ارينە, وسىنداي مەملەكەتتىك ماسەلەدەن تاعدىر-تالايىمەن قازاق جەرىنە ورنىققان, باقىتىن وسىندا تاپقان ەتنوس وكىلدەرى قالىس قالا المايدى. جاقىندا وڭتۇستىك قازاقستان وبلىستىق قازاقستان حالقى اسسامبلەياسى كەڭەسىنىڭ وتىرىسىندا مەملەكەتتىك ءتىلدىڭ لاتىن گرافيكاسىنا ءوتۋ جايى تالقىلاندى.
«قوعامدىق كەلىسىم» مەملەكەتتىك مەكەمەسىنىڭ عيماراتىندا وتكەن كەڭەستىڭ وتىرىسىنا كەڭەس مۇشەلەرى مەن وبلىستاعى ەتنومادەني بىرلەستىكتەردىڭ توراعالارى جانە اسسامبلەيا جانىنداعى قوعامدىق كەلىسىم كەڭەسى, انالار كەڭەسى, عىلىمي-ساراپشىلىق توپ پەن وبلىستىق ماسليحاتتاعى «ەل بىرلىگى» دەپۋتاتتىق توبىنىڭ جەتەكشىلەرى مەن بەلدى وكىلدەرى قاتىستى. وتىرىستى وڭتۇستىك قازاقستان وبلىستىق قازاقستان حالقى اسسامبلەياسى توراعاسىنىڭ ورىنباسارى, وبلىستىق اسسامبلەيا حاتشىلىعىنىڭ مەڭگەرۋشىسى ءمۇراتالى قالمۇراتوۆ جۇرگىزدى.
شارا بارىسىندا وقو قحا توراعاسىنىڭ ورىنباسارلارى وبلىستىق كورەي ەتنومادەني بىرلەستىگىنىڭ ءتورايىمى روزا پاك پەن وبلىستىق گرۋزين ەتنومادەني بىرلەستىگىنىڭ توراعاسى زاال بوچوريشۆيلي, قازاقستانداعى وزبەكتەر قوعامدىق بىرلەستىكتەرى «دۋستليك» قاۋىمداستىعىنىڭ جەتەكشىسى يكرامجان حاشيمجانوۆ, وبلىستىق قوعامدىق كەلىسىم كەڭەسىنىڭ مۇشەسى بايدۋللا قونىسبەك, وبلىستىق انالار كەڭەسىنىڭ ءتورايىمى بالحيا كومەكباەۆا, وبلىستىق ارداگەرلەر كەڭەسىنىڭ توراعاسى, قوعامدىق كەلىسىم كەڭەسىنىڭ مۇشەسى جەڭىسبەك ماۋلەنقۇلوۆ, وقو قحا جانىنداعى عىلىمي-ساراپشىلىق توپتىڭ جەتەكشىسى, پروفەسسور اسما قالىبەكوۆا ءسوز سويلەپ, ەلىمىزدە ۋاقتىلى قولعا الىنعان باستامانى ءبىراۋىزدان قولدايتىندىقتارىن جەتكىزدى. تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى ۇسىنعان قازاق ءتىلىنىڭ لاتىن گرافيكاسىنا نەگىزدەلگەن ءəلىپبي جوباسىن وسىنداي وتىرىستار مەن جيىنداردا جان-جاقتى سارالاپ, تالداپ, تالقىلاۋعا شاقىردى.
– وزبەكستان, تۇرىكمەنستان جانە ازەربايجان سياقتى تۇركى تىلدەس ەلدەر لاتىن الىپبيىنە الدەقاشان ءوتتى, – دەدى قازاقستانداعى وزبەكتەر قوعامدىق بىرلەستىكتەرى «دۋستليك» قاۋىمداستىعىنىڭ جەتەكشىسى يكرامجان حاشيمجانوۆ. – ەلباسىنىڭ قاعيداتتى ماسەلە دەپ ايتاتىنىنداي بار. كەڭەس يمپەرياسىنىڭ ۇلتتارعا جاساعان شوۆينيستىك پيعىلدارى كوپتەگەن بۋىنعا وتارشىلىقتىڭ ۋىن ىشكىزىپ, رۋحسىزداندىرۋ ماقساتىنا جۇمىس جاسادى. ازات ەلدىڭ بالاسىنا ونداي قۇلدىق قامىت كەرەك ەمەس. ەكىنشىدەن, الەمنىڭ 80 پايىزعا جۋىعى اعىلشىن تىلىندە سويلەيدى. لاتىن ءالىپبيى حالىقارالىق ءتىلدى مەڭگەرۋگە دە جاردەم بەرەدى. سوندىقتان دا ءبىز ەلباسىنىڭ تاپسىرماسىنىڭ ورىندالۋىنا بىرىگىپ كۇش جۇمسايمىز.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
