زارينا دياس (الەمنىڭ 100-راكەتكاسى) جارىستى ءتۋرنيردىڭ ىرىكتەۋ كەزەڭىندە تايلاند ەلىنىڭ تەننيسشىسى لۋكسيكا كۋمحۋممەن (155) كەزدەسىپ, 2:1 ناتيجەسىمەن جەڭىسكە جەتتى. ءبىرىنشى پارتيادا لۋكسيكا 6:1 ەسەبىمەن باسىم تۇسسە, ەكىنشى جانە ءۇشىنشى سەتتە زارينا جەڭىستى ج ۇلىپ الدى. نەگىزگى كەزەڭنىڭ ءبىرىنشى اينالىمىندا دياس ءدال وسىنداي ەسەپپەن جاپونيالىق تەننيسشى ميساكي ءدويدى (95) جەڭدى.
ەلىمىزدىڭ ەكس-ءبىرىنشى راكەتكاسى زارينا دياس 1/8 فينالدا قىتايلىق تەننيسشى چجان شۋايدى (28) ەكى سەتتە 6:4, 6:2 ەسەبىمەن جەڭىپ, ءتۋرنيردىڭ كەلەسى كەزەڭىنە شىقتى. شيرەك فينالدا ەكى قازاقستاندىق تەننيسشى قىز زارينا دياس پەن ەلىمىزدىڭ ءبىرىنشى, الەمنىڭ 52-ءشى راكەتكاسى يۋليا پۋتينتسەۆا ءبىر-بىرىنە قارسى وينادى. بۇل جۇپتا زارينانىڭ مەرەيى ۇستەم بولدى. ءبىرىنشى سەتتە پۋتينتسەۆا 6:4 ەسەبىمەن جەڭىسكە جەتسە, قالعان ەكى سەت (6:1, 6:3) دياستىڭ پايداسىنا شەشىلدى. ايتا كەتەيىك, زارينا دياس پەن يۋليا پۋتينتسەۆا ءوزارا تۇڭعىش رەت كۇش سىناستى.
جارتىلاي فينالدىق باسەكەنى زارينا امەريكالىق كريستينا ماكحەيلعا (62) قارسى وتكىزىپ, ءۇش سەتكە سوزىلعان ويىندا جەڭىسكە جەتتى. العاشقى پارتيادا 6:4 ەسەبىمەن ۇتىپ, ەكىنشى پارتيادا 0:6 ەسەبىمەن ۇتىلعان وتانداسىمىز تاعى دا قايسارلىق تانىتىپ ءۇشىنشى پارتيادا 6:3 ەسەبىمەن جەڭىسكە جەتتى.
حالىقارالىق ءتۋرنيردىڭ فينالىندا وتانداسىمىز كورت يەسى جاپونيالىق مي كاتوعا (171) قارسى ويىن وتكىزىپ, ءبىر ساعات 19 مينۋتقا سوزىلعان ماتچتا 6:2, 7:5 ەسەبىمەن باسىم ءتۇستى. 23 جاستاعى زارينا قازاق تەننيسشىلەرى اراسىندا WTA تۇجىرىمىنا ەنەتىن Japan Open ءتۋرنيرىنىڭ تۇڭعىش رەت جەڭىمپازى اتاندى. ەسكە سالا كەتسەك, زارينا 2014 جىلى Japan Open جارىسىنىڭ فينالىنا شىعىپ, اۆستراليالىق سامانتا ستوسۋردان جەڭىلگەن ەدى.
«ەگەمەن-اقپارات»
