ناقتىراق ايتقاندا, ەسىل اۋدانىنداعى №7 اگروتەحنيكالىق كوللەدج ستۋدەنتتەرى دۋالدى وقىتۋ جۇيەسىنىڭ ارقاسىندا بىلىمدەرىن تولىقتىرىپ قانا قويماي, سونىمەن قاتار تىكەلەي وندىرىستە ءوز بىلىكتىلىكتەرىن دە ارتتىرا الدى.
بىلتىر وسىنداي وندىرىستىك تاجىريبەدەن ءوتۋدىڭ ارقاسىندا ستۋدەنتتەردىڭ 1,5 ميلليون تەڭگە تابىس تاپقاندىعى ولاردى ەڭبەككە ىڭتالاندىرا تۇسەتىنى ايتپاسا دا تۇسىنىكتى. جالپى, اتالعان كوللەدج 2015 جىلدان بەرى «تاماقتانۋدى ۇيىمداستىرۋ» ماماندىعى بويىنشا دۋالدى وقىتۋدى قولعا العان بولاتىن. ال 2016 جىلى اقمولا وبلىسىنىڭ كاسىپكەرلەر پالاتاسىندا تىركەلگەن. سودان اتالعان ماماندىق بويىنشا ۇشجاقتى 39 كەلىسىمشارت ءتۇزىلىپ, دۋالدى وقىتۋ جۇزەگە اسىرىلا باستادى. بۇدان باسقا, جىل سايىن كوكتەمگى ەگىس ناۋقانى مەن كۇزگى جيىن-تەرىمدە شارۋا قوجالىقتارى ستۋدەنتتەردى «فەرمەرلىك شارۋاشىلىق», «دانەكەرلەۋ ءىسى» ماماندىقتارى بويىنشا كاسىبي تاجىريبەدەن وتۋگە قابىلداپ كەلەدى. اسىرەسە تاجىريبەدەن وتۋشىلەر ىشىندە تراكتورشىلار, دانەكەرلەۋشىلەر, ەسەپشىلەر, اسپازدار ۇلكەن سۇرانىسقا يە. كوللەدج ديرەكتورىنىڭ وقۋ-وندىرىستىك جۇمىس جونىندەگى ورىنباسارى ناتاليا بويكو وقىتۋ پروتسەسىنىڭ كەستەسى ستۋدەنتتەردى تاجىريبەدەن وتكىزۋگە قابىلدايتىن ارىپتەستەردىڭ جۇمىس ەرەكشەلىگىنە قاراي تۇزىلەتىنىڭ ەرەكشە اتاپ كەتتى.
ستۋدەنتتەردىڭ كاسىپتىك تاجىريبەدەن ءوتۋى ءۇشىن قاجەتتى كاسىپورىنداردىڭ سانى قازىرگى كەزدە 40 جەتسە, وسىنشاما بازا قالىپتاسقاندىعىن ەرەكشە اتاي كەتكەن ءجون. ن.بويكو بۇل رەتتە تاڭداۋ قۇقى زاماناۋي ماتەريالدىق-تەحنيكالىق بازاسى بار, بىلىكتى ماماندارى جەتكىلىكتى جانە ۇزاق ۋاقىتتان بەرى ءوزارا ءتيىمدى نەگىزدە ستۋدەنتتەردىڭ تاجىريبەدەن ءوتۋى ءۇشىن ءوز بازالارىن ۇسىنىپ كەلە جاتقان كاسىپورىندارعا بەرىلەتىندىگىن العا تارتادى. وسىنداي تولىققاندى كاسىبي تاجىريبەدەن ءوتۋدىڭ ارقاسىندا وقۋىن بىتىرگەن ستۋدەنتتەر تەز جۇمىسقا الىنىپ جاتادى. مەملەكەتتىك زەينەتاقى تولەۋ ورتالىعىنىڭ تاراتقان مالىمەتىنە سەنسەك, 2016 جىلدان باستاپ كوللەدج تۇلەكتەرىنىڭ زەينەتاقى ەسەپ شوتتارىندا قارجى جينالا باستاعان.
اسقار تۇراپباي ۇلى,
«ەگەمەن قازاقستان»
اقمولا وبلىسى
