تاۋار اينالىمى 5 ملرد دوللارعا جەتەدى
قازاقستان پرەزيدەنتى نۇرسۇلتان نازارباەۆ ەكى مەملەكەت اراسىنداعى تاۋار اينالىمى 2020 جىلعا دەيىن 5 ملرد دوللارعا جەتەتىنىن ايتتى. «وزبەكستاننىڭ كەيبىر يمپورتتالاتىن تاۋارلارعا اكتسيزدەردى تومەندەتۋى ساۋدا ىنتىماقتاستىعىن ارتتىرۋعا وڭ اسەر ەتكەنى انىق. وسى جىلدىڭ العاشقى 7 ايىندا ەكى ەل اراسىنداعى ساۋدا اينالىمى 35 پايىزعا ارتقان. بۇل جاقسى ناتيجە», دەدى نۇرسۇلتان نازارباەۆ. ونىڭ ايتۋىنشا, 2020 جىلعا قاراي تاۋار اينالىمى 5 ملرد دوللارعا كوتەرىلەدى. سونىمەن قاتار, بىرلەسىپ اتقارىلاتىن ءىرى ينۆەستيتسيالىق جوبالار دا مەملەكەتتەر اراسىنداعى ىنىماقتاستىق بايلانىسقا وڭ ىقپال ەتەدى دەپ جوسپارلانۋدا.
بىلتىرعى جىلدىڭ ناتيجەسى بويىنشا ەكى ەل اراسىنداعى تاۋار اينالىمى 1,5 ملرد دوللار بولدى. بيىلعى جىلدىڭ العاشقى 7 ايىندا بۇل كورسەتكىش وتكەن جىلدىڭ وسى ارالىعىمەن سالىستىرعاندا 11,4 پايىزعا ارتىپ, 953 ملن دوللاردى قۇرادى.
ەستەرىڭىزگە سالا كەتسەك, قازاقستان – وزبەكستاننىڭ ەڭ ءىرى ساۋدا-ەكونوميكالىق سەرىكتەسى. بۇگىنگى تاڭدا وزبەكستاندا قازاقستاندىق كاپيتال نەگىزىندە كوپتەگەن كاسىپورىن جۇمىس ىستەيدى. ال قازاقستاندا وزبەكستانمەن بىرلەسىپ اشىلعان كاسىپورىندار دا مول.
«ەكىجاقتى ىقپالداستىقتىڭ جاڭا كەزەڭى»
قازاقستان پرەزيدەنتى نۇرسۇلتان نازارباەۆ وزبەكستانعا ساپارى بارىسىندا بىرقاتار تاريحي ەسكەرتكىشتەردى ارالاپ بولعان سوڭ باق وكىلدەرىنە ەكى مەملەكەت اراسىنداعى ىنتىماقتاستىقتىڭ جاڭا كەزەڭى باستالعانى تۋرالى مالىمدەدى. سونىمەن قاتار, نۇرسۇلتان نازارباەۆ وزبەكستاننىڭ ءبىرىنشى پرەزيدەنتى يسلام كاريموۆتىڭ رەزيدەنتسياسى بولعان وكسارايعا بارىپ, مەملەكەت قايراتكەرىنىڭ ەسكەرتكىشىنە گۇل شوقتارىن قويدى.
وزبەكستانعا كەلگەن جوعارى مارتەبەلى قوناق ءۇشىن قۇرمەت قاراۋىلى ۇيىمداستىرىلدى.
قازاقستاندا 2018 جىل وزبەكستان جىلى دەپ جاريالاندى
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ وزبەكستان پرەزيدەنتىمەن وتكىزگەن بريفينگ بارىسىندا كەلەسى جىل قازاقستانداعى وزبەكستان جىلى دەپ جاريالانعانىن ايتتى.
«مەملەكەتتەرىمىزدىڭ اراسىنداعى دوستىق قارىم-قاتىناستا مادەني-گۋمانيتارلىق بايلانىستىڭ ءرولى زور. ءبىز 2018 جىلى قازاقستانداعى وزبەكستان جىلىن وتكىزۋ تۋرالى كەلىستىك. سونىڭ اياسىندا ءتۇرلى شارالار ۇيىمداستىرىلىپ, باۋىرلاستىعىمىز ارتا تۇسەتىن بولادى», دەدى نۇرسۇلتان نازارباەۆ. ال 2019 جىلى وزبەكستانداعى قازاقستان جىلى وتەدى.
