ەرتە كوكتەمنەن كۇنگە شاعىلىسقان ايماڭداي كەتپەنىن الىپ, اتىزدان شىقپاعان ديقانداردىڭ قاعاناعى قارق, ساعاناعى سارق, كوڭىلى توق. ويتكەنى ماقتا باعاسى كوڭىلگە قونىمدى. ماقتا قابىلداۋ بەكەتتەرى ءار توننانى 165 مىڭ تەڭگەدەن قابىلداي باستادى. ەڭبەك اقتالدى دەگەن وسى. الا جاز بويى الاشاپقىن بولعان قوڭىر كۇز ءار شاڭىراقتىڭ بەرەكەسىن كىرگىزىپ-اق جاتىر.
سوناۋ جىلدارى كۇلمەك تۇگىلى كوز جاسى كول بولعان ۋاقىتتار دا بولعان. «بۇلاقتىڭ باسىنداعىلار بال ىشەدى, سوڭىنداعىلار ۋ ىشەدى» دەگەن قاناتتى ءسوز وسى ماقتا ەككەن ديقانداردان قالعان. اپتاپ توبەنى تەسىپ, الا قارعانىڭ ميى اينالىپ تىراڭ ەتىپ ءار جەرگە قۇلاپ جاتقاندا كونى كەپكەن ماقتالىعىنا سۋ جەتكىزە الماي شەرمەندە بولعان ديقانداردىڭ سۋ كەزەگى ءۇشىن كەتپەندەسىپ قالا جازداعانىن تالاي كورگەنبىز. وزبەكستاننان كەلەتىن «دوستىق» كانالىنىڭ قازاققا كەلگەندە سۋى تارتىلىپ, مەملەكەتارالىق كەلىسىمشارتتاعى كولەمى از بەرىلەتىن ۋاقىت ءوتتى. شىلىڭگىر شىلدەدە اتىزدار قۋراپ قالماس ءۇشىن شاردارادا سۋ قويماسىنىڭ ساعاسىنان ەلەكتر قۋاتىمەن جۇمىس ىستەيتىن سۋ سورعى ستانساسى ىسكە قوسىلعان. مەملەكەتكە قىرۋار قارجىعا تۇسسە دە, امالسىز بارعان قادام ەدى.
بۇگىندە مەملەكەتارالىق كەلىسىمدەردىڭ نەگىزىندە وزبەكستاننىڭ پەيىلى جاقساردى. سۋ جەتكىلىكتى. سۋ مول بولعان سوڭ ديقاندار دا ويداعىداي ءونىم الدى. كەزىندە ماقتاارال اۋدانىنىڭ اكىمى بولعان, بۇگىندە اۋىل شارۋاشىلىعى باسقارماسىنىڭ باسشىسى, ءبىلىمدى ماسكەۋدەگى تيميريازوۆ ۋنيۆەرسيتەتىنەن العان سەرىك تۇربەكوۆتىڭ باستاماسىمەن ديقاندار اتىزدى تەرەڭ قوپسىتۋ ادىسىنە وتكەن. سوقامەن جەردىڭ قاباتىن ايرا-جايرا قىلماي ىلعال مەن توپىراقتىڭ قۇنارىن ساقتاۋعا سەپتەسەتىن جاڭا تەحنولوگيانىڭ ارقاسىندا 95 مىڭ گەكتار جەرگە ەگىلگەن ءشيتتى ماقتادان گەكتارىنا 21-24 تسەنتنەردەن ءونىم الۋعا مۇمكىندىك بار.
جالپى, بيىل وڭتۇستىك قازاقستاندا 134,6 مىڭ گەكتار جەرگە ماقتا ءشيتى سەبىلگەن. بۇل وتكەن جىلمەن سالىستىرعاندا 25 مىڭ گەكتارعا ارتىق. 2016 جىلى شارۋالار ءار گەكتارىنا ورتاشا ەسەپپەن 26,2 تسەنتنەردەن ءونىم الىپ, بارلىعى 286,4 مىڭ توننا ماقتا جيناعان. بۇگىندە ەگىس كولەمىنىڭ ارتۋىنا بايلانىستى وڭىردە 300 مىڭ توننادان استام ماقتا جينالادى دەپ جوسپارلانىپ وتىر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
