قازىرگى تاڭدا ءبىزدىڭ جوو وسى ماڭىزدى قۇجاتقا سايكەس كوپتەگەن يگى شارالار جوسپارلاپ, ءبىلىم الۋشىلاردىڭ عىلىم مەن بىلىمگە باستاعان جۇمىستارىنا مۇرىندىق بولىپ وتىر.
وسى وقۋ جىلى جاستاردى عىلىمعا باۋلۋ ماقساتىندا ءاربىر فاكۋلتەت ستۋدەنتتەرى اراسىندا ىرگەلى زەرتتەۋلەرىن قارجىلاندىرۋ ءۇشىن ارنايى بايقاۋ ۇيىمداستىرىلدى. ۋنيۆەرسيتەتىمىزدىڭ عىلىمي كەڭەسىنىڭ شەشىمىمەن ءساۋىر ايىندا فيزيكا-تەحنيكا فاكۋلتەتى ەكىنشى كۋرس ستۋدەنتتەرىنىڭ «اققىش سۇيىق ءونىمدى وڭدەۋدىڭ جاڭا يننوۆاتسيالىق ءادىسى» اتتى جاڭا تاقىرىپتاعى جوباسى جەڭىس تۇعىرىنان تابىلا ءبىلدى. ارينە, بۇل تۇستا جوباعا جەتەكشىلىك جاساپ ءارى باعىت بەرگەن فاكۋلتەتىمىزدىڭ جاس عالىمى, فيلوسوفيا دوكتورى (PhD), 2016 جىلدىڭ «جوعارى وقۋ ورنىنىڭ ۇزدىك وقىتۋشىسى» مەملەكەتتىك گرانتىنىڭ يەگەرى ايانبەرگەن قايىربەك ۇلىنىڭ ەڭبەگىن ەرەكشە ايتۋىمىزعا بولادى. كەشەگى ستۋدەنت, بۇگىنگى جاس عالىم ايانبەرگەن ءوزىنىڭ العان بىلىمىمەن جاستار اراسىندا ءاردايىم ءبولىسىپ جۇرەدى.
سونىمەن بىرگە توپتاعى ءاربىر ستۋدەنت وسى جىلدىڭ اياعىنا دەيىن باسپادان ماقالالار شىعارىپ, زەرتتەۋ جۇمىستارىن تولىققاندى ورىنداپ قانا قويماي, اي سايىن ۋنيۆەرسيتەت تاراپىنان قوسىمشا شاكىرتاقى الىپ وتىراتىن بولدى. بۇل باستاما جاستاردى عىلىم شىڭىنا جەتەلەپ, ولاردىڭ وسى جولدا قاجىرلى ەڭبەك ەتۋلەرىنە ءوز ۇلەسىن قوساتىنى ءسوزسىز.
سونىمەن قاتار ستۋدەنت جاستاردىڭ ويلارىن تولىق ىسكە اسىرۋ جولىندا 2014 جىلدان بەرى اتالعان فاكۋلتەتتە ار-نايى «ستۋدەنتتەردىڭ جوبالاۋ-كونسترۋكتورلىق بيۋروسى» دا جۇمىستارىن جۇرگىزىپ كەلەدى. ءبىراز شارۋلار جۇزەگە اسىرىلىپ, ستۋدەنتتەر ءوز قولدارىمەن جاساعان اسپاپتارىن ۇسىنا باستادى. اتالعان ۇجىمدا جۇمىس بەس باعىت بويىنشا قولعا الىنعان. ءبىرىنشى باعىتتا قۇبىرلاردىڭ ىشىندە پايدا بولعان قاتتى قاقتاردى تازارتۋعا ارنالعان قوندىرعى دايىندالسا, ەكىنشى باعىت – «روبوتوتەحنيكا» سالاسى. ارنايى قىزمەت اتقاراتىن روبوتتار قۇراستىرىلۋدا. ال ءۇشىنشى باعىت بويىنشا جەر استىندا ورنالاسقان جىلۋ قۇبىرلارىنىڭ تەسىلىپ, ىستەن شىعۋ جولدارىن الدىن الا بايقاۋعا بولاتىن اسپاپ جاسالدى. اۋىل شارۋاشىلىعىنا وتە قاجەت بيداي ونىمدەرىنىڭ ىلعالدىلىعىن جىلدام ۋاقىتتا انىقتايتىن قازاقستاندىق اسپاپ ءتورتىنشى باعىت بويىنشا جۇمىسىن جاساۋدا. ال سوڭعى بەسىنشى باعىتتا جەل ەنەرگياسىن وتە ءتيىمدى پايدالاناتىن جانە جەلدىڭ از جىلدامدىعىندا جۇمىس ىستەي الاتىن ماگنۋس ەففەكتىسىنە نەگىزدەلگەن جەل ەلەكتر گەنەراتورىنىڭ تاجىريبەلىك نۇسقاسى دايىندالدى. بۇل نۇسقا ەكسپو-2017 حالىقارالىق ارنايى كورمەسىنە دە ۇسىنىلدى.
وسى جوعارىدا ايتىلعان ماسەلەلەردىڭ بارلىعى ءبىزدىڭ ۋنيۆەرسيتەتىمىزدىڭ تاراپىنان ءبىلىم الامىن دەپ كەلگەن جاستارعا كورسەتىلىپ جاتقان قولداۋدى بىلدىرەدى. ءاربىر اشىلعان جاڭالىققا جۇمسالعان قاراجات ەرتەڭ ەسەلەپ قايتاتىندىعى انىق. بۇل پرەزيدەنتىمىز ەلباسى ن.نازارباەۆتىڭ ايقىنداپ بەرگەن باسەكەگە قابىلەتتىلىك پەن ءبىلىمنىڭ سالتانات قۇرۋىنا اكەلەدى.
قارمۋ عالىمدارى ەلباسىنىڭ «قازاقستان-2050» ستراتەگياسىندا باياندالعانداي, لاتىن الىپبيىنە كوشۋ باعىتى بويىنشا دا ارنايى وقۋلىقتار مەن وقۋ قۇرالدارىن دايىنداۋ ماسەلەلەرىنە قارقىندى تۇردە كىرىسە باستادى.
جاستار ارقاشان جاڭاشىلدىققا جاندارى جاقىن ادامدار. ولار باسەكەگە قابىلەتتى بولۋ ءومىر تالابى ەكەنىن تەرەڭ تۇسىنەدى. ءبىز تەك قانا بۇگىنگى كۇننىڭ جەتىستىگىمەن شەكتەلىپ قالۋعا ءتيىستى ەمەسپىز. ەگەر ءاربىر مامان ءوز سالاسىندا بىلىكتى ءارى ءبىلىمدى ءىزباسارلارىن دايىنداسا, ول – ۇلكەن تابىس.
بەكبولات نۇسىپبەكوۆ,
ە.بوكەتوۆ اتىنداعى قارمۋ-دىڭ فيزيكا-تەحنيكالىق فاكۋلتەتىنىڭ دەكانى, تەحنيكا عىلىمدارىنىڭ كانديداتى
قاراعاندى وبلىسى
