وسى مەرەكە قارساڭىندا وسكەمەندە «شىعىس قازاقستان وبلىسى كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ ۇيىمداستىرۋىمەن «كاسىپوداقتار ەڭبەك ادامىنىڭ قۇقىن قورعاۋ جولىندا» اتتى وبلىستىق كونفەرەنتسيا ءوتتى. كونفەرەنتسيا اياسىندا وتكەن سەكتسيالاردا وڭىرىمىزدەگى كاسىپورىنداردا وندىرىستىك كەڭەستەردى قۇرۋ, كەلىسىم كوميسسيالارىنىڭ جۇمىسى مەن ەڭبەك داۋلارىن مەدياتسيانى قولدانۋ ارقىلى شەشۋ ماسەلەلەرى جان-جاقتى تالقىلاندى. وبلىستىڭ تۇكپىر-تۇكپىرىنەن كەلگەن كاسىپوداق وكىلدەرى, زاڭگەرلەر مەن ادۆوكاتتار ءوزارا پىكىر الماسىپ, ويلارىن ورتاعا سالدى.
بۇگىندە ءوندىرىستى ءوڭىر سانالاتىن شىعىس قازاقستاندا ەڭبەككە قابىلەتتى ادامداردىڭ سانى 700 مىڭنان اسىپ جىعىلادى. ونىڭ 250 مىڭعا جۋىعى وبلىستاعى ءىرى جانە ورتا كاسىپورىنداردا جۇمىس ىستەسە, سونىڭ 157 مىڭى كاسىپوداقتارعا مۇشە كورىنەدى. ايماقتا الەۋمەتتىك جانە ەڭبەك قاتىناستارىن رەتتەۋ ماقساتىندا ءۇش جاقتى كوميسسيا جۇمىس ىستەيدى.
«بۇل كوميسسيانىڭ جۇمىسى ءوزىنىڭ تيىمدىلىگىن كورسەتىپ وتىر. ماسەلەن, وڭىردەگى ءوندىرىس ورنىنىڭ بىرىندە 200 قىزمەتكەرگە قىسقارۋ قاۋپى تونگەندە ءۇش جاقتى كوميسسيا كومەككە كەلىپ, قالاداعى 24 كاسىپورىننىڭ قاتىسۋىمەن ەڭبەك جارمەڭكەسىن ۇيىمداستىرىپ, ناتيجەسىندە بارلىق جۇمىسشىلار ەكى قولعا ءبىر كۇرەك تاپتى. 2015 جىلى وبلىستا جالاقى بويىنشا قارىز 1 ميلليارد تەڭگەگە جەتكەنىمەن, الەۋمەتتىك سەرىكتەستىك ارقىلى قارىزدىڭ ءبارىن قايتارۋعا قول جەتكىزىلدى», - دەدى «شىعىس قازاقستان وبلىسى كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ ءتورايىمى ايجان سادىقوۆا كونفەرەنتسيادا سويلەگەن سوزىندە.
بىرلەستىك ءتورايىمى سونىمەن قاتار شىعىس قازاقستان وبلىسى ۇجىمدىق كەلىسىمشارتتارعا وتىرۋ بويىنشا رەسپۋبليكادا العاشقى بەستىككە ەنىپ وتىرعانىن, الداعى ءبىر اي كولەمىندە وڭىردە جۇمىسكەرلەردىڭ قۇقىعىن قورعاۋدىڭ تيىمدىلىگىن ارتتىرۋ ءۇشىن ارنايى مەتوديكالىق كابينەت اشىلاتىنىن, بۇل كابينەت كاسىپوداقتىڭ بارلىق مۇشەلەرىنە قولجەتىمدى بولاتىنىن جەتكىزدى. مەرەكەلىك شارا سوڭىندا ايجان سادىقوۆا جينالعانداردى ەڭبەك كۇنى مەيرامىمەن قۇتتىقتاپ, بىرنەشە ادامعا قازاقستان كاسىپوداقتارى فەدەراتسياسىنىڭ بەلگىسى مەن قۇرمەت گراموتالارىن سالتاناتتى تۇردە تابىس ەتتى.
ازامات قاسىم,
«ەگەمەن قازاقستان»
وسكەمەن
سۋرەتتى تۇسىرگەن - اۆتور
