جيىندى اشىپ بەرگەن قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي جەتكەن جەتىستىكتەرىمىز ەلىمىزدەگى تىنىشتىق پەن تۇراقتىلىقتىڭ ارقاسىندا ەكەنىن اتاپ كورسەتتى. ونىڭ ايتۋىنشا, وسى باعىتتا ەلباسى ن.نازارباەۆتىڭ اتقارعان ەڭبەگى زور.
«قازاقستان ەكونوميكالىق جانە ساياسي تۇرعىدان تابىستى ساياسات جۇرگىزىپ, رۋحاني جاڭعىرۋعا قادام باستى. تاياۋدا تورتكۇل دۇنيەنى دۇبىرلەتىپ, ەكسپو-2017 حالىقارالىق كورمەسىن ابىرويمەن وتكىزدىك. الەم كوزىن تىككەن شارا تابىستى بولدى. ەلباسى دا, حالىق تا كورمەنى جوعارى باعالادى. بۇگىنگى فورۋم سول جيىننىڭ جالعاسى ىسپەتتى», – دەدى د. مىڭباي.
قحا توراعاسى ورىنباسارىنىڭ پايىمداۋىنشا, بىرلىگى جاراسقان كوپ ەتنوستى ەلدى داۋ دا, جاۋ دا جەڭە المايدى. بۇل تەزيستى ەگەمەندىك العالى جەر جاھانعا دالەلدەپ جۇرگەنىمىزدى ايتقان د.مىڭباي ەلباسى ن.نازارباەۆتىڭ تاۋەلسىزدىكتىڭ ەڭ باستى تىرەگى – بەيبىتشىلىك پەن كەلىسىم, تىنىشتىق پەن تۇراقتىلىق ەكەنىن اتاپ وتكەنىنە توقتالدى. ونىڭ ايتۋىنشا, ەلباسى ن.نازارباەۆ اسسامبلەيانى قاسيەتتى تىرەكتىڭ مىزعىماس تۇعىرى دەپ بالاعان.
فورۋم بارىسىندا د.مىڭباي شارانىڭ تاقىرىبىن قازىرگى زاماننىڭ ءوزى ازىرلەپ بەرگەنىن جەتكىزدى. قحا توراعاسى ورىنباسارىنىڭ ايتۋىنشا, الەم ەلدەرى كوپ ۇلتتى حالىقتى باسقارۋ جونىندە ءجيى تولعانادى. وسى ورايدا, د.مىڭباي قازاقستاندا كوپ ەتنوستىڭ تاتۋ-ءتاتتى عۇمىر كەشىپ, شەت ەلدەرگە ۇلگى بولاتىنىن مالىمدەدى.
«قوعامدىق پىكىر مەن ەتنوسارالىق كەلىسىم جونىندەگى ءبىزدىڭ تاجىريبەمىزدى كوپ مەملەكەتتەر پايدالانسا, الەمدە بەيبىتشىلىك ورنايتىنىنا سەنىمدىمىن. ونى شيەلەنىسكە تولى كەز كەلگەن وڭىردە پايدالانۋعا بولادى. بۇۇ, ەۋروپاداعى قاۋىپسىزدىك جانە ىنتىماقتاستىق ۇيىمى, ەۋروپا وداعى قوعامدىق پىكىر مەن ەتنوسارالىق كەلىسىم جونىندەگى قازاقستاندىق ۇلگىنى جوعارى باعالادى», – دەگەن د.مىڭباي قازاقستاننىڭ مۇنداي جەتىستىككە جەتۋى ەلباسىنىڭ ەرەن ەڭبەگىنىڭ ارقاسى ەكەنىنە توقتالدى.
سونداي-اق, د.مىڭباي ەتنوستاردىڭ ءتىلىن دامىتۋ جولىندا قازاقستان تاراپى اتقارىپ جاتقان ىستەردى ساراپشىلاردىڭ جوعارى باعالاعانىن جەتكىزدى. ونىڭ پىكىرىنشە, سانى از ەتنوستاردىڭ ءوز ءتىلى مەن مادەنيەتىن دامىتۋدا ەلىمىزدە جاقسى جاعداي جاسالعان.
شارادا ءسوز سويلەگەن قازاقستان ستراتەگيالىق زەرتتەۋلەر ينستيتۋتىنىڭ ديرەكتورى زارەما شاۋكەنوۆا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى ەل دامۋىنا نەگىز بولاتىنىن ءسوز ەتتى.
«دامىعان ەلدەردىڭ ءبارى حالىقتىڭ رۋحاني كوزقاراسىن جاڭارتۋ ارقىلى جەتىستىككە جەتتى. رۋحاني جاڭعىرۋدىڭ نەگىزگى كوزى ءبىلىم سالاسىنا وزگەرىستەر ەنگىزۋ ەكەنى بەلگىلى. كەڭەس وداعى تۇسىنداعى ءبىلىم جۇيەسى الەمدەگى وزىق ۇلگىلەردىڭ ءبىرى بولعانى ايتىلادى. ءبىز سونىڭ باسىمدىقتارىن وزىمىزگە ساقتاپ قالدىق», – دەدى ز.شاۋكەنوۆا.
جيىنعا الىس-جاقىن شەت ەلدەردەن, قىتايدان, رەسەيدەن, قىرعىزستان مەن بەلارۋس ەلدەرىنەن ساراپشىلار, حالىقارالىق قاتىناس سالاسىنىڭ ماماندارى قاتىستى. ولار ەتنوسارالىق كەلىسىم مەن تاتۋلىقتى قالىپتاستىرۋدا قازاقستاننىڭ ەڭبەگىن جوعارى باعالادى. سونىمەن قاتار, ساراپشىلار ەتنوستار تاتۋلىعى جونىندەگى ءوز كوزقاراستارىن ورتاعا سالدى. فورۋمدا ازاماتتىق بىرەگەيلىكتى قالىپتاستىرۋدى مادەني جانە فيلوسوفيالىق تۇرعىدا ءتۇسىنۋ تاجىريبەسىن, قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلىنىڭ ورنىن جانە ونىڭ قازىرگى ۋاقىتتا ۇلعايىپ كەلە جاتقان قاۋىپ-قاتەردەگى ءرولىن, قازاقستان حالقى اسسامبلەياسى ينستيتۋتىنىڭ قوعامدىق سانانى جاڭعىرتۋداعى ماڭىزىن اشىق كورسەتۋ ماسەلەلەرى قاراستىرىلدى.
جيىندا كورشىلەس ەلدەردىڭ ارىپتەستىگى, سانانىڭ اشىقتىعى مەن ۇلتتىق بىرەگەيلىكتىڭ ءتيىمدى تۇيىندەسۋى, ۇلتتىق بىرەگەيلىكتى تالداۋ ماسەلەلەرى ءسوز بولدى. فورۋم جۇمىسىنىڭ قورىتىندىسى بويىنشا قازاقستاندا دا, الەمدە دە مادەني ارتۇرلىلىك پەن مادەنيەتارالىق ديالوگتى ساقتاۋ جانە كەڭەيتۋ بويىنشا ۇسىنىستار تۇجىرىمدالدى.
اباي اسانكەلدى ۇلى,
«ەگەمەن قازاقستان»
