«ەكونوميكالىق ءوسۋ شىلدەدەگى ازعانا تومەندەۋدەن (4,0%) كەيىن الدىن الا باعالاۋ بويىنشا اعىمداعى جىلعى 8 ايدا 4,3 پايىزعا دەيىن جەدەلدەدى. سىرتقى ساۋدا 30 پايىزعا جۋىق ءوستى, ينفلياتسيا باسەڭدەپ, نىسانالى ءدالىز شەگىندە تۇر. وسىنىڭ اياسىندا Moody's جانە S&P رەيتينگتىك اگەنتتىكتەرى تاۋەلسىز نەسيەلىك رەيتينگتىك بولجامىن تەرىس كورسەتكىشتەن تۇراقتى كورسەتكىشكە جاقسارتتى», - دەدى ر.دالەنوۆ 2017 جىلعى قاڭتار-تامىزداعى الەۋمەتتىك-ەكونوميكالىق دامۋدىڭ قورىتىندىسىنا قاتىستى بايانداماسىندا.
ونىڭ سوزىنە قاراعاندا, ەكونوميكانىڭ شيكىزات ەمەس سەگمەنتىندەگى وڭ وزگەرىستەر بايقالدى. ماسەلەن, شيكىزات ەمەس سەكتور سالىمى نىعايعان, ول 2,3 پايىزدىق تارماقتى قۇراسا, ال شيكىزات سەگمەنتىنىڭ سالىمى 1,6 پايىزدىق تارماقتى قۇرادى.
ۆيتسە-ءمينيستردىڭ اتاپ وتۋىنشە, ءوسۋدىڭ جوعارى سەرپىنى التى بازالىق سالانىڭ تورتەۋى بويىنشا (ونەركاسىپ, ساۋدا, كولىك جانە قويمالاۋ, اقپارات جانە بايلانىس) بايقالۋدا, ءوسۋ قارقىنىنىڭ باسەڭدەۋى قۇرىلىستا جانە اۋىل شارۋاشىلىعىندا ورىن الدى.
بۇدان بولەك, وڭىرلىك بولىنىستە وڭىرلەردىڭ كوپشىلىگىندە نەگىزگى كورسەتكىشتەر بويىنشا وڭ ءوسۋ سەرپىنى بايقالىپ وتىر. ماسەلەن, اۋىل شارۋاشىلىعىندا بارلىق وڭىرلەردە 0,3%-دان 5,6%-عا دەيىن ءوسۋ بولدى.
«سونىمەن قاتار ماڭعىستاۋ جانە قىزىلوردا وبلىستارى بويىنشا ونەركاسىپتە جانە قۇرىلىستا تومەندەۋ تىركەلدى. قاراعاندى جانە الماتى وبلىستارى بويىنشا قۇرىلىستا جانە نەگىزگى كاپيتالعا سالىنعان ينۆەستيتسيالاردا تومەندەۋ ورىن الىپ وتىر», - دەپ توقتالدى ول.
مۇنىمەن قوسا, سولتۇستىك قازاقستان مەن شىعىس قازاقستان وبلىستارىندا تەك ءبىر-ءبىر كورسەتكىش بويىنشا تومەندەۋ عانا بايقالىپ وتىر, تيىسىنشە قۇرىلىستا - 8,6%-عا جانە نەگىزگى كاپيتالعا سالىنعان ينۆەستيتسيالاردا - 7,2%-عا تومەندەگەن.
