فوتو: ايان ءابدۋالي, «ەگەمەن قازاقستان»
ءىس-شارانى جاپونيانىڭ ەلشىلىگى مەن جاپونيا قورى بىرلەسە وتىرىپ ۇيىمداستىردى. نەگىزگى ماقسات – كۇنشىعىس حالقىنىڭ مادەنيەتىن دارىپتەۋ. كورمەنىڭ اشىلۋىندا العىسوزدى جاپونيانىڭ قازاقستانداعى توتەنشە جانە وكىلەتتى ەلشىسى يتيرو كاۆاباتا الدى.
– بۇل جىلجىمالى كورمە العاش رەت 2003 جىلى باستاۋ العان. سودان ون جىل ىشىندە, ياعني 2013 جىلعا دەيىن الەمنىڭ تۇكپىر-تۇكپىرىندە ۇيىمداستىرىلىپ كەلدى. ءاربىر ەلدىڭ حالقى ەرەكشە قىزىعۋشىلىقتارىن ءبىلدىرىپ, جىلى-جىلى لەبىزدەرىن ءبىلدىرىپ جاتتى. ارادا ءبىر جىل ۇزىلىستەن كەيىن 2014 جىلى قايتا قولعا الدىق. سول جىلى امەريكادان باستاپ, ازيا ەلدەرىن ارالادىق. مىنە, ەندى جولىمىز قازاقستانعا دا ءتۇستى, – دەدى يتيرو كاۆاباتا.
سونىمەن قاتار, ول ەكسپو كورمەسى جايلى ايتا كەتۋدى ۇمىتپادى. جاھاندىق كورمەدە جاپونيا پاۆيلونىن كوپتەگەن قازاقستاندىقتاردىڭ ارالاعانىن ايتتى. وسىنداي حالىقارالىق ءىس-شارالاردىڭ ارقاسىندا قازاقستان مەن جاپونيا قارىم-قاتىناسى بۇرىنعىسىنان دا نىعايا تۇسەتىنىن مالىمدەدى. بۇدان بولەك, ول قوس مەملەكەت اراسىنداعى ديپلوماتيالىق بايلانىستىڭ ورناعانىنا دا شيرەك عاسىر تولعانىن ەسكە سالىپ ءوتتى.
كورمەنىڭ اشىلۋىندا ءسوز العان ۇلتتىق مۋزەي ديرەكتورىنىڭ ورىنباسارى مارال بالتىشەۆ جاپون ەلىنىڭ دامىعان مەملەكەتتەردىڭ ءبىرى ەكەنىن ايتا كەلىپ, مادەنيەتىنە دە قىسقاشا توقتالىپ ءوتتى.
كورمەگە كەلگەن ءاربىر جان كۇندەلىكتى ومىردە قولداناتىن تۇرمىستىق زاتتاردى, سونداي-اق ينتەرەر بۇيىمداردى كورە الادى. قىزىعى سول, ەكسپوناتتاردىڭ 90-عا جۋىعى 2010 جىلدان كەيىن جاسالسا, تاعى 11 زات حالىقتىڭ سوعىستان كەيىن تۇتىنعان بۇيىمدارى.
كورمەگە كەلگەن ءاربىر ادام فوتواپپارات, پلانشەت سەكىلدى قۇرىلعىلاردىڭ بىرنەشە ءتۇرىن كورە الادى.
بۇدان بولەك, كاسىبي شاباندوزدار مەن بۇلدىرشىندەرگە ارنالعان ۆەلوسيپەد تە بار.
سۋ وتكىزبەيتىن ماتالار, بىرنەشە قالتاسى بار كۇرتەشە, بالالاردىڭ ساناسىن جەتىلدىرۋگە ارنالعان ەرەكشە كۋبيكتەر دە بۇل كورمەدەن قالىس قالمادى.
ايان ءابدۋالي,
«ەگەمەن قازاقستان»
