ساران قالاسىنىڭ ىرگەسىندە رەسمي تۇردە العاش رەت ۇيىمداستىرىلعان شاراعا قاراعاندى وبلىسىنىڭ اكىمى ەرلان قوشانوۆ پەن «قازپوشتا» اق باسقارما توراعاسى ساكەن سارسەنوۆ قاتىستى.
ء«بىز شىلدە ايىندا اقپارات جانە كوممۋنيكاتسيالار ءمينيسترى داۋرەن اباەۆتىڭ قاتىسۋىمەن ەلىمىزدەگى ءىرى باسىلىم باسشىلارىمەن كەزدەسۋ وتكىزگەن ەدىك. سول جيىندا گازەت تارالىمىنىڭ 99%-ىن باسپاحانادان شىققان كۇنى اۋدان, قالالارعا, ال 1%-ىن كەلەسى كۇنى جەتكىزۋ باسىم ماقساتىمىز ەكەنى ايتىلعان. وسىنداي ويمەن وبلىس ورتالىعىنان تىس, اۋداندىق بايلانىس توراپتارى مەن بولىمشەلەرىنە پوشتا تاسىمالداۋ جيىلىگىن ارتتىردىق. بۇگىندە باسىلىمدار قازپوشتانىڭ وندىرىستىك نىساندارىندا تاۋلىك ىشىندە تاراتىلۋدا. ماسەلەن, وتكەن جىلدىڭ باسىندا گازەتتىڭ تەك 39%-ى شىققان كۇنى تاسىمالدانعان بولسا, قازىر كومپانيا بۇل كورسەتكىشتى 93,2%-عا دەيىن جەتكىزدى. بىراق, قولايسىز اۋا رايى كەزدەرىندە جانە جول جاعدايى قيىن شالعايداعى ەلدى مەكەندەرگە مەرزىمدى باسىلىمداردى اپارۋ كۇردەلى كۇيىندە قالىپ وتىر ەدى. قالاي دەسەك تە, جىل باسىندا گازەتتىڭ 12 پايىزى شىققان كۇنى جەتكىزىلسە, قازىر بۇل كورسەتكىش 48 پايىزدى قۇرايدى. ەندىگى جەردە ماسەلەنى درونداردى ىسكە قوسۋ ارقىلى شەشۋدەمىز», دەيدى «قازپوشتا» اق باسقارما توراعاسى س.سارسەنوۆ.
نەگىزىنەن حات-حاباردى ۇشقىشسىز اپپاراتتىڭ كومەگىمەن تاسىمالداۋ وسى كەزدەرى رەسمي تۇردە جاريالانعانىمەن, بۇگىنگە دەيىن ەلىمىزدىڭ 4 وبلىسىنداعى 9 اۋداندا 30 باعىت بويىنشا سىناما ۇشىرۋ وتكىزىلىپتى. باس-اياعى 9 مىڭ شاقىرىمنان اسا ۇشقان دروندار 500 كگ مەرزىمدى باسىلىمدار مەن حات-حابارلاردى جەدەل جەتكىزگەن. ال كومپانيانىڭ ەسەبىنە سۇيەنسەك, الماتى وبلىسىنداعى جامبىل اۋدانىنا قاراستى ۇزىناعاش–دەگەرەس اۋىلى اراسىندا (155 كم) حات-حاباردى اۆتوكولىكپەن تاسىمالداۋعا شامامەن 4 ساعات ۋاقىت جۇمسالسا, بۇل ارالىقتى درون بار-جوعى 40 مينۋتتا ەركىن ەڭسەرەدى ەكەن. سول سياقتى وڭتۇستىك قازاقستان وبلىسىنداعى شايان–اعىبەت باعىتىنداعى ارالىق قاتىناس شىعىنى مەن ۋاقىتى دا ەكى ەسەگە قىسقارعان. مۇنداي مىسالداردى كوپتەپ كەلتىرۋگە بولادى. ەڭ باستىسى – ۇنەمدى ءارى قولايلى.
بۇل كۇنى پوشتا ماماندارى ساران قالاسىنان دۋبوۆكا اۋىلىنا سالماعى 2 كيلوگراممدى قۇرايتىن گازەتتى درون ارقىلى اتتاندىردى. اۆتوماتتى رەجىمدە بەلگىلەنگەن باعىتپەن ۇشىرىلعان اپپارات 10 مينۋتتا (وسى ارالىقتى اۆتوكولىكپەن 30 مينۋتتا ءجۇرىپ وتەدى ەكەن) مەجەلى ورىنعا جەتىپ, پوشتا سالىنعان پاكەتتى تاستاعان سوڭ, كەرى ورالدى. ال حات-حابار سالىنعان پاكەتتى اۋىل پوشتاشىسى وڭدەپ, ادەتتەگى تارتىپپەن تاراتادى. درون تەك قانا, گازەتتەر مەن جۋرنالدار عانا ەمەس, سونداي-اق سالماعى 2 كيلوگراممعا دەيىنگى شاعىن سالەمدەمەلەردى دە جەتكىزۋگە قابىلەتتى.
