وسى جۇمىستاردىڭ ناتيجەسىندە ءوڭىردىڭ 65 مىڭنان اسا تۇرعىنى ساپالى سۋعا قول جەتكىزەدى. بۇعان دەيىن وبلىس تۇرعىندارىنىڭ تازا سۋمەن قامتىلۋ كورسەتكىشى 36% بولسا, جىل سوڭىنا دەيىن ول 42%-عا جەتەدى.
تازا سۋدىڭ زاردابىن ەڭ كوپ تارتىپ وتىرعان ايماقتىڭ ءبىرى جاڭاقالا اۋدانى تۇرعىندارى ەدى. ءتىپتى اۋدان ورتالىعىنىڭ وزىندە تازا سۋ تاپشى بولىپ, حالىق قۇبىردان اققان سارى سۋعا تالاي نارازىلىق ايتقان-دى. قۇدايعا شۇكىر, جاڭاقالالىقتاردىڭ بۇل ماسەلەسى كوپ كەشىكپەي شەشىلەتىن بولدى. بۇل جونىندە باتىس قازاقستان وبلىسىنىڭ اكىمى التاي كولگىنوۆ جاڭاقالا اۋدانىنا جۇمىس ساپارى كەزىندە حابارلادى.
ەلباسىنىڭ اۋداندار مەن ەلدى مەكەندەردى دامىتۋ جانە حالىقتىڭ تۇرمىس جاعدايىن جاقسارتۋ تۋرالى تاپسىرماسىنا سəيكەس, جاڭاقالا وڭىرىندە اتقارىلىپ جاتقان جۇمىستاردىڭ بارىسىمەن تانىسقان وبلىس اكىمى ەڭ الدىمەن اۋداندا اۋىز سۋ ماسەلەسىن شەشۋ ماقساتىندا جۇزەگە اسىپ جاتقان جۇمىستاردى كوردى. بۇل ماقساتقا رەسپۋبليكالىق بيۋدجەتتەن 2 ملرد تەڭگەدەن استام قارجى قاراستىرىلعان. ونىڭ 400 ملن تەڭگەسى بيىل ءبولىنىپ, جۇمىس باستالدى.
ەكى جىلعا ەسەپتەلگەن جوبا نەگىزىندە ۇزىندىعى 146 شاقىرىم قۇبىر تارتىلادى.
– بۇل – ۇلكەن جوبا. سۋدى جاڭاقالا مەن بوكەي ورداسى اۋداندارىنىڭ شەكاراسىنداعى قۇلشىق دەگەن جەردەن تارتامىز. قارجىلاندىرۋ رەسپۋبليكا بيۋدجەتىنەن قاراستىرىلعان. جۇمىس ەندى باستالدى. ويتكەنى مەردىگەر كومپانيالار شالعاي اۋىلدارعا شىققىسى كەلمەيدى, كونكۋرسقا قاتىسپايدى. ءبىز ءوز كەزەگىمىزدە جۇمىسقا كىرىسكەن كومپانياعا قولداۋ كورسەتەتىن بولامىز, بىراق ساپا مەن ۋاقىتقا قويىلاتىن تالاپ تا قاتاڭ. بۇدان بولەك پياتيمار, بىرلىك, مəشتەكساي اۋىلدارىنا سۋ قۇبىرىن جەتكىزۋ جۇمىستارى جۇرۋدە. 8 ەلدى مەكەنگە اۋىز سۋ جەتكىزەمىز. جالپى, جاڭاقالا اۋدانىن دامىتۋ ءۇشىن 5 ملرد 600 ملن تەڭگە قارالعان. بۇل – رەكوردتىق كورسەتكىش, – دەيدى التاي كولگىنوۆ.
ءوڭىر باسشىسىنىڭ ايتۋىنشا, ورال قالاسىن بوكەي ورداسى مەن جانىبەك اۋداندارىنا جالعايتىن جولداردى سالۋ ءۇشىن دە مەملەكەت قارجى ءبولىپ وتىر. بىراق وبلىس ورتالىعىنان 500-600 شاقىرىم قاشىقتا جاتقان بۇل وڭىرلەرگە جول سالۋ ءۇشىن بەلسەنىپ شىعار مەردىگەر تابىلماي تۇر. «مۇمكىن جول قۇرىلىسىمەن اينالىساتىن كومپانيالار ءۇشىن كونكۋرس تالاپتارىن وزگەرتۋ كەرەك شىعار. ويتكەنى قالا مەن اۋىلدىڭ جاعدايىن سالىستىرۋ قاتە. بىراق ەكەۋىنە دە تالاپ بىردەي قويىلعان. سوندىقتان بۇل ماسەلەنى شەشۋ ءۇشىن جۇمىستانامىز» دەيدى وبلىس اكىمى جۋرناليستەرگە بەرگەن سۇحباتىندا.
ءدال قازىرگى تاڭدا جاڭاقالا اۋدانىندا 4 ەلدى مەكەنگە گاز قۇبىرى تارتىلىپ, اۋدان ورتالىعىنداعى 7 كوشەگە اسفالت توسەلىپ جاتىر. بۇل جۇمىس اياقتالعان كەزدە اۋدان تۇرعىندارىنىڭ كوگىلدىر وتىنمەن قامتىلۋ دەڭگەيى 86%-دان 97%-عا جەتىپ, اۋىز سۋمەن قامتىلۋ 70 %-دى قۇرايتىن بولادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
