ەكونوميكاسى دامىعان ەلدەردىڭ بارىندە ىشكى جالپى ءونىمنىڭ كەم دەگەندە 50 پايىزىن وسى شوب ونىمدەرى قۇرايدى. ءبىزدىڭ پرەزيدەنتىمىز دە 2050 جىلعى مەرزىمگە دەيىن ءىجو-ءنىڭ 50 پايىزدىق كولەمىن شوب ونىمدەرىنىڭ قۇراۋىنا قول جەتكىزۋ كەرەكتىگىن ناقتى ايتىپ, ۇكىمەتتەن وسى باعىتتاعى جۇمىستاردى جەدەلدەتۋدى تالاپ ەتتى. كاسىپكەرلىكتى رەتتەيتىن ەڭ نەگىزگى زاڭنامالىق قۇجات – كاسىپكەرلىك كودەكسىندە دە وسى باعىتقا تولىقتاي ءبىر تاراۋ ارنالىپ, شوب-تى قولداۋدى رەتتەۋدىڭ ماسەلەلەرى قاراستىرىلدى.
وكىنىشكە وراي, وسى كودەكستىڭ قابىلدانعانىنا ءبىر جارىم جىل وتسە دە ونىڭ بارلىق نورمالارى ومىردە ورىندالىپ وتىرعان جوق. ماسەلەن, كودەكستىڭ 98-بابىندا ۇكىمەت مەملەكەتتىك ساتىپ الۋ تۋرالى زاڭعا سايكەس شاعىن جانە ورتا بيزنەس سۋبەكتىلەرىنەن ساتىپ الاتىن تاۋارلار (جۇمىستار, قىزمەت كورسەتۋلەر) نومەنكلاتۋراسىن جانە كولەمىن بەكىتەدى دەلىنگەن. وتاندىق ءونىم شىعارۋشىلارعا جەڭىلدىكتى قاراستىرعان زاڭنىڭ وسى نورماسى شوب ءۇشىن وتە ماڭىزدى. بۇل نورما ءتىپتى ءبىز مۇشەسى بولىپ ەنگەن دسۇ-نىڭ تالاپتارىنا سايكەس جازىلىپ, شوب-تى قولداۋ جونىندەگى پرەفەرەنتسيالاردى قاراستىرعان. ءىس جۇزىندە وسى پرەفەرەنتسيالاردى وتاندىق ءىرى كومپانيالار عانا قولدانا الىپ وتىر, ويتكەنى شوب ءوز ونىمدەرىن الىس شەتەلدەرگە, سونىڭ ىشىندە امەريكا مەن ەۋروپا ەلدەرىنە شىعارا المايدى. ارينە, وسى تۇرعىدان العاندا اتالمىش نورمانىڭ ءىرى كاسىپكەرلىك ءۇشىن ماڭىزى زور. الايدا, اتالمىش نورمانىڭ تالاپتارى شوب-قا قاتىستى قولدانىلماي, مەملەكەتتىك ساتىپ الۋ جۇيەسىندە شاعىن جانە ورتا بيزنەس ونىمدەرىنىڭ نومەنكلاتۋراسى ءالى كۇنگە جاسالماي وتىر. ءدال وسىنداي جاعداي كۆازيمەملەكەتتىك سەكتوردا دا ورىن العان. بۇل زاڭنامانىڭ تالاپتارىن ورىنداماۋ عانا ەمەس, قازاقستاننىڭ ۇلتتىق ەكونوميكالىق مۇددەسىنە قاراما-قايشىلىق دەپ ساناۋعا بولادى.
وسىعان بايلانىستى «اق جول» دەموكراتيالىق پارتياسى فراكتسياسىنىڭ مۇشەلەرى ۇكىمەت باسشىسى باقىتجان ساعىنتاەۆقا تومەندەگىدەي تالاپتار قويىلعان ساۋال جولدادى:
1) ۇكىمەت اكتىسىنىڭ دەڭگەيىندە مەملەكەتتىك ساتىپ الۋلار قاتارىنا شاعىن جانە ورتا بيزنەس سۋبەكتىلەرى ونىمدەرىنىڭ نومەنكلاتۋراسى جاسالىپ, بەكىتىلسىن;
2) ءدال وسىنداي نومەنكلاتۋرا كۆازيمەملەكەتتىك سەكتور ءۇشىن دە جاسالسىن;
وسى ساۋالعا «اق جول» دەموكراتيالىق پارتياسىنىڭ ماجىلىستەگى فراكتسياسىنىڭ بارلىق مۇشەلەرى قول قويدى
دانيا ەسپاەۆا,
ءماجىلىس دەپۋتاتى
