قايرات ءابدىراحمانوۆتىڭ ايتۋىنشا, اڭگىمە نەگىزىنەن سوعىستى توقتاتۋ مەن اسكەري جانە گۋمانيتارلىق كومەك كورسەتۋ توڭىرەگىندە وربىگەن. مينيستر استانا وتىرىسىنىڭ ناتيجەسىندە سيرياداعى جاعداي جاقسى باعىتقا وزگەرىپ, داعدارىستى ساياسي كەلىسسوزدەر ارقىلى شەشۋدىڭ كوكجيەگى كەڭەيە تۇسكەنىنە توقتالدى.
«قازاقستان پرەزيدەنتىنىڭ ۇزدىكسىز قولداۋىمەن جۇزەگە اسىپ كەلە جاتقان سيريا ماسەلەسى بويىنشا استانا پروتسەسى ءوز مارەسىنە جەتتى. جيىنعا قاتىسۋشىلار استانا پلاتفورماسى اياسىندا وسىعان دەيىن كەلىسىلگەن ۋاعدالاستىقتاردىڭ ورىندالۋ بارىسىن تالقىلاپ, سيرياداعى جاعدايدى رەتتەۋ بويىنشا ءوزارا ءىس-قيمىل جولدارىن تانىستىردى», – دەدى سىرتقى ىستەر ءمينيسترى ق.ءابدىراحمانوۆ.
مينيستر سيرياداعى شيەلەنىستىڭ قايتا ءورشۋى ەشقانداي تاراپقا پايدا اكەلمەيتىنىن ايتتى. سونداي-اق ول ەلدەگى جاعدايدى تۇراقتاندىرۋعا اسەرى بار مەملەكەتتەر ساياسي كەلىسسوزدەر جۇرگىزۋدى ماڭىزدى دەپ ەسەپتەيتىنىن جەتكىزدى.
«قازاقستان سيرياداعى جاعدايدى رەتتەۋگە باعىتتالعان بارلىق بەيبىت باستامالاردى قولداي وتىرىپ, كەلىسسوزدەرگە ءوز الاڭىن ۇسىنۋىن جالعاستىرا بەرەدى. ەلدە قاقتىعىس بەلەڭ الىسىمەن, قازاقستان پرەزيدەنتى ن.نازارباەۆ الەم ەلدەرىن سيرياداعى شيەلەنىستى بەيبىت جولمەن شەشۋگە شاقىرعان بولاتىن. قاڭتاردا باستالعان استانا كەلىسسوزدەرىنىڭ تابىستى بولاتىنىنا سەنبەگەندەر تابىلدى. الايدا, وسىندا جينالعانداردىڭ جىگەرىنىڭ ارقاسىندا سيرياداعى جاعدايدى بەيبىت جولمەن شەشۋگە مۇمكىندىك تۋىپ وتىر», – دەدى ق.ءابدىراحمانوۆ.
سونىمەن قاتار, سىرتقى ىستەر ءمينيسترى استاناداعى كەلىسسوزدەردىڭ ارقاسىندا بەيبىتشىلىك پەن تۇراقتىلىقتى قايتا ورناتۋدا ماڭىزدى ناتيجەلەرگە قول جەتكەنىن حابارلاپ, سيريادا دەەسكالاتسيا ايماقتارى قۇرىلاتىنىن ماع ۇلىمدادى. ق.ءابدىراحمانوۆتىڭ پىكىرىنشە, بۇل – استانا كەلىسسوزدەرىنىڭ ماڭىزدى شەشىمدەرىنىڭ ءبىرى.
جيىندى قورىتىندىلاعان ق.ءابدىراحمانوۆ يران, رەسەي جانە تۇركيا تاراپىنىڭ ورتاق مالىمدەمەسىمەن تانىستىردى. وندا اتالعان ءۇش ەلدىڭ سيريا اراب رەسپۋبليكاسىنىڭ بىرلىگى مەن اۋماقتىق تۇتاستىعىن, ەگەمەندىگى مەن تاۋەلسىزدىگىن ساقتاي وتىرىپ, كەپىل مەملەكەتتەر رەتىندە ەلدەگى بىرقاتار زورلىق-زومبىلىقتى ازايتىپ, وق اتۋدى توقتاتۋدى قولدايتىنى ايتىلعان.
ءۇش ەلدىڭ مالىمدەمەسىندە بىرقاتار ماسەلەلەر قارالعان. وندا 2017 جىلعى 4 مامىردا كەلىسىلگەن مەموراندۋمعا سايكەس, 4 دەەسكالاتسيا ايماعىن قۇرۋ ءىسى جاريالانعان. اتاپ ايتار بولساق, شىعىس گۋتا, حومس ولكەسىنىڭ سولتۇستىگىندە, يدليب جانە كورشى اۋدانداردا, سيريانىڭ وڭتۇستىگىندە تۇراقتاندىرۋ ايماعى قۇرىلماق. ايتسە دە, مۇنداي دەەسكالاتسيا ايماقتارى ۋاقىتشا, 6 ايلىق مەرزىمگە جاسالادى جانە ونى ۇزارتۋ كەپىل مەملەكەتتەردىڭ قۇزىرەتىنە كىرەدى. مالىمدەمەدە مۇنداي ايماقتاردىڭ سيريانىڭ بىرلىگى مەن تۇتاستىعىنا نۇقسان كەلتىرمەيتىنى ايتىلعان.
