ەكى كۇنگە سوزىلعان مەرەيتويلىق شارالار 22 قىركۇيەك كۇنى رەسپۋبليكالىق اقىندار ايتىسىنان باستالىپ, بەس ساعاتقا جۋىق ۋاقىتقا سوزىلعان ءسوز سايىسىنىڭ باس جۇلدەسىن قىتاي حالىق رەسپۋبليكاسىنان كەلگەن ساياگۇل بىرلەسبەكقىزى يەلەنگەن بولاتىن. بۇل تۋرالى گازەتىمىزدىڭ سايتىندا جازعان بولاتىنبىز. ال ەكىنشى كۇنگى مەرەيتويلىق شارالاردىڭ شىمىلدىعى اقىن دۇنيەگە كەلگەن, ەڭبەك ەتكەن قاراعايلى اۋىلىنداعى تۇلعا اتىنداعى مەكتەپتە ء«وز ءداۋىرىنىڭ ءۇنى بولعان اقىن» اتتى عىلىمي-تاجىريبەلىك كونفەرەنتسيامەن ءتۇرىلدى.
تاعىلىمدى شارا بارىسىندا ابايتانۋشى اسان وماروۆ, اۋداندىق «بەسقاراعاي تىنىسى» گازەتىنىڭ باس رەداكتورى اسىلبەك قوجاحمەتوۆ پەن اقىننىڭ كوزىن كورگەن زامانداستارى تاعدىرى تالايلى تۇلعا جايىندا ەستەلىكتەرىن ايتتى.
«تامىرسىز دۇنيە بولمايدى. ءبىزدىڭ تامىرىمىز ابايدا جاتىر. ابايدى بەكەرگە ايتىپ وتىرعان جوقپىن. نۇرلىبەك اقىن دا ابايدىڭ شاكىرتتەرىنىڭ ءبىرى. بۇل كىسىنىڭ اقيقات پەن ادىلدىكتى جىرلاۋى, قازاقتى ونەر, بىلىمگە شاقىرعانى, شارشاماي, تالماي جۇرتتىڭ قامىن ويلاعانى دانىشپاننىڭ شاكىرتى ەكەندىگىن كورسەتەدى», - دەدى اسان وماروۆ.
كونفەرەنتسيا اياسىندا «نۇرلىبەك بايمۇراتوۆ» اتتى جيناقتىڭ تۇساۋكەسەر ءراسىمى ءوتىپ, اقىن تۋرالى دەرەكتى فيلم جۇرتشىلىقتىڭ نازارىنا ۇسىنىلدى. جاستايىنان اقىننىڭ جىرىن تىڭداپ وسكەن, 13 قۇرساق كوتەرگەن, «التىن القا» يەگەرى بالكۇمىس سولتانبەكقىزى نۇرلىبەك بايمۇراتوۆقا ارناعان تولعاۋىن دا كوپشىلىك جىلى قابىلدادى. كونفەرەنتسيادان كەيىن مەرەيتويعا كەلگەن قاۋىم مەكتەپتەگى اقىن مۇراجايىن ارالاپ, ءبىلىم ورداسى الدىنداعى نۇرلىبەك بايمۇراتوۆ ءبيۋستىنىڭ اشىلۋ سالتاناتىن تاماشالادى.
ء«بيىل بىزدىڭ اۋدان ءۇشىن ەرەكشە جىل بولدى. ويتكەنى, بيىل اۋدانىمىزدىڭ عانا ەمەس, وبلىسىمىزدىڭ, ەلىمىزدىڭ ماقتانىشى دەۋگە تۇرارلىق داۋىلپاز اقىن نۇرلىبەك بايمۇراتوۆتىڭ 130 جىلدىق مەرەيتويى. ءبىز بيىلعى جىلدى اۋدانىمىزدا «نۇرلىبەك بايمۇراتوۆ جىلى» دەپ جاريالاپ, قاڭتار ايىنان باستاپ كوپتەگەن ءىس-شارالار وتكىزدىك. وسى رەتتە اقىن ەسىمى ۇمىتىلۋعا شاق قالعاندا بوزتورعايداي شىرىلداپ 110 جىلدىعىن وتكىزىپ, مەكتەپكە ەسىمىن بەرگىزىپ, دارا تۇلعانىڭ داڭقىن اسىرعان ءۋاليحان تۇكىسوۆ پەن توقتاعان كاكەنوۆ اعالارىمىزعا اۋدان جۇرتشىلىعى اتىنان ەرەكشە العىسىمدى بىلدىرگىم كەلەدى. ءدۇلدۇل اقىننىڭ مەرەيتويى قۇتتى بولسىن», - دەدى بەسقاراعاي اۋدانى اكىمىنىڭ مىندەتىن اتقارۋشى ەربولات راحمەتۋللين ءبيۋستىڭ اشىلۋ سالتاناتىندا سويلەگەن سوزىندە.
اقىن مەرەيتويىنا ارنالعان ەكى كۇندىك شارالار ات بايگەسىمەن تۇيىندەلدى.
ازامات قاسىم,
«ەگەمەن قازاقستان»
شىعىس قازاقستان وبلىسى, بەسقاراعاي اۋدانى.
سۋرەتتەردى تۇسىرگەن - اۆتور
