ازەربايجاننان كەلگەن وكىل حافيز دجابباروۆتىڭ ايتۋىنشا, مۇنداي ورتاق وقۋلىق تۇركى جاستارىن جاقىنداستىرا تۇسەدى. سونىمەن قاتار ول وسكەلەڭ ۇرپاق اراسىنداعى ساباقتاستىق قانات جاياتىنىنا سەنىمىن ءبىلدىردى. «ەڭ اۋەلى القالى جيىندى ۇيىمداستىرعان تۇركى اكادەمياسىنا العىس ايتامىن. ورتاق تاريح وقۋلىعى جوباسى ارقىلى اتا-بابا تاريحىن ۇرپاققا جالعاستىرامىز. بۇل كىتاپ ارقاسىندا كەيىنگى بۋىن ءوزارا ەكونوميكالىق, مادەني قارىم-قاتىناسىن ودان ءارى بايلانىستىرا تۇسەدى. جاھاندانۋ داۋىرىندە تۇركى جاستارىنىڭ ىنتىماقتاستىعى كەڭەيە تۇسەدى دەپ ۇمىتتەنەمىن», ‒ دەگەن عازيز دجابباروۆ ساراپشىلار مەن ۇيىمداستىرۋشىلارعا العىسىن ايتتى.
ەرجيەس ۋنيۆەرسيتەتىنىڭ پروفەسسورى جەۆدەت كىرپىكتىڭ سوزىنە سۇيەنسەك, تۇركى مەملەكەتتەرىنىڭ ىنتىماقتاستىعى الداعى ۋاقىتتا دا جالعاسا بەرەدى. مۇنداي تاريحي ساتكە ىرزالىعىن بىلدىرگەن ج.كىرپىك جاڭا وقۋلىق جاستاردى جاقىنداستىراتىنىن تىلگە تيەك ەتتى. «پرەزيدەنت نۇرسۇلتان نازارباەۆتىڭ باستاماسىمەن قولعا الىنعان بۇل جوبا مەنى قاتتى تەبىرەنتتى. ءتۇبى ءبىر تۇركى حالىقتارىنا ورتاق كىتاپ جازىلعانىنا وتە قۋانىشتىمىن. ءبىر كەزدەرى تۇركى ءداۋىرى دەگەن زامان بولعان. الداعى ۋاقىتتا تۇركى عاسىرى بولاتىنىنا سەنىمدىمىن. ورتاق تۇركى تاريحىنىڭ جازىلۋىنىڭ تيىمدىلىگىن سوزبەن ايتىپ جەتكىزۋ مۇمكىن ەمەس. وسىنداي باستاما ارقىلى جاستار ءبىر-ءبىرىن جاقىن تاني ءتۇسىپ, قۋانىشى مەن قايعىسىن بولىسەدى دەگەن سەنىم زور. بۇل جوباعا قاتىسقاندارعا العىسىم شەكسىز. ولاردىڭ ەڭبەگى بوسقا كەتپەيتىنى انىق. مۇنداي جوبالار باسقا سالالاردا جالعاساتىنىنا سەنىم مول», ‒ دەپ اتاپ ءوتتى ج. كىرپىك.
اباي اسانكەلدى ۇلى,
"ەگەمەن قازاقستان"
