قۇجاتقا سايكەس, پرەمەر-ءمينيستردىڭ قاراۋىنا ەكونوميكالىق, قارجى, فيسكالدىق جانە كەدەن ساياساتىنىڭ, مەملەكەتتىك بيۋدجەتتىڭ ستراتەگيالىق ماسەلەلەرى, قورعانىس جانە قۇقىقتىق ءتارتىپ, مۇناي-گاز سەكتورىن دامىتۋ, مەملەكەتتىك اكتيۆتەردى باسقارۋ, مەملەكەتتىك ورگانداردىڭ اكىمشىلىك رەفورماسىن ىسكە اسىرۋ, مەملەكەتارالىق قاتىناستار مەن حالىقارالىق ىنتىماقتاستىق, شەتەلدىك ينۆەستيتسيالار تارتۋ, ينۆەستيتسيالىق احۋالدى جاقسارتۋ جانە باسقالارى كىرەدى.
پرەمەر-ءمينيستردىڭ ءبىرىنشى ورىنباسارى اسقار ءماميننىڭ مىندەتتەرىنە ەكونوميكانى جەدەل باسقارۋ جانە وڭىرلىك ساياسات, كولىك ينفراقۇرىلىمىن جانە لوگيستيكانى دامىتۋ, قۇرىلىستى دامىتۋ جانە تۇرعىن ءۇي-كوممۋنالدىق شارۋاشىلىقتى جاڭعىرتۋ ماسەلەلەرى جاتادى. سونىمەن قاتار اسقار مامين قورعانىس-ونەركاسىپ كەشەنىن دامىتۋ, توتەنشە جاعدايلار جانە جۇمىلدىرۋ جۇمىسى, عارىش قىزمەتى, ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ, ەنەرگيانىڭ جاڭارتىلاتىن كوزدەرى, كومىر ونەركاسىبى, اتوم ونەركاسىبى جانە يادرولىق ەنەرگەتيكا, يننوۆاتسيالار, تەحنيكالىق رەتتەۋ, ەلەكتر ەنەرگەتيكاسى, گەولوگيا جانە جەر قويناۋىن پايدالانۋ, مۇناي حيمياسى, ەكسپورتتىق باقىلاۋ, قورشاعان ورتانى قورعاۋ, جىلىتۋ ماۋسىمىنا دايىندىق جانە ونى وتكىزۋ جانە باسقا دا ماسەلەلەر كىرەدى.
پرەمەر-ءمينيستردىڭ ءبىرىنشى ورىنباسارىنىڭ قىزمەت اياسىنا سونىمەن قاتار ارنايى ەكونوميكالىق جانە يندۋستريالىق ايماقتاردى دامىتۋدى ۇيلەستىرۋ, ەۋرازيالىق ەكونوميكالىق وداق شەڭبەرىندە ىنتىماقتاستىق ماسەلەلەرى جاتقىزىلادى.
پرەمەر-ءمينيستردىڭ ورىنباسارى ەربولات دوساەۆتىڭ مىندەتىنە ەل ەكونوميكاسىن ءۇشىنشى جاڭعىرتۋدى جوبالىق باسقارۋ, مەملەكەتتىك جوسپارلاۋ جۇيەسى, قارجى سەكتورىن دامىتۋ, ماكروەكونوميكالىق, بيۋدجەت, سالىق جانە كەدەن ساياساتى, شوب پەن مەملەكەت-جەكەمەنشىك ارىپتەستىگىن دامىتۋ, سونىمەن قاتار ءبىلىم بەرۋ مەن عىلىمدى دامىتۋ, دەنساۋلىق ساقتاۋ, الەۋمەتتىك جاڭعىرتۋ, جۇمىسپەن قامتۋ, ءدىن, تۋريزم, مادەنيەت جانە سپورت, دەموگرافيا جانە كوشى-قون ساياساتى, تاريف ساياساتىن ۇيلەستىرۋ جانە باسقا دا ماسەلەلەر بەكىتىلگەن.
پرەمەر-ءمينيستردىڭ ورىنباسارى اسقار جۇماعاليەۆ سالالاردى تسيفرلاندىرۋ جانە تسيفرلى ەكونوميكانى دامىتۋ, اقپاراتتاندىرۋ, بايلانىس جانە اقپاراتتىق قاۋىپسىزدىك, «ەلەكتروندى ۇكىمەتتى», اقپاراتتىق تەحنولوگيالاردى دامىتۋ, مەملەكەتتىك كورسەتىلەتىن قىزمەتتەردى اۆتوماتتاندىرۋ, ەلەكتروندى كوممەرتسيا, سپۋتنيكتىك بايلانىستى دامىتۋ, مەملەكەتتىك اقپاراتتىق ساياساتتى ىسكە اسىرۋ جانە باسقا دا ماسەلەلەردى ۇيلەستىرەدى.
پرەمەر-ءمينيستردىڭ ورىنباسارى اسقار مىرزاحمەتوۆ اگروونەركاسىپتىك كەشەن, جەر قاتىناستارى, سۋ رەسۋرستارى, ورمان شارۋاشىلىعى, جانۋارلار الەمى, اۋىلشارۋاشىلىق ماشيناسىن جاساۋ, اۋىلدى ناتيجەلى جۇمىسپەن قامتۋ جانە باسقا دا ماسەلەلەرگە جەتەكشىلىك ەتەدى.
پرەمەر-مينيستر كەڭسەسىنىڭ باسشىسى نۇرلان الدابەرگەنوۆ پرەمەر-ءمينيستردى جانە ۇكىمەت باسشىلىعىن اقپاراتتىق-تالداۋ, قۇقىقتىق, ۇيىمداستىرۋشىلىق, پروتوكولدىق, قۇجاتتامالىق, ماتەريالدىق-تەحنيكالىق جانە وزگە دە ماسەلەلەردى قامتاماسىز ەتۋدى ىسكە اسىرادى.
