ولاردىڭ تاپ-تازا الەمى, ارماندارى, «ۋايىمدارى» ماعان اسا قىزىق. سوندا ءبىر بايقايتىنىم, بالدىرعاندار كوبى ونەرگە, سپورتقا قىزىعادى. اسىرەسە, «سۋرەتشى بولعىم كەلەدى» دەيتىن جاۋاپتارعا ويلانىڭقىراپ قالام. قانداي قوعامدا دا تازالىققا, مولدىرلىككە, سۇلۋلىققا ىڭكارلىكتىڭ جويىلمايتىنىنا, ادام بالاسىنىڭ قارشادايىنان بەيسانالى تۇردە سونداي قۇندىلىقتارعا ۇمتىلاتىنىنا دالەل بۇل. ءبىزدىڭ كەيىپكەرىمىز سول جۇزدەگەن شاكىرتتىڭ قيالىنا قانات ءبىتىرىپ جۇرگەن ۇستاز. استانا قالاسىنداعى №52 مەكتەپ-گيمنازيادا بەينەلەۋ ونەرى پانىنەن ساباق بەرەدى.
قايرات جايىربەك تاريحي وتانىنا وتىزدان اسىپ بارىپ ورالعان جىگىت. ءوز ءپانىن اسا سۇيىسپەنشىلىكپەن, جاۋاپكەرشىلىكپەن وتكىزۋدىڭ سىرتىندا ول ءوزىنىڭ ونەرىن دە جىلدان-جىلعا جەتىلدىرىپ كەلە جاتقان كاسىبي سۋرەتشى. وعان دالەل – استانادا, الماتىدا وتكىزىلگەن سۋرەت كورمەلەرىنە, بايقاۋلارىنا قاتىسۋى, تۋىندىلارىنىڭ قازىلار القاسى تاراپىنان ەلەۋسىز قالماۋى. ول 2011 جىلى استانادا وتكەن دۇنيەجۇزى قازاقتارىنىڭ ءتورتىنشى قۇرىلتايى اياسىندا ۇيىمداستىرىلعان كورمەگە, 2012 جىلى قازاقستان جاستار كونگرەسى ۇيىمداستىرعان الەۋمەتتىك كورمەگە, 2013-2014 جىلدارى «حالىقارالىق ونەر فەستيۆالىنە» قاتىسىپ, جۇمىستارى جاقسى باعالانعانىن, 2014-2015 جىلدارى استانا قالاسى ءبىلىم باسقارماسى ۇيىمداستىرعان بەينەلەۋ ونەرى مۇعالىمدەرىنىڭ شىعارماشىلىق كورمەسىندە قاتارىنان ەكى جىل گران-پري جۇلدەسىن يەلەنگەنىن ايتادى.
قىتاي حالىق رەسپۋبليكاسىنىڭ تارباعاتاي ايماعى, ءدوربىلجىن اۋدانىندا تۋعان ازامات الدىمەن قىتاي ءتىلى ماماندىعى بويىنشا ءبىلىم العان. بىراق بويىنداعى سۋرەتشىلىك قابىلەت قايراتتى ىلە وبلىستىق پەداگوگيكالىق ينستيتۋتىنىڭ بەينەلەۋ ونەرى فاكۋلتەتىنە وقۋعا تۇسۋگە جەتەلەيدى. ول ون جىل بويى دوربىلجىندەگى №2 قازاق ورتا مەكتەبىندە ءارى قىتاي ءتىلىنىڭ, ءارى بەينەلەۋ ونەرىنىڭ مۇعالىمى بولىپ قىزمەت اتقارادى. سول جاقتا دا ونەرىنىڭ ارقاسىندا جاقسى جەتىستىكتەرگە جەتەدى.
ونىڭ تۋىندىلارىنىڭ ىشىندە جيۆوپيس تە, پورترەت تە, گرافيكا دا كەزدەسەدى. ول سونداي-اق جيىرما جىلدان استام ۋاقىتتان بەرى وزىندەگى باردى شاكىرتتەرىنە دە ۇيرەتۋمەن, ونەردىڭ قىر-سىرىنا باۋلۋمەن كەلەدى. سۋرەتشى تازالىققا, سۇلۋلىققا, ەركىندىككە, باستىسى, ونەرگە عاشىق جاندار كوپ بولسا دەپ ويلايدى. سالعان سۋرەتتەرىنىڭ دە نەگىزگى يدەياسى سول.
ايگۇل سەيىل,
«ەگەمەن قازاقستان»
