ەرلان ساعاديەۆ قر بعم جانىنان ەكسپو-2017 كورمەسىنىڭ قورىتىندىسى بويىنشا جاڭا «جاسىل» تەحنولوگيالاردى ەنگىزۋ بويىنشا جۇمىس توبى قۇرىلعانىن باياندادى.
ساراپتاۋ جۇمىس توبى حالىقارالىق پاۆيلوندارداعى جاڭا تەحنولوگيالارعا مونيتورينگ جۇرگىزدى. بارلىق تەحنولوگيالار مۇناي جانە گاز, كومىر ونەركاسىبى, اتوم ونەركاسىبى, ەلەكتر ەنەرگەتيكاسى, ەنەرگيانى ۇنەمدەۋ, قالدىقتاردى باسقارۋ, جاڭعىرتىلاتىن ەنەرگەتيكا, اۋا ساپاسىن باقىلاۋ جانە ت.ب. سياقتى باعىتتار بويىنشا ىرىكتەلدى.
قازىردىڭ وزىندە قازاقستاندىق جانە شەتەلدىك ۋنيۆەرسيتەتتەرمەن ىنتىماقتاستىق ورناتۋ تۋرالى توعىز مەموراندۋمعا قول قويىلدى. اتاپ ايتقاندا, كورەيا, لاتۆيا, ۆەنگريا, فرانتسيا, پولشا, قحر, ۇلىبريتانيا, يسپانيا جانە باسقا ەلدەردىڭ جوعارى وقۋ ورىندارى ءوزارا ىنتىماقتاستىق ورناتۋعا نيەت ءبىلدىردى.
ءوز كەزەگىندە, ەنەرگەتيكانىڭ ءبىرىنشى ۆيتسە-ءمينيسترى ماحامبەت دوسمۇحامبەتوۆتىڭ ايتۋىنشا, ەنەرگەتيكا مينيسترلىگى سونداي-اق «ەكسپو-2017» كورمەسىندە ۇسىنىلعان جاڭا تەحنولوگيالاردى قازاقستاندا قولدانۋ مۇمكىندىگى تۋرالى ۇسىنىستاردى ازىرلەۋ بويىنشا ساراپتاۋ جۇمىس توبىن قۇردى.
«12 قىركۇيەكتە كومپانيالار مەن ۇيىمداردىڭ وكىلدەرىمەن كەڭەس ءوتتى, وندا ىرىكتەلگەن تەحنولوگيالاردى ەنگىزۋ تەتىكتەرى تالقىلاندى. تاڭدالعان تەحنولوگيالاردى ەنگىزۋ ۇدەرىسى ۇزاق جانە قر ەم ازىرلەگەن جول كارتاسىنا سايكەس ورىندالادى», — دەپ باياندادى م. دوسمۇحامبەتوۆ.
باقىتجان ساعىنتاەۆ ءوزىنىڭ ورىنباسارى ەربولات دوساەۆقا اتالعان ماسەلە بويىنشا قر بعم مەن قر ەم پىسىقتاۋلارىن قورىتىندىلاۋدى جانە جاڭا تەحنولوگيالاردى ەنگىزۋ بويىنشا بىرىڭعاي جول كارتاسىن جاساۋ مۇمكىندىگىن قاراستىرۋدى تاپسىردى.
