بۇل شارتقا ەلباسى ن.نازارباەۆتىڭ 2016 جىلعى تامىزدا سەربياعا بارعان رەسمي ساپارىندا ەكى مەملەكەتتىڭ باسشىلارى قول قويعان بولاتىن. ەۋروپا ەلدەرىمەن وسىنداي ەكىجاقتى شارتتار جاساۋ وتە ماڭىزدى. ويتكەنى ءبىز ءالى ەۋروپالىق كەڭەستىڭ كونۆەنتسياسىنا قوسىلعان جوقپىز. ال ەندى مىناداي ەكىجاقتى شارتتار ارقىلى ءبىز ەۋروپا قۇرلىعىن قامتىپ, ناتيجەسىندە اتالعان كونۆەنتسياعا قوسىلۋعا مۇمكىندىك الامىز.
قازىر قازاقستان مەن سەربيا اراسىندا ەرەكشە دوستىق قارىم-قاتىناستار ورناپ كەلەدى. سەربيا قازاقستاننىڭ بارلىق الەمدىك باستامالارىن قولداپ وتىر. ەكسپو حالىقارالىق كورمەسىنە دە بەلسەندى تۇردە قاتىستى. ەكونوميكا سالاسىنداعى ەكىجاقتى ىنتىماقتاستىق تا نىعايىپ كەلەدى. بۇگىنگى تاڭدا قازاقستاننىڭ قۇرىلىس جانە ساۋدا سالاسىندا سەربيانىڭ 24 كومپانياسى جۇمىس ىستەيدى. سونداي-اق قازاقستاندىق كاسىپكەرلەر دە سەربيا ەكونوميكاسىنا ينۆەستيتسيا قۇيۋدا. كوشى-قوننىڭ بەلسەندىلىگىنە ەكى ەل اراسىنداعى ۆيزاسىز ءتارتىپ وڭ ىقپالدى اسەر جاساپ وتىر.
قازىرگى زاماندا قۇقىق بۇزۋشىلىق بارلىق ەلدەردىڭ دامۋىندا ەكونوميكالىق كەدەرگىلەردىڭ ءبىرى بولىپ تابىلادى. كەز كەلگەن ەل حالىقارالىق ىنتىماقتاستىق جاساماي بۇل ىستە ناتيجەلى كۇرەس جۇرگىزە المايدى. تەك قانا مەملەكەتتەردىڭ بىرلەسكەن كۇش-جىگەرىمەن ترانسۇلتتىق قىلمىستارعا قارسى ءتيىمدى كۇرەس جۇرگىزۋگە بولادى. قىلمىسقا قارسى كۇرەس تۋرالى زاڭنامانى جەتىلدىرۋ دە ءوزارا بىرلەسكەن ءىس-قيمىلداردى تالاپ ەتەدى. ءبىر سوزبەن ايتقاندا, بارلىق ەكونوميكالىق جانە مادەني بايلانىستاردى كەڭەيتۋدە دە وسى زاڭ جوباسىن قابىلداۋ وزەكتىلىگىن كورسەتىپ وتىر.
قارالعان زاڭ جوباسى قازاقستان رەسپۋبليكاسى مەن سەربيا رەسپۋبليكاسى اراسىنداعى قىلمىستىق ىستەر بويىنشا قۇقىقتىق كومەك كورسەتۋگە تىكەلەي باعىتتالعان. زاڭ جوباسى وسى ماسەلەنى رەتتەيدى. مۇندا حالىقارالىق تاجىريبەنى ەسكەرە وتىرىپ, كورسەتىلگەن كومەكتىڭ ناقتى نىساندارى مەن قىلمىستىڭ تۇرلەرىنە قاراي ىنتىماقتاستىقتىڭ قالىپتاسقان ءراسىمى كوزدەلگەن. وسى شارالار مەملەكەتتىڭ قىلمىسقا قارسى كۇرەسىن جەتىلدىرە ءتۇسىپ, تۇتاستاي العاندا قىلمىستى ازايتۋعا جانە ونىڭ الدىن الۋ شارالارىن قامتاماسىز ەتۋگە مۇمكىندىك بەرەدى دەپ ويلايمىن.
قابيبوللا جاقىپوۆ,
ءماجىلىس دەپۋتاتى
