ءماجىلىس دەپۋتاتتارىنىڭ, قوستاناي, اقمولا, سولتۇستىك قازاقستان وبلىستارى اگروقۇرىلىم باسشىلارىنىڭ, مەملەكەتتىك ورگاندار جەتەكشىلەرىنىڭ, قوعامدىق ۇيىمدار وكىلدەرىنىڭ قاتىسۋىمەن ۇيىمداستىرىلعان القالى باسقوسۋدى ايماق باسشىسى قۇمار اقساقالوۆ اشىپ, كۇن تارتىبىنە ۇسىنىلعان ماسەلەنىڭ وزەكتىلىگىن, اۋىلشارۋاشىلىق جەرلەرى مەن قورلارىن ءتيىمدى پايدالانۋدىڭ ماڭىزدىلىعىن اتاپ ءوتتى.
اگروونەركاسىپ سالاسىندا جۇمىس ىستەپ جۇرگەندەر وزىق تەحنولوگيالاردىڭ ارتىقشىلىقتارىن جاقسى سەزىنۋى كەرەك. بۇل سالاعا ۇكىمەت جۇيەلى قولداۋلار مەن جەڭىلدىكتەر كورسەتىپ كەلەدى. جەر – باستى بايلىعىمىز, اسىراۋشىمىز, سوندىقتان جۇكتەلگەن مىندەتتى ابىرويمەن اتقارۋ ءبارىمىز ءۇشىن باستى پارىز سانالۋى ءتيىس, دەدى قۇمار ىرگەباي ۇلى. بيىلعى ەگىن وراعى ۇيىمشىلدىقپەن اتقارىلىپ, گەكتار بەرەكەلىگى 17 تسەنتنەردەن اينالۋدا. اۋىلشارۋاشىلىق تاۋارلارىن وندىرۋشىلەرگە 44 ملرد تەڭگە سۋبسيديا بەرىلگەن. كەلەسى جىلى مايلى داقىلدار كولەمىن 1 ميلليون گەكتارعا دەيىن ۇلعايتۋ كوزدەلىپ وتىر.
اۋىل شارۋاشىلىعى ءمينيسترىنىڭ ورىنباسارى ەرلان نىسانباەۆ جەر رەفورمالارى جونىندەگى كوميسسيانىڭ اتقارعان جۇمىستارى مەن پارلامەنت قاراۋىنا ۇسىنىلعان زاڭنامالىق اكتىلەرگە ەنگىزىلەتىن وزگەرىستەر مەن تولىقتىرۋلار جايلى بايانداپ بەردى.
بۇدان بىلاي اۋىلشارۋاشىلىق ماقساتىنداعى جەرلەردى قورعاۋعا الۋ مەن جالعا الۋشىلاردىڭ جاۋاپكەرشىلىگى كۇشەيتىلىپ, جەر بەرۋ, كونكۋرس وتكىزۋ شارتتارى قاتاڭداتىلادى. ۇتىمدى پايدالانىلمايتىن جەر تەلىمدەرىن تۇگەندەۋ, جەردىڭ توزۋىنا قارسى ىقپالدى جانداندىرۋ, تۇرعىنداردى جايىلىمدىق جەرلەرمەن قامتاماسىز ەتۋ ماسەلەلەرى ەرەكشە باقىلاۋدا بولادى, دەدى ول.
پارلامەنت ءماجىلىسىنىڭ دەپۋتاتتارى بەرىك وسپانوۆ, سەرگەي زۆولسكي جوباعا 250-دەي تۇزەتۋلەر ەنگىزىلگەنىن, ۇسىنىس-تىلەكتەردىڭ 90 پايىزدايى ەسكەرىلگەنىن جەتكىزدى.
وبلىس اكىمىنىڭ ءبىرىنشى ورىنباسارى ايداربەك ساپاروۆ قازىرگى قولدانىلىپ جۇرگەن جەر زاڭنامالارى اياسىندا اتقارىلىپ جاتقان ءىس-شارالاردى ورتاعا سالدى. اۋىلشارۋاشىلىق ماقساتىنداعى جەرلەردىڭ 16 پايىزى شارۋا جانە فەرمەرلىك قوجالىقتارعا, 55 پايىزى سەرىكتەستىكتەر مەن اكتسيونەرلىك قوعامدارعا تيەسىلى. الايدا ولاردىڭ اراسىندا جەر كۇتىمىنە سالعىرت قارايتىندار دا جوق ەمەس. سوڭعى ءۇش جىلدا 1 ميلليون 30 مىڭ گەكتار جەر مەملەكەت مەنشىگىنە قايتارىلعان. ونىڭ 383 مىڭ گەكتارى – جىرتىلعان جەرلەر. بيىل 116 مىڭ گەكتار جەردىڭ قورعاۋسىز قالعانى انىقتالعان. 117 اگروقۇرىلىم ەگىنشىلىك مادەنيەتىن جەتىلدىرۋ, اۋىسپالى ەگىس جۇيەسىن قالىپتاستىرۋ ىسىمەن مۇلدەم اينالىسپايدى.
ماسەلەن, «اگروفيرما ۆينوگرادوۆكا» جشس گەكتار باسى 5 تسەنتنەردەن ءونىم جيناۋدى كوپ جىل بويى قاناعات ەتىپ كەلگەن. ا.ساپاروۆ ءبىر زاڭدى تۇلعاعا بەرىلەتىن جەر كولەمىن 50 مىڭ گەكتاردان اسىرماۋ, قۇرىلتايشىنىڭ سول وڭىردە تۇرۋ تيىستىلىگىن العا تارتىپ, ەكى جىل بويى ماقساتتى نەگىزدە پايدالانىلماعان جەرلەردى كەرى قايتارۋ قاجەتتىگىن, ول ءۇشىن جەر كودەكسىنىڭ 92-بابىنا وزگەرىس ەنگىزۋدى ۇسىندى.
قوستانايلىقتار مەن اقمولالىقتاردىڭ جەردى جالعا بەرۋ شارتىن بىرجاقتى ءۇزۋ تۋرالى ۇسىنىسى قولداۋ تاپتى. ويتكەنى بۇل باعىتتا ورىن العان ولقىلىقتاردى جويۋ تىم ۇزاققا سوزىلىپ كەتىپ ءجۇر. كوشپەلى وتىرىستا ەلدى مەكەندەر ماڭايىندا جايىلىمدىق جەرلەردىڭ تارلىعىنا, باسقا شارۋاشىلىققا اۋىسقان ادامداردىڭ تيەسىلى پايلارىن الۋدىڭ ماشاقاتىنا بايلانىستى ناقتى شەشىمدەر قابىلداناتىنى ايتىلدى.
دەپۋتاتتار «بازيس قىزىلجار», «پەتەرفەلد اگرو», «الەكري» سەرىكتەستىكتەرىندە بولىپ, وزىق تەحنولوگيالارمەن, جەرگىلىكتى تاجىريبەلەرمەن تانىستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
