القالى جيىندا ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن ەكسترەميستىك يدەولوگيا وكىلدەرى ءدىن مەن ءداستۇردىڭ ساباقتاستىعىن, وسىنىڭ نەگىزىندە قالىپتاسقان ءداستۇرلى رۋحاني قۇندىلىقتاردى جويۋدى كوزدەيتىنىن, سونداي-اق, ەلىمىزدىڭ زايىرلىلىق قاعيداتتارىنا دەگەن قوعامنىڭ تەرىس كوزقاراسىن تۋدىرۋدى ماقسات ەتەتىنىن ايتتى.
– قوعامنىڭ راديكالدانۋىنا اقپاراتتىق كەڭىستىكتىڭ اشىقتىعى مەن جاھاندانۋ پروتسەستەرى ىقپال ەتىپ وتىر. ال ەڭ باستىسى ادامگەرشىلىك قۇندىلىقتاردىڭ جۇتاڭدىعىنان جاستارىمىز وسىنداي شالىس قادامدارعا بارىپ جاتادى. ءبىزدىڭ باستى مىندەتىمىز – وسكەلەڭ ۇرپاق اراسىندا اقپاراتتىق جۇمىستاردىڭ تيىمدىلىگىن ارتتىرۋ. ءتۇسىندىرۋ جۇمىستارى كەزىندە جات اعىمداردىڭ ماقساتى, ولاردان كەلەتىن قاۋىپ-قاتەر جان-جاقتى ءسوز بولادى. اقپاراتتىق جۇمىستار نەگىزىنەن الدىن الۋ جانە دەراديكاليزاتسيا باعىتىندا جۇرگىزىلۋ ۇستىندە. ال بۇل ماقساتىمىزدى ءتيىمدى ورىنداۋدا ايەلدەر ۇيىمدارىنىڭ ءرولى زور, – دەدى بەرىك ارىن.
ول سونداي-اق, ەلىمىزدە جەتەكشى جوعارى وقۋ ورىندارىنىڭ جانىنان قۇرىلعان «قىز جىبەك» كلۋبتارى جۇمىس ىستەپ كەلە جاتقانىن ايتتى. ولار بۇگىنگە دەيىن قوعامدى ۇلتتىق ءداستۇر مەن زايىرلىلىق قۇندىلىقتارى نەگىزىندە تاربيەلەۋگە سەپتىگىن تيگىزىپ كەلەدى. كەي وقۋ ورىندارىندا «سىرعالىم» دەگەن اتاۋمەن دە اشىلعان.
كونفەرەنتسيادا ءسوز العان ءدىن ىستەرى جانە ازاماتتىق قوعام مينيسترلىگى جاستار ساياساتى دەپارتامەنتىنىڭ ديرەكتورى عابيدوللا وسپانقۇلوۆ جاستارىمىزدىڭ جات اعىمنىڭ جەتەگىندە كەتپەۋ ءۇشىن ەلىمىزدىڭ تۇكپىر-تۇكپىرىندە تۇسىندىرمە جۇمىستارى جۇرگىزىلگەنىن جەتكىزدى. ونىڭ بارىسىندا باس-اياعى ەلۋ مىڭ جاستى قامتىعان مىڭنان استام ءىس-شارا ۇيىمداستىرىلعان.
ال پسيحولوگيا عىلىمدارىنىڭ دوكتورى, پروفەسسور ءلايلا اسىلبەكوۆا ءدىن جولىنا ەر ادامنان ايەلدەردىڭ قاتتى بەرىلۋى قاۋىپتىرەك دەپ ەسەپتەيدى. سەبەبى, ايەل زاتىنىڭ راديكالدانۋى وتە جىلدام دەگەن پىكىرىن العا تارتتى.
ءداستۇرلى تۇردە وتكىزىلىپ كەلە جاتقان بۇل جيىن بىلتىر «ەكسترەميزم مەن تەرروريزمنىڭ الدىن الۋداعى ايەلدەر ۇيىمدارىنىڭ ءرولى» دەگەن تاقىرىپتا ۇيىمداستىرىلعان بولاتىن.
ايان ءابدۋالي,
«ەگەمەن قازاقستان»
