بايراقتى باسەكەنىڭ اشىلۋ سالتاناتىنا قۇرمەتتى قوناق رەتىندە مەملەكەتتەر باسشىلارى, بەدەلدى ساياساتكەرلەر, حالىقارالىق ۇيىمداردىڭ جەتەكشىلەرى قاتىستى. جارىستىڭ اشىلۋ راسىمىندە 777 سپورتشى باسەكە بايراعىن 17 ساعات 17 مينۋت ۋاقىتىندا كوتەردى.
مۇنىڭ الدىندا, سەنبى كۇنى اشعابادتا قازاقستاننىڭ جالاۋى جەلبىرەدى. اتلەتتەر قالاشىعىندا وتكەن تۋ كوتەرۋ شاراسىنا قازاقستان رەسپۋبليكاسى مادەنيەت جانە سپورت ءمينيسترى سپورت جانە دەنەشىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ باستاعان دەلەگاتسيا قۇرامى قاتىستى. تۇرىكمەنستان قارۋلى كۇشتەرىنىڭ قۇرمەتتى كۇزەتشىلەرى تۋىمىزدى جوعارى كوتەردى. جارىس ۇيىمداستىرۋشىلارى ەستەلىك سىيلىقتار تابىس ەتىپ, سالتاناتتى تۇردە ەلىمىزدىڭ ءانۇرانى شىرقالدى.
مۇنداي دوداعا ازيا قۇرلىعىنىڭ تۇراقتى تۇردە قاتىساتىن 45 ەلىنەن بولەك مۇحيت ايماعىنىڭ 17 مەملەكەتى تۇڭعىش رەت سىنعا تۇسۋدە. بۇل جولعى جابىق عيماراتتاعى جانە جاۋىنگەرلىك ونەردەن V ازيا ويىندارىنىڭ ۇرانى «دەنساۋلىق. شابىت. دوستىق» بولدى. اشعاباد قالاسى جارىستى وتكىزۋ مارتەبەسىنە 2010 جىلدىڭ 19 جەلتوقسانىندا يە بولعان. ال 2013 جىلى ينچحوندا (وڭتۇستىك كورەيا) وتكەن IV ازيا ويىندارىندا ازيا وليمپيادا كەڭەسى جارىستىڭ رەسمي تۋىن تۇرىكمەنستانعا تاپسىرعان ەدى.
جابىق عيماراتتاعى جانە جاۋىنگەرلىك ونەردەن ازيا ويىندارى 2005 جىلدان بەرى تۇراقتى تۇردە ۇيىمداستىرىلىپ كەلەدى. ازيا چەمپيوناتىنان كەيىنگى ەكىنشى دارەجەلى بىرىنشىلىك رەتىندە سانالعان بۇل جارىسقا قازاقستان قۇراماسى بيىل ءتورتىنشى رەت قاتىسىپ جاتىر. 2005 جىلى تۇڭعىش رەت ۇيىمداستىرىلعان اتالعان تۋرنيردە ءبىزدىڭ ەلدىڭ سپورتشىلارى 23 التىن, 15 كۇمىس جانە 6 قولا مەدال يەلەنگەن بولاتىن. جالپى سانى 44 جۇلدەمەن مەدال كورسەتكىشى بويىنشا جالپىكوماندالىق ەسەپتە ەكىنشى ورىن العان. ءبىرىنشى ورىندى 57 جۇلدەمەن (24 التىن, 18 كۇمىس, 15 قولا) قىتاي سپورتشىلارى يەلەنگەن-ءتىن. ال مەدال سانى بويىنشا قازاقستان قۇراماسىنان وزعان, بىراق التىن جۇلدە بويىنشا كەم جيناعان (20 التىن, 21 كۇمىس, 33 قولا) تايلاند قۇراماسى ۇزدىك ۇشتىكتى قورىتىندىلاعان ەدى.
اراعا ەكى جىل سالىپ جابىق عيماراتتاعى جانە جاۋىنگەرلىك ونەردەن ازيا ويىندارى قىتايدىڭ ارنايى اكىمشىلىك اۋدانى سانالعان ماكاو قالاسىندا ءوتتى. بۇل دوداعا ازيانىڭ 44 ەلىنەن كەلگەن 1800-گە جۋىق سپورتشى سپورتتىڭ 17 تۇرىنەن ءوز باقتارىن سىنادى. قازاقستان قۇراماسىنىڭ سپورتشىلارى بۇل سىندا مەدال بويىنشا ەكى جىل بۇرىنعى ناتيجەسىن قايتالاي المادى. سپورتشىلارىمىز ماكاودا توعىز التىن, 20 كۇمىس جانە 13 مەدالمەن جالپىكوماندالىق ەسەپتە ۇزدىك بەستىككە ەندى. مەدال كورسەتكىشى بويىنشا العاشقى ءۇش ورىندى قىتاي (25, 26, 24), تايلاند (19, 28, 22) جانە گونكونگ (15, 9, 11) يەلەندى.
