سۇلتانماحمۇت ۇلت ءۇشىن كۇرەسكەن اقىن, ولەڭدەرى جالىندى, رۋحتى. جىل تاڭداۋى-سۇلتانماحمۇت شىعارماشىلىعىنا تۇسكەنى-كوپتەن كۇتىپ جۇرگەن ماقسات ەدى. جىل سايىن وبلىس ورتالىعىندا اقىننىڭ ومىرىمەن شىعارماشىلىعىنا ارنالعان عىلىمي-تاجىريبەلىك كونفەرەنتسيا ءوتىپ تۇرادى.
جەرلەستەرىن دە, سۇلتانماحمۇتتى زەرتتەۋشى عالىمداردى اقىننىڭ ولەڭدەرىنىڭ ۇلتقا, قازاققا دەگەن ەرەكشە لەبى, رۋحى تارتتى. نەگىزگى باستاۋى ەلىمىز تاۋەلسىزدىك العان ەلەڭ-الاڭ شاقتا, 1992 جىلى العاش رەت اقىننىڭ تۋعانىنا 100 جىل تولۋىنا ارنالىپ وتكەن-ءدى. ودان كەيىنگى جولدى «تورايعىروۆ وقۋلارىن» ءداستۇرلى وتكىزۋ باستاماسىن سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەت ءوز قولىنا الدى.
-سۇلتانماحمۇتتىڭ شىعارماشىلىعىن وقىپ تانىسۋ كەزىندە ء«بىر ەل-ءبىر كىتاپ» شاراسىنىڭ قاجەتتىلىگىن تۇسىندىك. شىعارمالارىنىڭ دەنى ليريكا, الەۋمەتتىك ماسەلەلەردى قولداعان ساياسي ليريكا. الاش تانۋعا ۇلەس قوستى. ءاربىر جاس, ءاربىر ستۋدەنت اقىن شىعارمالارىن وقىپ, تانىسقاندارى وزدەرى ءۇشىن, رۋحاني ويانۋلارىنا سەبەپكەر دەپ ويلايمىن,- دەيدى ۇلجان سابىرحان.
كەزىندە جۇسىپبەك ايماۋىتوۆ تورايعىروۆتىڭ مۇراسىن جيناپ, اقىننىڭ عىلىمي ءومىربايانىن جىكتەپ جازىپ كەتىپتى. ايماۋىتوۆتىڭ بۇل ءتالىمى بۇگىن دە ماڭىزدى.
-سۇلتانماحمۇت 27 جاس قىسقا ءومىر ءسۇرىپ, سوڭىنا مازمۇنى رۋحتى مول شىعارماشىلىق مۇرا قالدىردى. اقىننىڭ پوەزياسىندا ەركىندىكتىڭ دابىلى ەستىلەدى. ولەڭمەن جانە پروزامەن جازىلعان روماندار, فيلوسوفيالىق جانە الەۋمەتتىك پوەمالار, وچەركتەر جازدى. شىعارماشىلىعى ەركىن قوعام, قازاقتىڭ ەركىندىگى تۋرالى ارمانعا تولى, ەلگە, جەرگە دەگەن ۇلى سەزىمنەن تۇرادى,-دەيدى ستۋدەنت ءمادينا تىلەۋباەۆا.
ءيا, سۇلتانماحمۇتتىڭ ەلدىك, ەگەمەندىكتى اڭساعان قۇبىلىسى بولەك شىعارماشىلىق مۇراسىن ادەبيەتشىلەردىڭ, زەرتتەۋشىلەردىڭ حالقىنا جەتكىزگەنشە اسىعاتىندارىنىڭ باستى ماقساتى دا- الاش يدەياسىنىڭ جاڭعىرىپ, جالعاسىپ ۇرپاعىنا جەتكىزۋ ەكەنىن تۇسىندىك.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن:
رۋفينا تورپيششەۆا
