تاتۋلىق پەن تۇراقتىلىق – قوعام ءومىرىنىڭ ىرگەتاسى, وسى ەكى ۇعىم ورنىققان ەلدە دامۋ بار, وركەندەۋ بار. تاۋەلسىزدىك العاننان كەيىن بار بولعانى 25 جىل وتكەندە قازاقستاننىڭ الەمنىڭ وزىق دامىعان 30 مەملەكەتىنىڭ قاتارىندا بولۋعا ۇمتىلۋى, بىرقاتار ەكونوميكالىق كورسەتكىشتەر بويىنشا قازىردىڭ وزىندە بۇل مەجەگە جەتۋى – ەڭ الدىمەن وسى تاتۋلىق پەن تۇراقتىلىقتىڭ ارقاسىندا. بۇل رەتتە ەلباسىمىز, قازاقستان حالقى اسسامبلەياسىنىڭ توراعاسى ن.ءا.نازارباەۆ جۇرگىزىپ وتىرعان ەتنوساياساتتىڭ ارقاسىندا رەسپۋبليكامىزدا ەكونوميكالىق تۇراقتىلىق پەن ۇلتارالىق كەلىسىم ورنىقتى دەپ ايتا الامىز.
قازاق جەرىندەگى تاتۋلىق پەن تۇراقتىلىقتىڭ تامىرى تەرەڭدە جاتىر. ءبىزدىڭ حالقىمىز قۋعىندالعان, جاپا شەككەن مىڭ سان ادامدى باۋىرىنا باسىپ, ءوزىنىڭ قانشالىقتى كەڭ پەيىلدى, بەيبىت نيەتتى, مەيىربان ەل ەكەنىن الەمگە پاش ەتتى. ەندى الەم حالقى وسىنداي «عاجايىپ ەلدى» كورۋگە قۇشتار. ەكسپو-عا كەلگەن, اسسامبلەيا وتكىزگەن ءىس-شارالارعا قاتىسقان قوناقتار سولاي دەيدى.
گەرمان بۋندەستاگىنىڭ دەپۋتاتى, فەدەرالدىق ۇكىمەتتىڭ قونىس اۋدارۋشىلار مەن از ۇلتتار ىستەرى جونىندەگى ۋاكىلى ح.كوشيك, رەسەي نەمىستەرى وداعىنىڭ فەدەرالدىق توراعاسى ۆ.ايزەنبراۋن, كونراد ادەناۋەر قورىنىڭ قازاقستانداعى وكىلدىگىنىڭ ديرەكتورى ت.حەلم, پولشا پرەزيدەنتى اندجەي دۋدانىڭ جۇبايى اگاتا كورنحاۋسەر-دۋدا, تاعى باسقالار ەتنومادەني بىرلەستىكتەر قىزمەتىمەن تانىسىپ, اسەر الىپ, كوكەيلەرىنە كوپتەگەن وي تۇيگەندەرىن ايتتى.
ەكسپو كورمەسى اياسىندا ن.نازارباەۆتىڭ قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلىن تانىستىرۋعا ارنالعان ءىس-شارالاردىڭ ءتۇرلى فورماتتا وتكىزىلۋى – ءبىزدىڭ ەلدە قوعامدىق كەلىسىم ءومىردىڭ بار سالاسىندا تابيعي تۇردە قالىپتاسقان قۇبىلىس ەكەنىن تانىتۋ ءۇشىن ۇتىمدى ويلاستىرىلعان امال. ايتالىق, وتكەن جەكسەنبىدە, بەيبىتشىلىك پەن كەلىسىم سارايىندا قازاقستان حالقى اسسامبلەياسىنىڭ ۇيىمداستىرۋىمەن ء«بىز – قازاقستان حالقىمىز» اتتى فەستيۆال ءوتتى.
