جۋىردا «ۇرپاقتار جالعاسى: وتباسىم – باقىت مەكەنىم» اتتى شارا ءوتتى. استانا قالاسىنداعى №74 مەكتەپ-گيمنازياسى ۇيىمداستىرعان جيىندا وتباسىلىق ەڭبەك ءوتىلى 100 جىلدان اسقان ۇستازدار ماراپاتتالدى. ولاردىڭ قاتارىندا اۋلەتتىڭ ەڭبەك ءوتىلى 341 جىلدى قۇرايتىن №54 مەكتەپ-ليتسەيدىڭ باستاۋىش سىنىپ مۇعالىمى, ىبىراي التىنسارين اتىنداعى توسبەلگى يەگەرى گۇلبارشا بۇركىتبايقىزى, اۋلەتتىڭ ەڭبەك ءوتىلى 327 جىلعا جەتكەن №38 مەكتەپ-ليتسەيدىڭ ماتەماتيكا ءپانى مۇعالىمى بايتەمىر ءدىلبار سياقتى 10-نان استام ءبىلىم قىزمەتكەرلەرى بار. سونداي-اق جۇمىس ءوتىلى 20 جىلدان اساتىن جانە ەڭبەكتى ەندى باستاسا دا قىزمەتىندە بەلسەندىلىك تانىتىپ جۇرگەن بىرنەشە ماماندار دا نازاردان تىس قالمادى.
وسى رەتتە ەڭبەك ءوتىلى 341 جىلعا جەتكەن مۇعالىمدەر اۋلەتىنىڭ وكىلى, ىبىراي التىنسارين اتىنداعى توسبەلگى مەن «ۇلاعاتتى ۇستاز» مەدالىنىڭ يەگەرى جانە استانا قالاسى اكىمىنىڭ گرانتىنا يە بولعان گۇلبارشا بۇركىتبايقىزىنان ۇستازدىق كاسىپتىڭ سىرىن سۇراعان ەدىك.
«ۇستازدىق جولدا اتقارعان ادال ەڭبەك ەشقاشان باعاسىز قالمايدى. بۇل ماماندىقتى جاقسى كورە ءبىلۋ كەرەك. مەن ءالى دە بولسا سۇيىكتى كاسىبىمدى جالعاستىرىپ, ۇلتىمىزدىڭ ۇلى تالىمىمەن ۇشتاساتىن پەداگوگيكالىق تاربيەنى شاكىرتتەرىمە بەرسەم دەيمىن. ويتكەنى, مۇعالىم بولۋ مەنىڭ بالا كۇنگى ارمانىم ەدى. اكەم مەن انامنىڭ ەكەۋى دە ۇستاز بولعاندىقتان سولارعا قاراپ بوي تۇزەپ, مۇعالىم بولسام دەگەن مۇراتقا تالپىندىم. اكەم ءان ساباعىن وقىتسا, انام باستاۋىش سىنىپ مۇعالىمى بولدى. 1992 جىلى مەن دە بالا كۇنگى ارمانىما جەتتىم. مەنىڭ اتام 1910 جىلى دۇنيەگە كەلگەن. 1934 جىلى موڭعوليا حالىق رەسپۋبليكاسىنداعى ەڭ العاشقى قازاق مەكتەبىن اشىپ, ءوزى سول مەكتەپتە جۇمىس ىستەپ, 1964 جىلى موڭعوليانىڭ «حالىق مۇعالىمى» اتاعىن العان. ول كىسى پەداگوگيكا سالاسىندا 48 جىل قىزمەت ەتتى. اتامىزدان باستاپ بۇگىنگە دەيىن اۋلەتىمىزدەگى 12 ادام وسى ماماندىقتىڭ يەسى اتانىپ وتىر. ولاردىڭ ىشىندە ەكەۋى موڭعوليا مەملەكەتىندەگى مەكتەپتە ءبىرى ديرەكتور, ءبىرى وقۋ ءىسىنىڭ مەڭگەرۋشىسى بولىپ ىستەيدى. ءبىر ءسىڭلىم شاحتينسك قالاسىندا وقۋ ءىسىنىڭ مەڭگەرۋشىسى, ءبىر اعام استانا قالاسىنداعى №40 مەكتەپتە ەڭبەك جانە سۋرەت ءپانىنىڭ مۇعالىمى, تاعى ءبىر اعام ورىس ءتىلى جانە ادەبيەتى پانىنەن ساباق بەرسە, 44 جىلدىق ەڭبەك ءوتىلى بار اتام – فيزيكا-ماتەماتيكا ءپانىنىڭ مۇعالىمى, ال ەنەم حيميا-بيولوگيا ءپانىنىڭ مۇعالىمى بولىپ ەڭبەك ەتكەن. ءوزىمنىڭ ەكى ۇلىم بار. ۇلكەن ۇلىم ماسكەۋدە اسكەري ۋنيۆەرسيتەتتە ءبىلىم الۋدا. كەنجەمىز ەلورداداعى قازاق ۇلتتىق ونەر ۋنيۆەرسيتەتىندە 3-كۋرستا وقىپ ءجۇر. كەنجە ۇلىمىز دا ۇستازدىق جولدى جالعاستىرادى دەپ سەنەمىز», دەدى گۇلبارشا بۇركىتبايقىزى.
اتالعان شاراعا استانا قالاسى ءبىلىم باسقارماسىنىڭ باسشىسى ءانۋار جانعوزين, قازاقستان كاسىپوداقتارى قاۋىمداستىعى توراعاسىنىڭ ورىنباسارى ايگۇل مۇقاشەۆا, استانا قالاسى ءبىلىم قىزمەتكەرلەرىنىڭ «ادىلەت» كاسىپوداعىنىڭ ءتورايىمى بالسۇلۋ ناۋرىزباەۆا قاتىسىپ, اق تىلەكتەرىن اقتاردى. العىس حاتقا يە بولعان ءاربىر مۇعالىمگە اقشالاي سىياقى تابىس ەتىلدى.
راۋان قايدار,
«ەگەمەن قازاقستان»
