پرەزيدەنت اكىمشىلىگى, كونستيتۋتسيالىق كەڭەس, جوعارعى سوت, باس پروكۋراتۋرا, ەقىۇ-نىڭ استاناداعى باعدارلامالار كەڭسەسىنىڭ باسشىسى جانە ءال-فارابي اتىنداعى قازۇۋ ۇيىمداستىرعان ءىس-شارا جۇمىسىندا قىلمىستىق پروتسەستى قايتا جاڭعىرتۋ رەفورماسى شەڭبەرىندە تاجىريبەلىك ۇسىنىمداردى ازىرلەۋ ماسەلەسى تالقىلاندى.
«دوڭگەلەك ۇستەل» جۇمىسىنا قر پرەزيدەنتى اكىمشىلىگى باسشىسىنىڭ ورىنباسارى تالعات دوناقوۆ, كونستيتۋتسيالىق كەڭەس توراعاسى يگور روگوۆ, باس پروكۋرور جاقىپ اسانوۆ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى قايرات قوجامجاروۆپەن قاتار, ەقىۇ-نىڭ استاناداعى باعدارلامالار ورتالىعىنىڭ باسشىسى دەرد سابو, قازاقستان رەسپۋبليكاسىنداعى ادام قۇقىقتارى جونىندەگى ۋاكىل اسقار شاكىروۆ جانە وزگە دە مەملەكەتتىك ورگاندار مەن قۇرىلىمدار وكىلدەرى, زاڭگەر عالىمدار, حالىقارالىق ساراپشىلار, ادۆوكاتتار, قوعامدىق جانە قۇقىق قورعاۋ ۇيىمدارىنىڭ قىزمەتكەرلەرى قاتىستى.
جوعارعى سوت توراعاسى قايرات ءمامي جيىن قاتىسۋشىلارىنا ارناعان سوزىندە قازاقستاندىق سوت ءىسىن جۇرگىزۋ سالاسى تاۋەلسىزدىك جىلدارى قىلمىستىق پروتسەستىڭ كەڭەستىك مودەلىنەن بىرتىندەپ باس تارتقانىن, جاڭا قىلمىستىق-پروتسەستىك زاڭنىڭ جانە ۇلت جوسپارىندا كوزدەلگەن شارالاردىڭ ىسكە اسۋىمەن ازاماتتاردىڭ ءتيىمدى قورعالۋىن قامتاماسىز ەتۋ جانە قىلمىستىق پروتسەسس جازالارىن ازايتۋ بويىنشا ناقتى جۇمىستار اتقارىلعانىن اتاپ ءوتتى.
«دەي تۇرعانمەن, قىلمىستىق-پروتسەستىك كودەكستى رەفورمالاۋ پروتسەسى جالعاسۋدا. بۇل جۇمىس مەملەكەت باسشىسىنىڭ ايرىقشا باقىلاۋىندا. بۇگىندە قىلمىستىق پروتسەستى جاڭعىرتۋدىڭ نەگىزگى باسىمدىقتارى ايقىندالدى جانە ءتيىستى زاڭ جوباسىن ازىرلەۋ جۇمىسى جۇرگىزىلۋدە», – دەدى قايرات ابدىرازاق ۇلى.
باسقوسۋ بارىسىندا وزىق ەۋروپالىق ۇلگىگە, شەتەلدىك وزىق تاجىريبەگە سۇيەنە وتىرىپ, وتاندىق قىلمىستىق ادىلەت جۇيەسىن ودان ءارى دامىتۋدىڭ باعىتىن ايقىندالاتىنىن, الداعى ۋاقىتتا سوتقا دەيىنگى تەرگەۋ جانە انىقتاۋ ورگاندارىن ينستيتۋتسيونالدىق قايتا قۇرۋدا كەشەندى وزگەرىستەر ورىن الاتىنىن جەتكىزگەن قۇزىرلى ورگان وكىلدەرى سوت باقىلاۋى ينستيتۋتىن جەتىلدىرۋ بويىنشا جاريا ەمەس تەرگەۋ ارەكەتتەرىن سانكتسيالاۋعا قاتىستى سوت قۇزىرەتىن زاڭناما تۇرىندە بەكىتىلەتىنىن حابارلادى. اسىرەسە سوت سانكتسياسىنسىز قاماۋدا ۇستاۋ مەرزىمىن 48 ساعاتقا دەيىن قىسقارتۋ ادام قۇقىقتارىن ساقتاۋ تۇرعىسىنداعى ايتۋلى جاڭالىق ەكەنى راس.
سونىمەن قاتار, ەستونيا, گەرمانيا جانە وزگە دە بىرقاتار ەلدەردىڭ تابىستى تاجىريبەسى نەگىزىندە قىلمىستىق ارەكەتتەر بويىنشا بۇيرىقتىق ءىس جۇرگىزۋدىڭ قىسقارتىلعان ءتۇرى قولعا الىنىپ جاتقانى, رەفورما شەڭبەرىندە قىلمىستىق پروتسەستىڭ جارىسپالىلىعىن ارتتىرۋعا ايرىقشا نازار اۋدارىلاتىنى ءسوز بولعان كەزدەسۋ بارىسىندا قايرات ءمامي ازىرلەنەتىن زاڭ جوباسىنىڭ ساپاسى مەن رەفورمانىڭ ءساتتى جۇرگىزىلۋى كوبىنەسە وسى جۇمىسقا عىلىمي ورتانىڭ, حالىقارالىق جانە ۇكىمەتتىك ەمەس ۇيىمدار وكىلدەرىنىڭ, سونداي-اق شەتەلدىك ساراپشىلاردىڭ قاتىسۋىنا بايلانىستى ەكەندىگىنە توقتالدى.
جوعارعى سوت توراعاسى فورۋمدا ءسوز سويلەگەن شلەزۆيگ-گولشتەين ۋچاسكەلىك سوتىنىڭ توراعاسى, حالىقارالىق قۇقىقتىق ىنتىماقتاستىقتىڭ گەرمان قورىنىڭ ساراپشىسى ر.ميۋللەر, حالىقارالىق قۇقىقتىق ىنتىماقتاستىقتىڭ گەرمانيالىق قورىنىڭ ساراپشىسى ب.نوۆروۋزيان, رەسپۋبليكالىق اۆدوكاتتار القاسىنىڭ توراعاسى ءا.تۇگەل, ءال-فارابي اتىنداعى قازۇۋ حالىقارالىق قاتىناستار فاكۋلتەتىنىڭ دەكانى س.ايدارباەۆ, اباي اتىنداعى قازۇپۋ سوربوننا-قازاقستان ينستيتۋتىنىڭ حالىقارالىق قۇقىق كافەدراسىنىڭ مەڭگەرۋشىسى ا.ءسابيتوۆا سىندى ماماندار پىكىرى مەن ۇسىنىستارى زاڭ جوباسىن ازىرلەۋ بارىسىندا ەسكەرىلەتىنىن ايتتى.
كەزدەسۋ سوڭىندا جوعارعى سوت توراعاسى قايرات ءمامي ءوزى ءبىلىم العان ۋنيۆەرسيتەتتىڭ زاڭ فاكۋلتەتىنىڭ ستۋدەنتتەرىمەن كەزدەسىپ, زاماناۋي تەحنولوگيانىڭ سوڭعى ۇلگىلەرىمەن جابدىقتالعان ءال-فارابي كىتاپحاناسى عيماراتىنىڭ تىنىس-تىرشىلىگىمەن تانىسىپ شىقتى.
ميرا بايبەك,
«ەگەمەن قازاقستان»