ۆەتنامدا وتكەن ءۇشىنشى ازيا ويىندارىندا قازاقستاندىق سپورتشىلار سپورتتىڭ ون تۇرىنەن قۇراما قورجىنىنا 58 جۇلدە سالدى. ەڭ كوپ مەدالدى ءجۇزۋ سپورتىنان سىنعا تۇسكەن سپورتشىلارىمىز يەلەندى. ولار 10 التىن, 9 كۇمىس جانە 8 قولا جۇلدە جەڭىپ الدى. ال ەكىنشى كورسەتكىش جەڭىلاتلەتتەرىمىزگە تيەسىلى بولدى. «سپورت پاديشاسى» اتالعان سپورت تۇرىنەن وتانداستارىمىز التى التىن, ءتورت كۇمىس جانە ءتورت قولا مەدالدى مىسە تۇتتى. وزبەكستاننىڭ بەلبەۋ كۇرەسى مەن كيكبوكستان ۇلتتىق قۇراما سپورتشىلارىنا قوس-قوس التىن جۇلدە بۇيىردى. جالپى ەسەپ بويىنشا, قازاقستان قۇراماسى 21 التىن, 16 كۇمىس جانە 22 قولا مەدال ەنشىلەدى. مەدال جيىنتىعى بويىنشا ءۇشىنشى ساتىدان كورىندى. ءبىرىنشى ورىندا ادەتتەگىدەي قىتاي قۇراماسى (48, 25, 19) بولسا, جارىستى ۇيىمداستىرۋشى ۆەتنامعا ەكىنشى ورىن بۇيىردى.
ءتورتىنشى جابىق عيماراتتاعى جانە جاۋىنگەرلىك ونەردەن ازيا ويىنى 2011 جىلى قاتاردا ءوتۋ كەرەك بولاتىن. الايدا, قاتار بۇل جارىستى وتكىزۋدەن باس تارتتى. ءسويتىپ, ول جىلى ازيا ويىندارى تاريحتا تۇڭعىش رەت وتپەي قالدى. كەلەسى ازيا ويىندارى 2013 جىلى وڭتۇستىك كورەيانىڭ ينچحون قالاسىندا ءوتتى. بۇل دودا 2014 جىلى ءدال وسى قالادا ۇيىمداستىرىلاتىن ازيا ويىندارى الدىندا وتكىزىلگەن سوڭ, كوپ مەملەكەت سپورتشىلارىن جىبەرمەي قالدى. ءسويتىپ, جارىسقا ازيانىڭ 44 ەلىنەن 1500-دەن اسا سپورتشى قاتىستى. ءبىر اپتاعا سوزىلعان باسەكەدە قازاقستاندىق سپورتشىلار 31 مەدالعا قول جەتكىزدى. ونىڭ جەتەۋى التىن, سەگىزى كۇمىس جانە ون التىسى قولا. جالپىكوماندالىق ەسەپتە بەسىنشى ورىندى قاناعات تۇتتى.
بيىلعى بايراقتى باسەكەگە ازيانىڭ 62 ەلىنەن كەلگەن 6000-عا جۋىق سپورتشىلار سپورتتىڭ 21 ءتۇرى بويىنشا سىنعا تۇسۋدە. ال قازاقستان قۇراما ساپىنان 16 سپورت ءتۇرى بويىنشا 181 سپورتشى جارىس جولىنا شىعادى. ولاردىڭ قاتارىندا وليمپيادا ويىندارىنىڭ چەمپيونى ولگا رىپاكوۆا دا بار. تاعى ءبىر ايتا كەتەر جايت, بيىلعى جابىق عيماراتتاعى جانە جاۋىنگەرلىك ونەردەن ازيا ويىندارىنىڭ باعدارلاماسىنا بەلبەۋ كۇرەسى بويىنشا قازاق كۇرەسى دە ەنگەن. بۇل سىندا ەل نامىسىن قاسىمحان تۇلەنباەۆ (70 كگ), ءادىلجان ىستىباەۆ (90 كگ) جانە «قازاقستان بارىسى» مەن «الەم بارىسى» تۋرنيرلەرىنىڭ جەڭىمپازى ايبەك نۇعىماروۆ (+90 كگ) سەكىلدى بالۋاندارىمىز قورعايدى.
جارىس رەسمي تۇردە كەشە اشىلعانىمەن, نەگىزگى باسەكەلەر 16 قىركۇيەكتە باستالىپ كەتتى. ءبىر قىزىعى, دودانىڭ ءبىرىنشى كۇنىندە تۇرىكمەنستان سپورتشىلارى 16 التىن, 14 كۇمىس جانە 7 قولا مەدال يەلەنىپ, تاريحي ناتيجەگە قول جەتكىزىپ وتىر. 2013 جىلعى بىرىنشىلىكتە تۇرىكمەنستان قۇراماسى ەكى التىن مەدال عانا العان بولاتىن. ازىرشە قازاقستان قۇراماسىنىڭ قورجىنىندا ءۇش قولا مەدال بار. ءۇش مەدالدى دە دجيۋ-دجيتسۋ سپورتىنىڭ وكىلدەرى يەلەندى. اتاپ ايتار بولساق, جانبولات زاكارين (69 كگ), نۇرلان ەسپولوۆ (77 كگ) جانە قۋاندىق ەسەنەەۆ (85 كگ). يران جانە ۆەتنام سپورتشىلارىمەن بىردەي ءۇش قولا جۇلدە يەلەنگەن قازاقستان قۇراماسىنىڭ سپورتشىلارى جالپىكوماندالىق ەسەپتە سەگىزىنشى ورىندا كەلەدى.
ءالي بيتورە,
«ەگەمەن قازاقستان»
