كوپتەن بەرى كورەرمەندەردىڭ كوزايىمىنا اينالعان ەكى ستۋديا جاڭارتىلىپتى. اتاپ ايتقاندا, تاڭەرتەڭگىلىك «قايىرلى تاڭ!» باعدارلاماسى مەن «جاڭالىقتار» ءبولىمى ەندى سوڭعى ۇلگىدەگى جاڭادان جابدىقتالعان ەكى ستۋديادا تۇسىرىلەتىن بولدى. بۇل جۇمىستار تەلەارنا ديرەكتورى ارسەن بەكتاسوۆتىڭ بىلىكتى باسشىلىعىمەن جاز ايلارىندا جۇرگەن ەكەن.
- بيىل «قازاقستان-سەمەي» تەلەارناسى ءوزىنىڭ 52 جىلدىق تاريحي كەزەڭىنە بەت بۇرىپ وتىر, - دەدى ديرەكتوردىڭ ورىنباسارى, تانىمال جۋرناليست ەرجان جاقىپ,- وسى 52 جىلدىڭ ىشىندە كوپتەگەن باعدارلامالار وزگەردى. تەك وسى «قايىرلى تاڭ!» مەن «جاڭالىقتار» عانا كورەرمەندەردىڭ سۇراۋىنا وراي جارتى عاسىردان استام ۋاقىت بويى ءۇزىلىسسىز ءتۇسىرىلىپ كەلە جاتىر. ستۋديالارىمىزدى جاڭارتىپ, باسقا دا جاڭا باعدارلامالاردى ەفيرگە شىعارۋدامىز. سونداي-اق, ۇلتتىق ويۋ-ورنەكتى گرافيكالىق-ەستەتيكالىق ەرەكشەلىكتەردى باستى نازارعا الدىق. ۇلتتىق سانانى جاڭعىرتۋ جونىندەگى ەلباسى تاپسىرماسىنا وراي جاسالعان بۇل وزگەرتۋلەرىمىز ايماقتىق ارنالاردىڭ ىشكى تەلەنارىقتا دەربەس جۇمىس جۇرگىزۋىنە ىقپال ەتپەك. جانە اۋديتوريانى كەڭەيتۋگە باعىتتاعان نەگىزگى شارالارىمىز دا وسى بولىپ تابىلادى. كوپتەگەن الەمدىك تەلەارنالارداعى ۇردىستەردى سارالاپ, زاماناۋي ترەندتەردى دە ەسكەرىپ وتىرمىز. الداعى ۋاقىتتا بالالارعا, جاستارعا ارنالعان كوپتەگەن باعدارلامالاردى قولعا الماقپىز. بارلىعى دا ەل يگىلىگى ءۇشىن اتقارىلىپ جاتقان جۇمىستار.
راۋشان نۇعمانبەكوۆا,
سەمەي
سۋرەتتى تۇسىرگەن اۆتور
