كاسىپقوي بوكس الەمىندە زور قىزىعۋشىلىق تۋدىرعان بۇل ايقاستى 20 مىڭ ادام سپورت سارايىندا وتىرىپ تاماشالاسا, تەلەۆيزيا ارقىلى قىزىقتاعان جۇرت سان ميلليونداردان اسىپ كەتتى.
وزبەكستاندا مەملەكەتتىك ساپارمەن جۇرگەن قازاقستان پرەزيدەنتى نۇرسۇلتان نازارباەۆ تا امەريكا قۇراما شتاتتارىنداعى لاس-ۆەگاستا WBA, WBC, IBO, IBF جانە The ring تۇجىرىمدارى بويىنشا بوكستان الەم چەمپيونى اتاعى ءۇشىن وتكەن گەننادي گولوۆكيننىڭ ساۋل «كانەلو» الۆارەسپەن جەكپە-جەگىن تىكەلەي ەفيردەن كورىپ, وتانداسىمىزعا قۇتتىقتاۋ جەدەلحاتىن جولدادى.
«ميلليونداعان قازاقستاندىقتار ساعان ءبىر اۋىزدان قىزۋ قولداۋ كورسەتتى. سەن تارتىستى ءارى جانكەشتى جەكپە-جەكتە ايرىقشا تاباندىلىق تانىتىپ, قاجىماس قايرات پەن اسقان شەبەرلىك كورسەتتىڭ.
سەنىڭ كاسىپقويلىعىڭ, زور قابىلەتىڭ, قول جەتكىزگەن ابىروي-بەدەلىڭ, ەڭ باستىسى – ءوز ىسىڭە شەكسىز ادالدىعىڭ كەلەشەكتەگى جارقىن جەڭىستەرىڭنىڭ كەپىلى بولا بەرسىن», – دەلىنگەن جەدەلحاتتا.
سوڭىندا نۇرسۇلتان نازارباەۆ بوكسشىعا زور دەنساۋلىق جانە الداعى بەلەستەرىنە تابىس تىلەدى.
جەكپە-جەك قازاقستاندىق سپورتسۇيەر قاۋىمعا دا تاقىم قىستىرىپ قويعان ەدى. بوكس دەگەن بەكزات ونەرىڭىز ءبىرىنشى ءنومىرلى سپورت تۇرىنە اينالعان ەلدىڭ ەڭبەكتەگەن بالاسىنان, ەڭكەيگەن كارىسىنە دەيىن بۇل شايقاستى دەمىن ىشىنە تارتىپ, دەگبىرسىزدەنە كۇتتى. ءتىپتى, مەملەكەت باسشىسى نۇرسۇلتان نازارباەۆتىڭ ءوزى 14 قىركۇيەك كۇنى باق وكىلدەرىمەن بولعان ءباسپاسوز ءماسليحاتىندا «بۇل – قازاقستان حالقى ءۇشىن ۇلكەن وقيعا! ول ءبارىمىزدى تەلەديدار الدىنا جينايدى. ءبىزدىڭ جەرلەس GGG-ءدىڭ اتاعى مەن داڭقى قازىر جەر جارىپ تۇر. بۇل – وتە ماڭىزدى كەزدەسۋ. مەكسيكالىق الۆارەس – وتە تانىمال, شەبەرلىگى جوعارى بوكسشى», دەپ اتالعان بوكس ماتچىنا ەرەكشە ماڭىز بەرگەن بولاتىن.
كاسىپقوي بوكستاعى ورتا سالماقتىڭ «اۋليەسىن» انىقتايتىن وسى جەكپە-جەكتى گەننادي گولوۆكين بوكسشىلاردىڭ تىلىمەن ايتقاندا, ء«بىرىنشى نومىرمەن» جۇمىس ىستەپ, ادۋىندى تۇردە باستاعان. بىراق قانشا جەردەن شابۋىلداعانمەن, ونىڭ سوققىلارى كوپكە دەيىن مەكسيكالىق بوكسشىعا دارىماي دىڭكەلەتتى. ال الۆارەس بولسا, اڭداي باعىپ, قارسىلاسىنىڭ قاپىسىن تابۋدى كوزدەدى. ياعني ول كوبىنە قورعانىستا ءجۇرىپ, قارسى شابۋىلمەن قارىمتا قايتارۋ تاكتيكاسىن ۇستاندى. جەمە-جەمگە كەلگەندە, بۇل جوسپار ءوز جەمىسىن بەردى دە. ۇنەمى العا ۇمتىلىپ, ۇستەمدىگىن ۇدەتكىسى كەلگەن گولوۆكيندى «كانەلو» ارقانعا ارقاسى تىرەلىپ تۇرسا دا بىرنەشە مارتە توسىپ الىپ ۇردى. جانە دە ول گولوۆكيننىڭ اۋىر سوققىلارىنىڭ كوبىن دەنەسىنە دارىتپاي, قورعانۋعا كەلگەندە قامشى سالدىرمايتىن شەبەر ەكەندىگىن كورسەتتى.