شارا اياسىندا ءسوز العان ءوڭىر جەتەكشىسى ەرلان قوشانوۆ مۇنداي جوبا ايماقتاعى احۋالدى مەملەكەت باسشىسى مىندەتتەگەن تاپسىرمالاردى ورىنداۋ ماقساتىندا جۇزەگە اسىرىلىپ جاتقانىن ايتادى.
«ەلباسىمىز جۋىردا عانا قازاقستان حالقى ساندىق تەحنولوگيانىڭ قولدانىس اياسىن مەيلىنشە كەڭەيتۋ قاجەتتىگىن ناقتىلاپ, ءتيىستى دەڭگەيدە تاپسىرمالار جۇكتەگەنى بەلگىلى. رەسپۋبليكا بويىنشا ءبىزدىڭ وبلىستىڭ اۋماعى وتە اۋقىمدى ەكەنىن بىلەسىزدەر. ال ەندى بۇگىن درون قىزمەتىنە جۇگىنە وتىرىپ, حات-حابار, گازەت-جۋرنال تاسىمالداۋ قىزمەتىن جانداندىرىپ جاتقانىمىز دەر كەزىندە قولعا الىنعان شارۋا بولدى دەپ ەسەپتەيمىن. «قازپوشتا» اق-مەن بىرلەسە وتىرىپ, وڭىردە اتقارىپ جاتقان وزگە دە جوسپار-جوبالارىمىزدىڭ يگىلىگىن ەل كورەدى دەگەن سەنەمىن», دەيدى ول.
مامانداردىڭ پىكىرىنشە, بۇل تەحنولوگيا قازپوشتانىڭ حات-حابارلاردى تاسۋعا جۇمسالاتىن شىعىنىن ايتارلىقتاي قىستارتۋعا مۇمكىندىك بەرەدى جانە كۋرەرلەردىڭ دە ۋاقىتىن ۇنەمدەۋگە سەپ. ايتالىق, اۆتوكولىك جولسىز جەرلەرمەن جارتى كۇندە جەتەتىن اۋىلدىق بولىمشەگە درون بار بولعانى ءبىر ساعاتتا ۇشىپ بارادى. تاعى ءبىر اتاپ وتەرلىك ماسەلە – بۇگىندە قىزمەت كورسەتۋشى كومپانيا دروندى ۇشىرۋعا رۇقسات قۇجاتتارىن كەلىسىپ, جەتەكشىلىك ەتەتىن ۆەدومستۆونىڭ ماقۇلداۋىنا يە بولعان جانە بارلىق باعىتتار بويىنشا ۇشۋ كەستەسى جاسالعان.
ال ۇشقىشسىز ۇشۋ اپپاراتتارىن جاساپ شىعارۋمەن اينالىساتىن كومپانيا ديرەكتورى الەكسەي كيمنىڭ ايتۋىنشا, درون 100 كيلومەتر قاشىقتىقتى ءۇزىلىسسىز ەركىن ەڭسەرە الادى. ءبىر جارىم ساعاتتا قۋات الىپ ۇلگەرەتىن باتارەيالارى 2-3 ساعاتقا جەتەدى. ال دروننىڭ دىتتەگەن جەرگە جەتۋى ءۇشىن بوراندى كۇن مەن جەلدىڭ قۋاتى سەكۋندىنا 10-12 مەتردەن اسپاسا بولعانى.
جالپى, بۇرىندارى اۋىل تۇرعىندارىنا مەرزىمدى باسىلىمدى كۇنبە-كۇن جەتكىزۋ ءۇشىن قوسىمشا كولىك ساتىپ الۋ نەمەسە جاڭا قىزمەتكەرلەر جالداۋ جوسپارلانعان بولسا, ەندىگى جەردە قازوشتا بۇل قاراجاتتى بولىمشەلەردى جاڭعىرتۋ مەن جۇيەلەردى جاڭارتۋعا جۇمساماق. ءتىپتى, درونداردى ساتىپ الۋعا دا قارجى شىعىندالماعان. باسقارما توراعاسىنىڭ تۇسىندىرۋىنشە, قازپوشتا سەرۆيستىك مودەل بويىنشا جۇمىس جاساۋ نەگىزىندە كورسەتىلگەن قىزمەتتەر ءۇشىن عانا اقى تولەيدى.
«كەي كەزدەرى بىزگە قانشاما جانارماي مەن ۋاقىتتى جۇمساپ, اۆتوموبيل جونەلتكەنگە قاراعاندا, بىرنەشە كيلوگرام سالماقتاعى درونداردى 5-6 مارتە ۇشىرعان الدەقايدا ارزانعا تۇسەدى», دەيدى س.سارسەنوۆ.
نۇرلىبەك دوسىباي,
«ەگەمەن قازاقستان»
