وسىلايشا ولار «قازاقستاننىڭ قاسيەتتى رۋحاني قۇندىلىقتارى» نەمەسە «قازاقستاننىڭ كيەلى جەرلەرىنىڭ گەوگرافياسى» جوباسىنا ءوز ۇلەسىن قوسىپ, ساياحاتتاۋشىلار قاتارىن كوبەيتە وتىرىپ زامانداستارىن ۇلى دالا تاريحىنىڭ مول مۇرالارىمەن تانىستىرۋدى ماقسات ەتىپ وتىر. بۇل ورايدا كوللەدج باسشىلىعى ساياحات مارشرۋتىن كەڭەيتىپ, ستۋدەنتتەردىڭ ۇلىتاۋ تورىندەگى جادىگەرلەر كەشەنىن, تارازدىڭ ەجەلگى ەسكەرتكىشتەرىن, تاعى باسقا جەرلەردى تاماشالاۋىنا مۇمكىندىك جاساماق.
– ەلباسى ن.نازارباەۆ «بولاشاققا باعدار: رۋحاني جاڭعىرۋ» ماقالاسىندا «تۋعان جەر» باعدارلاماسىن قولعا الۋدى ۇسىنعان بولاتىن. ەلباسى بۇل ويىن تۋعان جەرگە, ونىڭ مادەنيەتى مەن سالت-داستۇرلەرىنە ايرىقشا ىڭكارلىكپەن اتسالىسۋ – شىنايى ءپاتريوتيزمنىڭ ماڭىزدى كورىنىستەرىنىڭ ءبىرى رەتىندە قاراستىرادى. بۇل اۋقىمدى شارا كوپشىلىكتىڭ كوڭىلىنەن شىعىپ, ماڭىزى زور ۇسىنىسقا بارىنشا قولداۋ جاسالىنۋدا. شىندىعىندا دا اتا-بابالارىمىز بىلەكتىڭ كۇشىمەن, نايزانىڭ ۇشىمەن قورعاپ, كەلەشەك ۇرپاققا ميراس ەتىپ قالدىرعان اماناتىنا يە بولۋ بۇگىنگى ۇرپاقتىڭ پارىزى. مەملەكەت باسشىسىنىڭ يگى باستامالارىن قولداۋ ارقىلى ءبىز كەلەر ۇرپاقتىڭ جۇرەتىن جولىن, باعىت-باعدارىن ايقىندايمىز, سول ارقىلى اتا-بابالار مۇراسىن امانات ەتىپ قالدىرۋعا ءوز ۇلەسىمىزدى قوسامىز دەپ سانايمىن, – دەيدى تۇركىستان مەديتسينا كوللەدجىنىڭ ديرەكتورى عالىمجان بيمۋرزاەۆ.
سونداي-اق كوللەدج ۇستازدارى قاسيەتتى جەرلەردىڭ توپىراعىن باسىپ, كونە جادىگەرلەر تاريحىمەن جاقىن تانىسىپ, بابالار رۋحىنان ءتالىم العان جاستاردىڭ وتانعا دەگەن ماحابباتى شەكسىز بولادى دەپ ەسەپتەيدى. كونە جادىگەرلەردى كوزبەن كورۋ جاستاردىڭ رۋحىن كوتەرەتىنىنە سەنىمدى.
عالىمجان ەلشىباي,
«ەگەمەن قازاقستان»