جالپى, بۇل جەكپە-جەكتە 10-شى راۋندتاعى الۆەرستىڭ گولوۆكيندى ءبىر ۇرىپ, تەڭسەلتىپ جىبەرگەنىن ەسەپتەمەگەندە, سونشالىقتى جويقىن سوققىلار ءدوپ ءتيىپ, بوكسشىلار ەسەڭگىرەيتىندەي جاعداي بولعان جوق. بۇلاي بولۋى زاڭدى دا ەدى. نەگە دەسەڭىز, شارشى الاڭدا تەرەزەسى تەڭ قارسىلاستار ونەر كورسەتتى. ءبىرىن-ءبىرى ابدەن زەرتتەپ, ۇزاق ۋاقىت اڭدىسقان اككى قارسىلاستاردىڭ جەكپە-جەگىنەن باسقانى كۇتۋدىڭ ءوزى ابەستىك بولار ەدى. ەگەر دە, ەكى بوكسشى ساقتىقتى ىسىرىپ قويىپ, اشىق ايقاسقا بارعاندا – جەكپە-جەكتىڭ تاعدىرى باسقاشا شەشىلەر مە ەدى, كىم بىلەدى؟
سونىمەن, 12 راۋندقا تۇگەل سوزىلعان جەكپە-جەكتىڭ تاعدىرىن شەشەر ءسات تە كەلىپ جەتتى. ءبىرىنشى تورەشى ادالايدا بەرد 118-110 ەسەبىمەن جەڭىستى الۆارەسكە بەردى. ەكىنشى قازىنىڭ بۇيرەگى گولوۆكينگە بۇردى, ەسەپ – 115-113. ال ءۇشىنشى تورەشى بولسا, ەكى بوكسشىعا دا بىردەي ۇپاي بەرىپ (114-114), تارازىنىڭ باسىن تەڭەستىرىپ قويدى.
ارينە, بۇل شەشىمگە ساۋل الۆارەستىڭ كوڭىلى تولماعانى بايقالىپ تۇردى. ول ءوزىنىڭ باسىمدىعىنا تيتتەي دە كۇمان كەلتىرمەگەن ەدى جانە كەزەكتى «جەڭىسىن» مەكسيكاسىنىڭ ءدال سول كۇنگى ۇلتتىق مەرەكەسىنە ارناۋدى ماقسات ەتىپ شىققان ەدى شارشى الاڭعا...
جەكپە-جەكتەن كەيىن رينگتە تۇرىپ ءسوز العان گولوۆكين بىلاي دەدى: «ماعان مەكسيكالىق بوكس مانەرى ۇنايدى. دراماعا تولى شوۋ كورگىم كەلدى. بۇگىن ول كوپ بولا قويعان جوق. ارينە, شىنداپ توبەلەسكىم كەلەدى. مەن ءالى چەمپيونمىن!». وسىنى ايتقاننان كەيىن ول قازاقستاندىق جانكۇيەرلەرگە قاراتا «العا, قازاقستان!», دەپ ۇرانداتتى. الىستان ات ارىتىپ كەلگەن جەرلەستەرىنە «ۇلكەن راحمەت, جىگىتتەر!», دەپ قازاق تىلىندە العىس ايتۋدى دا ۇمىتپادى.
ال الۆارەستىڭ سوزىنەن وكىنىش تابى سەزىلىپ تۇردى. «ەشتەڭە دە سەزىنبەدىم. بۇل مەنى تاڭداندىردى. ءبىرىنشى راۋندتا مەن ونى تەكسەرىپ كوردىم, ال ودان كەيىن جەتى-سەگىز راۋندتى ءسوزسىز الدىم. قالاي جوسپارلادىق, سولاي بوكستاستىم. ارينە, قارىمتا جەكپە-جەكتى قالايمىن. ەگەر جۇرت كورگىسى كەلسە, ىستەيمىز», دەدى «كانەلو».
