادى دەپ جاۋاپ بەرگەن بولاتىن. بىراق وسى جىلدىڭ شىلدە-تامىز ايلارىندا پارلامەنت ءماجىلىسى دەپۋتاتتارىنىڭ حالىقپەن كەزدەسۋى اياسىندا مەن الماتى وبلىسى تۇرعىندارىمەن جولىعىپ, اتالعان ۇلكەن ديحان اۋىلىنا ارنايى بارىپ, جاعدايمەن تولىق تانىستىم. اتالعان جوبا قۇرىلىسى جارتىلاي باستالىپ, اياقسىز قالعان كۇيىندە جاتقانىن, ەشقانداي قۇرىلىس جۇمىستارى جۇرگىزىلمەي تۇر-
عانىن كوردىم. اۋىلعا قۇبىر تارتۋ ماقساتىندا قازىلعان كانالدار اشىق-شاشىق كۇيىندە قالدىرىلعان. قازبا جۇمىستارى بارىسىندا اۋىل ەگىنىن سۋمەن قامتاماسىز ەتىپ كەلگەن ارىقتار بۇزىلىپ, جاۋىپ تاستالعان. ناتيجەسىندە ونداعان شارۋا قوجالىقتارى جەرلەرىن يگەرە الماي, كاسىبىن تاستاپ كەتىپ جاتىر. ياعني اۋىلعا اۋىز سۋ كەلمەگەن, ال ەگىن سۋى ارىقتارى جارامسىز بولىپ قالعان. اۋىلدىڭ نەگىزگى كوشەسىنىڭ بويى-
مەن قازىلعان كۇيىندە قالعان كانالدار تۇرعىندارعا جول قاتىناسىنا ىڭعايسىزدىق تۋىنداتىپ جاتىر. ول شۇڭقىرلارعا ءتىپتى, كەيبىر ازاماتتار قۇلاپ, اۋىر جاراقات العان جاعدايلار بولىپتى. قۇنى 161,3 ملن تەڭگەنى قۇرايتىن اتالعان جوباعا 131 ملن تەڭگەسى ءبولىنىپ قويعانمەن جاۋاپتى «شاحستروي» دەپ اتالاتىن مەردىگەرلىك كومپانيا مىندەتىن اتقارماعان. وسى جاعداي بۇگىنگى كۇنگە دەيىن وزگەرىسسىز كۇيىندە قالىپ وتىر.
وسى ماسەلەنى مەن دەپۋتاتتىق ساۋال جولداپ, پرەمەر-مينيستر ب.ساعىنتاەۆقا جەتكىزدىم.
شايماردان نۇرىموۆ,
ءماجىلىس دەپۋتاتى
