ەل ەكونوميكاسىن دامىتۋدىڭ نەگىزگى تەتىكتەرى مەن قارجى نارىعىن قالىپتى ۇستاۋ ماسەلەلەرى باسقوسۋدىڭ نەگىزگى وزەگىنە اينالدى. باس بانكيردىڭ ايتۋىنشا ۇلتتىق بانك قارجى نارىعىنداعى وزگەرىستەردى ءتيىمدى يگەرىپ, تەڭگەنىڭ قۇنىن نىعايتۋ ءۇشىن بارلىق وڭتايلى جاعدايلاردى جاسايتىن بولادى. دەگەنمەن, بۇل تەك بىرجاقتى شەشىلەتىن ماسەلە ەمەس. تەڭگە قۇنىن تەگەۋرىندى ۇستاۋ ءۇشىن ەكونوميكانىڭ ءار سالاسىنىڭ قارىم-قۋاتى باسەكەگە قابىلەتتى بولۋى شارت. قازىرگى تاڭدا ەل ەكونوميكاسى شيكىزات كوزىنە تاۋەلدى. سوندىقتان, الەمدىك شيكىزات پەن قارجى نارىعىنداعى كەز-كەلگەن وزگەرىستەر ەكونوميكاعا تىكەلەي اسەرىن تيگىزەدى. اسىرەسە, مۇناي-گاز باعاسىنىڭ قۇبىلۋى اسا ماڭىزدى. ويتكەنى, ەل ەكسپورتىنىڭ 55 پايىزى وسى ەنەرگەتيكالىق وتىننىڭ ۇلەسىندە. وسىعان وراي قارجىگەرلەر الداعى ۋاقىتتا ەكونوميكانىڭ تىرەگىنە اينالاتىن باسقا دا سالالاردى دامىتۋدىڭ ماڭىزدىلىعىن ايتتى. باسقوسۋ بارىسىندا ۇلتتىق بانك توراعاسى ءاربىر وزگەرىستى بۇقاراعا جەتكىزۋدە باق وكىلدەرىمەن تىعىز ءارى اشىق بايلانىس ورناتاتىنىن تىلگە تيەك ەتتى.
– ۇلتتىق بانك تۇراقتى نەگىزدە نارىققا قاتىسۋشىلارعا جانە حالىققا ۇلتتىق بانكتىڭ قىزمەتى جانە ول قابىلداپ جاتقان شارالار تۋرالى, ونىڭ ىشىندە بۇقارالىق اقپارات قۇرالدارى ارقىلى حابارلايدى. باق-پەن بارىنشا ءتيىمدى جۇمىس ىستەۋ ءۇشىن, سونداي-اق اقپاراتتىق اشىقتىقتى قامتاماسىز ەتۋ جۇمىسىنىڭ شەڭبەرىندە ۇلتتىق بانك كوممۋنيكاتسيالىق بايلانىستاردى نىعايتۋ بويىنشا جۇيەلىك جۇمىستى جۇرگىزەدى. ءبىزدىڭ قىزمەتىمىز اشىق. ءبىز ءوزارا ءىس-قيمىل جانە بارىنشا بايلانىستاردى رەتتەۋ, سونداي-اق بۇقارالىق اقپارات قۇرالدارىمەن كەرى بايلانىس ورناتۋدىڭ ماڭىزدى قۇرالى رەتىندە, وسىنداي كەزدەسۋلەردىڭ پراكتيكاسىن جالعاستىرۋدى جوسپارلاپ وتىرمىز – دەيدى دانيار اقىشەۆ.
سونىمەن قاتار ءاربىر ازاماتتىڭ بانكتەرمەن بايلانىسىن نىعايتۋ ماقساتىندا بىرنەشە ءتيىمدى قىزمەت جۇيەلەرى ىسكە قوسىلعان. ول ارقىلى ازاماتتار وزىنە قاجەتتى وپەراتسيالاردى ورىنداۋ ءۇشىن بانك بولىمشەلەرىنە كەلمەي-اق, الەۋمەتتىك جەلىلەردىڭ كومەگىمەن تولەمدەر جۇرگىزىپ, وزگە دە قارجىلىق قىزمەتتەرگە قول جەتكىزە الادى.
شارا سوڭىندا جينالعان جۋرناليستەر ۇلتتىق بانك توراعاسىمەن بىرگە كاسسالىق وپەراتسيالار جانە قۇندىلىقتاردى ساقتاۋ ورتالىعىنىڭ جۇمىسىمەن تانىستى. ءبىر ايتا كەتەرلىگى سوڭعى ۋاقىتتارى ەل تۇرعىندارى تاراپىنان التىن قۇيمالارعا دەگەن سۇرانىس ارتا تۇسكەن. بۇعان دالەل, سوڭعى ءۇش ايدا 10-نان 100 گراممعا دەيىنگى 900 التىن قۇيما ساتىلعان. «قۇيما التىندار ءوز كەزەگىندە باسى ارتىق اقشانى ينفلياتسيادان قورعاۋدىڭ سەنىمدى قۇرالىنا اينالماق. باعالى مەتالدى قايتا ساتۋدىڭ ەش قيىندىعى جوق» دەيدى ماماندار.
ارمان وكتيابر,
«ەگەمەن قازاقستان»
الماتى