تاۋەلسىزدىگىمىزدىڭ العاشقى كۇندەرىنەن-اق قوعامدا ۇلتارالىق جانە كونفەسسياارالىق كەلىسىمدى ورناتۋدى باستى بايلىعىمىز دەپ جاريا ەتكەن ەلباسى وسى ۇستانىمنىڭ بەرىك ورناۋىن تالاپ ەتتى. بۇگىندە قازاق ەلىنىڭ بايتاق جەرى وزگە ۇلت وكىلدەرى ءۇشىن بىرەگەي شاڭىراققا اينالدى. ولار قازاقستاندى «وتانىم» دەپ تانىسا, انا تىلىمىزدە ءان شىرقاسا – بۇل ەڭ الدىمەن قازاقتىڭ مەرەيى ەمەس پە!
ءبىر جاقسىسى, فەستيۆالدىڭ ءار نومىرىنەن ەلىمىزدەگى مەملەكەتتىك ءتىلدى يگەرۋ ساياساتى كورىنىس تاۋىپ جاتتى. تاتارشا, ورىسشا, ۇيعىرشا ايتىلعان اندەردىڭ وزىندە مەملەكەتتىك تىلدەگى ماتىنگە باسىمدىق بەرىلگەن. باسقا ەتنوستار وكىلدەرىنىڭ قازاقتىڭ ۇلتتىق اسپاپتارىندا ويناۋى دا بۇرىنعى جىلدارعا قاراعاندا كوبىرەك بولدى. ال «احىسقا» تۇرىك ەتنومادەني بىرلەستىگىنىڭ مۇشەسى سابىر گۋسەينوۆ دومبىرادا ءوزى شىعارعان «ۇشقوڭىر» اسپاپتىق كومپوزيتسياسىن ورىنداپ, كورەرمەن ىقىلاسىنا بولەندى.
اقتوبەلىك «Veilchen» نەمىستەر حورى «اقتوبەم» ءانىن, «تاۆروس» ارميان ەتنومادەني بىرلەستىگىنىڭ ءانشىسى ليانا پلۋزيان «اتىراۋ-ارمان» ءانىن, وزبەك ونەرپازى نودير حالمەتوۆ «شىمقالا» ءانىن, كورەيلەردىڭ «چەن-ريۋ» ەتنومادەني بىرلەستىگىنىڭ حورى «استانا كەشى» ءانىن قازاق تىلىندە ورىنداۋى جينالعاندارعا ەرەكشە اسەر ەتتى.
جامبىل وبلىسىنداعى دۇنگەن ەتنومادەني بىرلەستىگىنەن كەلگەن «يۋنچي» دومبىراشىلار تريوسىنىڭ ورىنداۋىنداعى «كونە تاراز» كومپوزيتسياسى ەشكىمدى بەيجاي قالدىرمادى. كۇمبىرلەگەن دومبىرا ءۇنى مەن كۇمبەزدى سارايلاردى, كەرۋەن كوشىن كورسەتكەن بەينەبايان ۇشتاسىپ, زالدىڭ ءىشىن ەجەلگى داۋىردەن جەتكەندەي سيقىرلى اۋەن باۋراپ الدى. دەگەنمەن, پاۆلودارلىق «حالكانبارت» چەشەن-ينگۋش ەتنومادەني بىرلەستىگىنىڭ «يللي» ۆوكالدىق توبى مەن «دايموحك» حورەوگرافيالىق ءانسامبلى فەستيۆالدىڭ كوركى بولدى دەسەك, اسىرا ايتقانىمىز ەمەس.
شەتەلدىك قوناقتارىمىز فەستيۆال ارقىلى قازاقستان حالقىنىڭ بىرلىگى مەن مادەني ارالۋاندىعىنىڭ ەرەكشەلىكتەرىن تانىسا, قالا تۇرعىندارى, ءوز وتانداستارىمىز ادەمى ءان تىڭداپ, سەرگىپ, ء«بىز – قازاقستان حالقىمىز» دەپ سەرپىلىپ قايتتى.
كامال الپەيىسوۆا,
قازاقستان پرەزيدەنتى جانىنداعى «قوعامدىق كەلىسىم» رمم باس ساراپشىسى