مادەني-گۋمانيتارلىق باعىتتىڭ ەكى ەل اراسىندا ماڭىزى زور. بۇعان اسىرەسە وزبەكستاندا تۇراتىن ەتنوستىق قازاقتار كوپ ەڭبەك ءسىڭىردى. سونىمەن قاتار, وزبەكستان جازۋشىلار وداعىنىڭ جانىندا قازاق ادەبيەتى كەڭەسى بار. سوڭعى جىلدارى قازاق قالامگەرلەرىنىڭ 50-دەن استام كىتابى جارىق كوردى. ەلىمىزدە رەسپۋبليكالىق ماڭىزى بار «نۇرلى جول» اتتى گازەت تە شىعارىلادى. ال قازاقستاندا وزبەك سۋرەتشىلەرىنىڭ كورمەلەرى مەن تەاتر ۇجىمدارىنىڭ قويىلىمدارى ءجيى ۇيىمداستىرىلادى.
پرەزيدەنتتەر ءبىر جىلدا التى رەت كەزدەستى
قازاقستان پرەزيدەنتى نۇرسۇلتان نازارباەۆتىڭ وزبەكستانعا ساپارى بارىسىندا وتكىزىلگەن بريفينگ كەزىندە پرەزيدەنت شاۆكات ميرزيوەۆ نازارباەۆپەن التىنشى رەت كەزدەسىپ وتىرعانىن ايتتى.
«ەرەكشە اتاپ وتكىم كەلەتىنى, وسى جىل ىشىندە مەن قازاقستان پرەزيدەنتىمەن التىنشى رەت كەزدەسىپ وتىرمىن. بۇل ەكى ەل اراسىنداعى ىنتىماقتاستىق تاريحىندا بولماعان وقيعا دەۋگە بولادى», دەدى ميرزيوەۆ.
كەزدەسۋ بارىسىندا ميرزيوەۆ قازاقستاندىق ارىپتەسىن «ەل-يۋرت حۋرماتي» وردەنىمەن ماراپاتتادى.
«نۇرسۇلتان نازارباەۆ – الەمدىك دەڭگەيدەگى مەملەكەتتىك جانە ساياسي قايراتكەر. تاۋەلسىز قازاقستاننىڭ نەگىزىن قالاۋشى. قازاقستان نازارباەۆتىڭ باسقارۋىمەن حالىقارالىق قاۋىمداستىقتا ءوزىنىڭ ورنىن تاۋىپ, قارقىندى دامىپ جاتقان دەموكراتيالىق مەملەكەتكە اينالدى. نازارباەۆتىڭ ارقاسىندا وزبەك پەن قازاق ەلىنىڭ اراسىندا باۋىرلاستىق قارىم-قاتىناس پەن دوستىق كوپىرى ورنادى. سونىڭ نەگىزىندە بۇگىنگى تاڭدا مەملەكەتتەرىمىز اراسىندا جەمىستى ىنتىماقتاستىق ورناعان», دەلىنگەن شاۆكات ميرزيوەۆتىڭ ماراپات تۋرالى جارلىعىندا.
ماڭىزدى بيزنەس-فورۋم ءوتتى
15-17 قىركۇيەك كۇندەرى وزبەكستان كورمە ورتالىعىندا قازاقستاننىڭ ۇلتتىق وندىرىستىك كورمەسى مەن وزبەكستان-قازاقستان بيزنەس-فورۋمى ءوتتى. 550 شارشى مەتر كورمە الاڭىندا قازاقستاننىڭ 50 كومپانياسى ءوزىنىڭ اسكەري تەحنيكاسىن, اۆتوكولىك قۇراستىرۋ جۇيەسى مەن اۆياتسيالىق, فارماتسەۆتيكالىق, قۇرىلىس, تەكستيل ونىمدەرىن تانىستىردى. ۇيىمداستىرۋشىلاردىڭ ايتۋىنشا, كورمە مەن فورۋم قازاقستان پرەزيدەنتىنىڭ وزبەكستانعا ساپارى اياسىندا ارنايى ۇيىمداستىرىلىپ وتىر. فورۋمعا ەكى مەملەكەتتىڭ 500-دەن استام بيزنەس قاۋىمداستىق وكىلدەرى قاتىستى.
