بۇل جەڭىستىڭ باستى باقىتى – اجارىمەن, اقىلىمەن, ونەرىمەن الدىنا جان سالماعان ارۋعا كەلەسى جىلى اقش-تا وتەتىن «الەم ارۋى-2018» بايقاۋىندا مۇقىم قازاق قىزدارىنىڭ كوركىن پاش ەتۋ بۇيىردى. «الماتى ارۋى» اتانعان قىزدارعا 2015 جىلدان بەرى الەمدىك مىنبەرگە جول اشىلعانىن ايتا كەتەلىك.
ءسابينالاردىڭ ءبارى سۇلۋ, بۇعان دەيىن دە ءسابينا التىنباەۆا ەشكىمگە ۇقسامايتىن قازاق قىزدارىنىڭ سۇيكىمدىلىگىن كۇللى الەمگە تانىتقان.
ەندى «تۇران» كوللەدجىنىڭ ستۋدەنتى كەلەسى جىلى الەمنىڭ ەڭ سۇلۋ دا ءبىلىمدى بويجەتكەندەرى كوتەرىلگەن مىنبەردەن تابىلماق.
ءبىر كۇندە ايى وڭىنان تۋعان ءسابينا ماماندىعى بويىنشا بولاشاق اۋدارماشى ءارى گيد. ونى جاسىنان ەرەسەك كورسەتەتىن سىرت كەلبەتى عانا ەمەس, تىرلىگى, ءوزىن ءوزى ۇستاۋى دەسەك جاڭىلىسا قويماسپىز.
قىسقاسى, بيىل «الماتى ارۋى-2017. سۇلۋلىق قۋاتى» اتاۋىمەن وتكەن كەزەكتى بايقاۋعا قاتىسۋعا 400-دەن استام قىز ۇمتىلعان. ولاردىڭ اراسىنان 10 سۇلۋ عانا قازىلار القاسىنىڭ بارلىق تالاپتارىنان تابىلدى. تاعى ءبىر قىزىعى, بيىل ءبىرىنشى رەت اتالمىش بايقاۋدا قىزداردىڭ ەرەكشە ءبىر تالانتى سىنعا ءتۇستى. بايقاۋدىڭ اقتىق باعدارلاماسىنا قويىلعان بۇل كەزەڭگە قىزدار بارىن سالدى. كورەرمەندەر دە كوڭىلدى بولدى.
جارىس بارىسىندا ارۋلاردىڭ بارلىعى دا باعىنا سيىنعانى ءسوزسىز. ويتكەنى بۇل جارىستا جەڭىمپاز بولۋ ءبىر بولەك تە, ءتۇرلى مۇمكىندىكتەرگە يە بولۋ باقىتى دا بار ەدى. ماسەلەن, بايقاۋدىڭ باس جۇلدەسىنەن كەيىنگى ورىنداردى بولىسكەن الينا مەلكينا مەن داريا گالوچكيناعا گرەكيادا 4 جىل ءبىلىم الۋعا جول اشىلدى. ولار بۇل ەلدە اعىلشىن ءتىلىن تەرەڭ مەڭگەرەتىن بولادى.
ال قازىلار القاسىنا كىل سۇلۋدىڭ ىشىنەن ءبىر سۇلۋدى تاڭداۋ شىنىندا دا وڭاي بولماعان. جاستاردىڭ ءبارى دە كورىكتى, ونەرلى. ونىڭ ۇستىنە «الماتى ارۋى-2017» اتانعان سۇلۋ بۇكىل قازاقستان اتىنان الەمدىك بايقاۋعا قاتىسىپ, وعان تورتكۇل دۇنيە كوز سالاتىنى تاعى بار.
دەگەنمەن ءسابينا جارىستىڭ بارلىق كەزەڭدەرىندە وزىنە سەنىمدى بولعانىن بايقاۋ قيىن ەمەس. قانشا تولقىسا دا باس جۇلدەگە لايىقپىن دەگەن ىشكى قۋات پەن سەنىم ونىڭ تۇيسىگىن الدامادى. وعان قوسا ارۋلار بايقاۋىنا قاتىسىپ جاتقان قىزدى كوللەدجى دە قولداپ, سەسسيانى كەيىن تاپسىرۋعا مۇمكىندىك بەرگەن.
ول ءبىرىنشى كەزەكتە سپورتتى, ونىڭ ىشىندە بوكستى, ءبيدى جاقسى كورەدى. گەننادي گولوۆكيننىڭ سپورتتاعى جەتىستىكتەرىنە سۇيسىنەدى. جانە ءوزىن ءوز ەلىنىڭ پاتريوتى دەپ بىلەتىن قىز قازاقستاندى جاقسى قىرىنان كورسەتۋ ءۇشىن بار ونەرىن سالىپ دايىندالماق.
ايناش ەسالي,
«ەگەمەن قازاقستان»
الماتى
