«عىلىم ورداسى» مقك جانە ءال-فارابي اتىنداعى قازۇۋ-ءنىڭ تاريح, ارحەولوگيا جانە ەتنولوگيا فاكۋلتەتىنىڭ قولداۋىمەن وتكىزىلگەن باسقوسۋدا تانىمال عالىمدار, قر ۇعا اكادەميكتەرى سەرىك قيراباەۆ, ءۋاليحان قاليجان, قر پرەزيدەنتى ءارحيۆىنىڭ ديرەكتورى, تەحنيكالىق عىلىمدار دوكتورى بوريس جاپاروۆ, ءال-فارابي اتىنداعى قازۇۋ-ءدىڭ تاريح, ارحەولوگيا جانە ەتنولوگيا فاكۋلتەتىنىڭ دەكانى مەڭدىگۇل نوعايباەۆا, پروفەسسورلار ق.جۇماعۇلوۆ, ن.مۇقامەتحان ۇلى, ب.كارىباەۆ, سونداي-اق, قازقىزپۋ, اباي اتىنداعى قازۇپۋ, قر ۇلتتىق كىتاپحاناسىنىڭ جانە الماتى قالاسى عىلىمي قاۋىمداستىعىنىڭ وكىلدەرى, «ادىلەت» تاريحي-اعارتۋ قوعامى توراعاسىنىڭ ورىنباسارى, جازۋشى بەيبىت قويشىباەۆ, «اق جول» دەموكراتيالىق پارتياسى الماتى فيليالى كەڭەسىنىڭ مۇشەسى ا.ءجۇمادىل, عىلىمي-زەرتتەۋ ينستيتۋتتارىنىڭ عالىمدارى, ماگيسترانتتارى مەن دوكتورانتتارى قاتىستى.
دوڭگەلەك ۇستەل اياسىندا قر پرەزيدەنتى مۇراعاتى 1928-1940 جىلدارداعى قۇندى تاريحي قۇجاتتار كورمەسىن, «عىلىم ورداسىنىڭ» ورتالىق عىلىمي كىتاپحاناسى لاتىن قارپىندەگى سيرەك كىتاپتار كورمەسىن ۇيىمداستىردى. ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور زيابەك قابىلدينوۆ ءوز سوزىندە: «قر پرەزيدەنتى نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قازاقستاننىڭ الەمدەگى ەڭ دامىعان 30 ەلدىڭ قاتارىنا قوسىلۋ ءۇشىن, مىقتى, ءارى جاۋاپكەرشىلىگى جوعارى ءبىرتۇتاس ۇلت بولۋ ءۇشىن رۋحاني جاڭعىرۋىمىزعا, ۇلتتىق بىرەگەيلىگىمىزى ساقتاۋىمىزعا ءجون سىلتەپ وتىر. رۋحاني جاڭعىرۋعا نىق قادام جاساپ, بولاشاققا سەنىممەن بەت الۋ ءۇشىن الداعى ۋاقىتتا قولعا الاتىن مىندەتتەردى دە سارالاپ بەردى. ولاردىڭ اراسىندا تاياۋ جىلدارى جۇزەگە اسىرۋعا كىرىسەتىن ناق جوبالاردىڭ اراسىندا – قازاق جازۋىن لاتىن ارپىنە كوشىرۋ ماسەلەسى. ەلباسىمىز «لاتىنشاعا كوشۋدىڭ تەرەڭ لوگيكاسى بار. بۇل قازىرگى زامانعى تەحنولوگيالىق ورتانىڭ, كوممۋنيكاتسيانىڭ, سونداي-اق, ءححى عاسىرداعى عىلىمي جانە ءبىلىم بەرۋ پروتسەسىنىڭ ەرەكشەلىكتەرىنە بايلانىستى» دەپ كورسەتە كەلە, ماقالاسىندا قازاق ءالىپبيىنىڭ جاڭا گرافيكاداعى بىرىڭعاي ستاندارتتى نۇسقاسىن قابىلداۋ, ەكى جىل مەرزىم ارالىعىندا وسى ماسەلەگە قاتىستى ۇيىمداستىرۋ جانە ادىستەمەلىك جۇمىستار جۇرگىزۋدى جۇكتەگەن ەدى. سوندىقتان ەلىمىزدىڭ رۋحاني جاڭعىرۋىنىڭ نەگىزى بولىپ تابىلاتىن لاتىن الىپبيىنە قاتىستى حالىق اراسىندا كەڭىنەن ءتۇسىندىرۋ جۇمىستارىن جۇرگىزىپ, قولداۋ ءبىلدىرۋ قاي-قايسىمىزدىڭ دا پارىزىمىز» دەدى.
جيىنعا جينالعاندار جاھاندانۋ ۇردىسىندەگى لاتىن ءالىپبيىنىڭ قولدانىس اياسىنىڭ ماڭىزى, لاتىن الىپبيىنە كوشۋ جولدارى مەن ەنگىزۋ جولدارى, تاريحي تامىرلارى مەن الەمدىك تاجىريبەسى, لاتىن ءالىپبيىنىڭ مۇمكىندىكتەرى مەن بولاشاعى تۋراسىنداعى ماسەلەلەردى تالقىلاي وتىرىپ, لاتىنعا كوشۋ جونىندەگى پرەزيدەنتتىك باستاماعا تولىقتاي قولداۋ كورسەتەتىندەرىن جەتكىزدى, سونداي-اق, جاڭا الىپبيدە پايدالانىلاتىن ارىپتەردى دۇرىس تاڭداۋ جونىندەگى ءوز ۇسىنىستارى مەن تىلەكتەرىن ورتاعا سالدى.
ميرا بايبەك,
«ەگەمەن قازاقستان»
الماتى
