تاياۋدا قاراعاندىداعى مەدسانچاست اۋدانىنىڭ ماڭىندا جەر ءۇيدىڭ يەسى سەرگەي كاۋبرە اۋلاسىندا قوقيقازدىڭ بالاپانىن تاۋىپ الدى. ول ەكزوتيكالىق قوناقتى ۇيىنە الىپ, ارنايى ماماندارعا حابارلاسقان.
– بىزگە قالا تۇرعىنى حابارلاسىپ, ءوزىنىڭ اۋلاسىندا قوقيقازدى تاۋىپ العانىن مالىمدەدى, – دەيدى قر اشم ورمان شارۋاشىلىعى جانە جانۋارلار الەمىنىڭ قاراعاندى وبلىستىق اۋماقتىق ينسپەكتسياسىنىڭ جەتەكشىسى اباي ءالجانوۆ. – باسىندا ءبىز وعان سەنبەدىك. سەرگەي قاتەلەسكەن بولار دەپ ويلادىق, سەبەبى بىزدە قوقيقازدى كەزدەستىرۋ – وتە سيرەك بولاتىن جايت. ول كىسى تىرنانى تاۋىپ العان بولار دەپ بولجام جاسادىق. الايدا, وندا بارعانىمىزدا ول جاس قوقيقاز بولىپ شىقتى. ءبىزدىڭ ماماندار قۇستى كەڭسەمىزگە الىپ كەلدى.
مامانداردىڭ ايتۋىنشا, بالاپان قاماۋدا وسكەن قوقيقازعا ۇقسامايدى, سەبەبى مۇنداي قۇستى ونىڭ تاماقتانۋ ەرەكشەلىگىنە بايلانىستى اسىراۋ وتە قيىن. قوقيقازدار تەك تۇششى سۋ قويمالارىندا عانا ءومىر سۇرەدى, جانە دە دەنەسىندە كاروتينى بار كىشكەنتاي شاياندارمەن تاماقتانادى, سونىڭ ارقاسىندا قۇستاردىڭ قاۋىرسىندارى قىزعىلت تۇسكە بويالادى ەكەن.
– بالاپان قاناتىن ەندى جايىپ, ۇشا باستاعان سوڭ وسىندا ۇشىپ كەلگەن بولار, – دەپ بولجامدايدى اباي ءالجانوۆ. – ول ادامداردان مۇلدەم قورىقپايدى. ال ونىڭ ادامداردىڭ ۇيىنە كەلۋى, ابدەن شارشاپ-شالدىققانىن, كومەككە مۇقتاج بولعانىن كورسەتەدى. سونىمەن قاتار, بالاپاننىڭ جاۋراپ قالعانى بايقالادى. ءبىز ونىڭ بويىن جىلىتۋ ءۇشىن بولمەگە جىلىتقىش قويدىق. سودان سوڭ ول اجەپتاۋىر شيراپ قالىپتى.
قازىرگى تاڭدا قوقيقاز اقمولا وبلىسىندا ورنالاسقان قورعالجىن مەملەكەتتىك تابيعي قورىعىنا جەتكىزىلگەن. وسى سۇلۋ قۇستار ءدال سول جەردە, تەڭىز كولىنىڭ ارالىندا ءومىر سۇرەدى.
تابيعاتتى قورعاۋشىلار قاراعاندىلىقتارعا سانالىلىقتارى مەن تابيعاتقا بەيجاي قارامايتىندىعى ءۇشىن العىس ءبىلدىردى.
ميراس اسان,
«ەگەمەن قازاقستان»
قاراعاندى وبلىسى