ء«بارىن ايت تا, ءبىرىن ايت» دەگەن, جەكپە-جەكتىڭ قورىتىندىسىنا ريزا بولماسا دا, ەكى بوكسشى رينگتەن ولجاسىز كەتپەدى. ءبىرىنشى ورتا سالماقتاعى WBO تۇجىرىمى بويىنشا الەم چەمپيونى الۆارەس 5 ميلليون دوللاردى جامباسقا باسسا, ءبىزدىڭ گولوۆكينگە 3 ميلليون دوللار بۇيىردى.
ادىلىنە جۇگىنەر بولساق, بۇل جەكپە-جەكتە الۆارەس جىلدامىراق جانە الدىلەۋ كورىنگەندەي بولدى. مۇنى جەكپە-جەك قورىتىندىسىن شىعارعان سوققىلار ستاتيستيكاسى دا قۋاتتايدى. ماسەلەن, بەدەلدى CompuBox جۇيەسىنىڭ دەرەگىنە سۇيەنەر بولساق, گولوۆكين ايقاس بارىسىندا 703 سوققى جاساعان ەكەن. سونىڭ 218-ءى دىتتەگەن جەرىنە ءتيىپتى. ال «كانەلونىڭ» سوققىسى كەم شىققان. ەسەسىنە, 505 سوققىنىڭ 169-ى گولوۆكيندى ءدال تاپقان. بۇدان بولەك, كۇش سالىپ جاساعان سوققىلار ستاتيستيكاسى دا كوپ جايتتى اڭعارتادى. ماسەلەن, گولوۆكين 342 كۇشتى سوققى جاساپ, ونىڭ 110-ىن قارسىلاسىنا دارىتا العان (32,2%). ال الۆارەستىڭ 272 جويقىن سوققىسىنىڭ 114-ءى ءدوپ تيگەن.
سونىمەن, وسىعان دەيىن 37 جەكپە-جەك وتكىزسە دە جەڭىلىستىڭ اششى ءدامىن تاتپاعان گەننادي گولوۆكين اتىنىڭ باسىن ىرىكتى. دەگەنمەن ول ءوزىنىڭ ءتورت تۇجىرىم بويىنشا (WBA, IBF, WBC جانە IBO) چەمپيوندىق اتاقتارىن ساقتاپ قالدى. مۇنىڭ ءوزى ۇلكەن ولجا: جەڭىسكە پارا-پار جەتىستىك. ال ءبىرىنشى ورتا سالماقتا نەبىر ساڭلاقتاردى قوعاداي جاپىرىپ كەلگەن ساۋل الۆارەس ءۇشىن بۇل تەڭ ءتۇسۋ كوڭىل كونشىتپەيتىندەي ناتيجە بولۋى ابدەن مۇمكىن. وسىعان دەيىن شارشى الاڭعا 51 مارتە شىعىپ, ءبىر رەت جەڭىلىپ, ءبىر جەكپە-جەكتە عانا تەڭ تۇسكەن بوكسشى تەك قانا جەڭەم دەگەن نىق سەنىممەن كىرىسكەن بۇل جولعى دوداعا. ءيا, وتىزدىڭ ورتان بەلىنەن اسقان «ارداگەر» بوكسشى مەن ناعىز دەر شاعىنداعى جامپوزدىڭ تورەشىنىڭ شەشىمىنە ارقيلى قاراۋىن ابدەن تۇسىنۋگە بولادى. بۇلار عانا ەمەس, قازىر الەمنىڭ اۋزى دۋالى ماماندارىنىڭ ءوزى قىرىق پىشاق بولىپ داۋلاسىپ جاتىر. ال پروموۋتەرلەردىڭ ءبىر بارماعى ىشتە بۇگۋلى...
ءيا, شوۋ مىندەتتى تۇردە جالعاسىن تابادى. كاسىپقوي بوكستىڭ ءيىرىمى جانكۇيەر جازعاندى تەرەڭىنە بۇرىنعىدان بەتەر تارتا ءتۇسىپ, الداعى ۋاقىتتا «قارىمتا قاشان؟» دەگىزۋمەن دەگبىرىن الار ءتۇرى بار.
قايرات ءابىلدا,
«ەگەمەن قازاقستان»
