مەملەكەت باسشىسى كەزدەسۋ بارىسىندا ەكىجاقتى ىنتىماقتاستىق اياسىن كەڭەيتىپ, باۋىرلاستىققا نەگىزدەلگەن قارىم-قاتىناستى ودان ءارى نىعايتۋ قاجەتتىگى جونىندە ايتتى.
– قازىر قىرعىزستان ەل پرەزيدەنتىن سايلاۋ ناۋقانى الدىندا تۇر. بۇل – كەز-كەلگەن مەملەكەت ءۇشىن اسا ماڭىزدى كەزەڭ. مەن قىرعىزستاننىڭ تاۋەلسىزدىك العاننان بەرگى بارلىق پرەزيدەنتتەرىمەن جەمىستى جۇمىس جاساۋعا تىرىستىم. قىرعىز حالقى سەنىم ءبىلدىرىپ, جاڭادان سايلايتىن كەلەسى پرەزيدەنتپەن دە ءوزارا ءتيىمدى ءىس-قيمىل قالىپتاستىراتىن بولامىز, – دەدى نۇرسۇلتان نازارباەۆ.
مەملەكەت باسشىسى قازاقستان مەن قىرعىزستان حالىقتارىنىڭ اراسىنداعى بىرلىك پەن دوستىقتىڭ ماڭىزدىلىعىنا نازار اۋداردى.
– ارامىزدا بولىسكە تۇسەتىن ەشتەڭە جوق. ءبىز باۋىرلاس قىرعىز حالقىنا ءاردايىم قولداۋ كورسەتىپ كەلەمىز جانە وعان الداعى ۋاقىتتا دا كومەك بەرۋگە ءازىرمىز. بۇل – كولىك-ترانزيت سالاسىنداعى ىنتىماقتاستىق پەن ەۋرازيالىق ەكونوميكالىق وداق اياسىنداعى ءوزارا ىقپالداستىققا قاتىستى ماسەلە, – دەدى قازاقستان پرەزيدەنتى.
ءو.بابانوۆ قىرعىز حالقى نۇرسۇلتان نازارباەۆتىڭ بىتىمگەرلىك جولىنداعى كۇش-جىگەرىن جوعارى باعالاپ, ونى قولدايتىنىن اتاپ ءوتتى.
– مەن قىرعىزستاننىڭ پرەمەر-ءمينيسترى قىزمەتىندە بولعان كەزدە ەلدەرىڭىز بىزگە تۇراقتى تۇردە جان-جاقتى قولداۋ كورسەتتى. ءبىز باۋىرلاس قازاقستان حالقىنىڭ بارلىق جەتىستىكتەرىنە قۋانامىز, – دەدى قىرعىز رەسپۋبليكاسىنىڭ پرەزيدەنتتىگىنە كانديدات.