سيرياداعى شيەلەنىستە بىرنەشە قارۋلى توپتىڭ قاقتىعىسىپ جاتقانى ءمالىم. سولاردىڭ كەيبىرى تەرروريستىك ۇيىم رەتىندە تانىلعان. كەلەسىسى مەملەكەتتىڭ نەگىزگى كۇشى سانالادى. وسىعان وراي, كەپىل مەملەكەتتەر مالىمدەمەسىندە سيريا اراب رەسپۋبليكاسى بيلىگى جانە قارۋلى وپپوزيتسيا كۇشتەرىمەن قاقتىعىسۋدىڭ الدىن الۋ ماقساتىندا يدليب پروۆينتسياسى مەن كورشى اۋداندارداعى اسكەري كۇشتەردى قايتا ورنالاستىرۋ ماسەلەسى قاراستىرىلعان. ال يليم, «دجابحات ءان-نۋسري» سەكىلدى ء«ال-كايدامەن» قاتىسى بار تەرروريستىك توپتارمەن كۇرەس جالعاسا بەرەدى. سونىمەن بىرگە, دەەسكالاتسيا ايماقتارىنداعى جاعدايدى باقىلاۋ ماقساتىندا يران-رەسەي-تۇركيا بىرلەسكەن باسقارۋ ورتالىعىن قۇرۋ جوسپارلانىپ وتىر.
«استانا كەلىسسوزىن باقىلاۋشىلار جانە مۇددەلى حالىقارالىق قوعام مۇشەلەرىن سيرياداعى دەەسكالاتسيا مەن تۇراقتاندىرۋ ارەكەتىن قولداۋعا, سيريا تۇرعىندارىنا قوسىمشا كومەك جىبەرۋگە, تاريحي قۇندىلىقتاردى قورعاپ, الەۋمەتتىك جانە ەكونوميكالىق ينفراقۇرىلىم سەكىلدى ومىرگە قاجەتتى وبەكتىلەردى قايتا قالپىنا كەلتىرۋگە شاقىرامىز», – دەدى مالىمدەمەنى وقىعان ق.ءابدىراحمانوۆ.
استانا كەلىسسوزدەرىن جيىنعا قاتىسۋشىلار جوعارى باعالادى. ءۇش ەلدىڭ مالىمدەمەسىندە ەلباسى ن.نازارباەۆتىڭ سيريا كەلىسسوزدەرىنىڭ 6-شى كەزەڭىن وتكىزۋگە قوسقان ۇلەسىنە ريزاشىلىعىن ءبىلدىردى. داماسك دەلەگاتسياسىنىڭ مۇشەسى باشار ءال-دجاافاري استاناداعى كەلىسسوزدەردىڭ تيىمدىلىگى مول ەكەنىن ءسوز ەتتى. ونىڭ پايىمداۋىنشا, استاناداعى پروتسەستىڭ پايداسى مول بولعاندىقتان, بىرقاتار مەملەكەتتەر قىزىعۋشىلىق تانىتىپ وتىرعان كورىنەدى. ءوز كەزەگىندە سيريا وپپوزيتسياسى دەلەگاتسياسىنىڭ وكىلى ايمان ءال-ءاسيمي كوزدەلگەن ماقساتتارىنىڭ بىرىنە قول جەتكىزگەنىن ايتادى.
«وسى كەزەڭدە 3 ميلليون تۇرعىنى بار يدليبتە دەەسكالاتسيا ايماعىن قۇرۋ جونىندە كەلىسىم جاسالدى. بۇل – بۇگىنگى باستى ماقسات بولاتىن. مۇنداي وڭتايلى قادامدار جەنەۆادا ساياسي شەشىمدەرگە ءوز اسەرىن تيگىزەدى. سيريا بيلىگى تۇتقىنعا تۇسكەندەردى بوساتۋدى مۇمكىندىگىنشە كەيىنگە قالدىرۋدى كوزدەپ وتىر. الايدا, قازاقستان مەن رەسەي تاراپى بۇل ماسەلەدە كومەك قولىن سوزاتىنىنا ۋادە بەردى», – دەدى وپپوزيتسيونەرلەر وكىلى ايمان ءال-ءاسيمي.
سيرياداعى شيەلەنىستى شەشۋ بارىسىندا اتالعان ەلدە ەشكىمگە باس بەرمەي اساۋلىق تانىتقان سەركەلەردىڭ باسىن ءبىر ورتاعا جيناپ, وڭ ناتيجەگە قول جەتكىزۋ وڭايعا سوققان جوق. سيريادا ءالى دە شەشىلمەگەن ماسەلەلەر جەتەرلىك. وسىعان سايكەس, كەلىسسوزدەرگە قاتىسۋشىلار كەلەسى باس قوسۋدىڭ بيىلعى قازاندا وتەتىنىن حابارلادى.
اباي اسانكەلدى ۇلى,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
