فورۋم شەكارالىق داۋلاردى نەعۇرلىم ءتيىمدى شەشۋ, ترانسۇلتتىق قىلمىسپەن كۇرەسۋ, تۇراقتى, ءادىل, اشىق ءارى بولجالدى قۇقىقتىق ورتانى قۇرۋ ءۇشىن قىتاي مەن ۇلى جىبەك جولى ەلدەرى اراسىنداعى تاجىريبە الماسۋ مەن ىنتىماقتاستىقتى كەڭەيتۋ ماقساتىندا وتكىزىلۋدە. فورۋمنىڭ كۇن تارتىبىنە حالىقارالىق سوت كومەگىن نىعايتۋ, كوممەرتسيالىق زاڭداردى ۇيلەستىرۋ جانە تاعى باسقا بىرقاتار ماسەلەلەر ەنگەن.
ق.ءمامي ءوزىنىڭ كىرىسپە سوزىندە فورۋمدى قۇقىق ۇستەمدىگى مەن سوت جۇيەسى جۇمىسىنىڭ وزەكتى ماسەلەلەرى بويىنشا كاسىبي پىكىر الماسۋدىڭ تاماشا مۇمكىندىگى دەپ اتادى. «فورۋم وزىندىك قايتالانباس پاراديگما – جىبەك جولى وبرازىنا يە. قازاقستان پرەزيدەنتى نۇرسۇلتان نازارباەۆ جىبەك جولىن جاڭعىرتۋ جوباسىن «حالىقارالىق بايلانىستاردى ىنتالاندىرۋدىڭ جاڭا درايۆەرى» دەپ اتاعان بولاتىن», دەدى قازاقستان جوعارعى سوتىنىڭ توراعاسى.
«زاڭ ۇستەمدىگى مادەنيەتى جانە سوت رەفورماسى» سەسسياسىندا جاساعان نەگىزگى بايانداماسىندا ق.ءمامي ۇلت جوسپارى شەڭبەرىندە جۇرگىزىلگەن سوت رەفورمالارى تۋرالى ايتتى. اقپارات سوتتاردى ينستيتۋتتىق كۇشەيتۋ, سوتتاردىڭ كادر ساياساتىن رەفورمالاۋ, «ەلەكتروندى سوت تورەلىگىن» دامىتۋ, ازاماتتىق پروتسەستىك زاڭدى جاقسارتۋ جانە قىلمىستىق زاڭنامانى جاڭعىرتۋ سەكىلدى بەس باسىم باعىت بويىنشا جۇيەلەنىپ ۇسىنىلدى.
ءبىرىنشى باسىمدىق شەڭبەرىندە قاتىسۋشىلار ءۇش ساتىلى سوت جۇيەسىنە كوشۋ, رەسپۋبليكانىڭ جوعارعى سوتى جانىنان ينۆەستيتسيالىق داۋلاردى قارايتىن مامانداندىرىلعان سوت القاسىنىڭ, ايرىقشا سوتى بار استانا حالىقارالىق قارجى ورتالىعىنىڭ (AIFC) قۇرىلعانى تۋرالى حاباردار بولدى.
فورۋم قاتىسۋشىلارى سوت ءبىلىمىن بەرۋ رەفورمالارىمەن, قازاقستاننىڭ ازاماتتىق پروتسەستىك كودەكستى جاڭعىرتۋداعى وڭ تاجىريبەسىمەن جانە قىلمىستىق پروتسەستىك زاڭناما بويىنشا الداعى ۋاقىتتا جۇرگىزىلەتىن رەفورمانىڭ ءمان-جايىمەن تانىستى.
«ەلەكتروندى سوت تورەلىگىن» دامىتۋ تۋرالى ايتا كەلە, ق.ءمامي قازاقستاننىڭ جوعارعى سوتىندا قىتاي مەن وڭتۇستىك كورەيانىڭ تاجىريبەسى نەگىزىندە جەرگىلىكتى سوتتاردىڭ جۇمىسىن 700 كورسەتكىش بويىنشا ون-لاين رەجىمدە باقىلايتىن احۋالدىق ورتالىقتىڭ ىسكە قوسىلعانىن مالىمدەدى.
فورۋم شەڭبەرىندە جوعارعى سوت توراعاسى «Faxin online» ەلەكتروندى سەرۆيسىنىڭ حالىقارالىق نۇسقاسىنىڭ ىسكە قوسىلۋ سالتاناتىنا دا قاتىستى. بۇل جاڭا جۇيە مەملەكەتارالىق دەڭگەيدە سوت اقپاراتىمەن الماسۋدى جاقسارتۋعا باعدارلانعان.
«ەگەمەن-اقپارات»
