قازىرگى تاڭدا تاربيەلىك جۇمىستىڭ مودەلدىك جوسپارىن جۇزەگە اسىرۋ ءۇشىن قۇرىلعان 495 كلۋبتا مەكتەپتەگى سىبايلاس جەمقورلىققا قارسى مادەنيەتتى قالىپتاستىرۋ جايى كەڭىنەن تالقىلانۋدا. ونى جۇزەگە اسىرۋ ءۇشىن كلۋبتاردىڭ جەتەكشىلەرى تاعايىندالىپ, الداعى اتقاراتىن جۇمىستىڭ جوسپارى دا بەكىتىلگەن.
سىنىپ جەتەكشىلەرى 1-4 سىنىپ وقۋشىلارىمەن بىرلەسىپ, جىل بويى ار, نامىس, جاۋاپكەرشىلىك, قادىر-قاسيەت, مەيىرىمدىلىك, قايىرىمدىلىق, ادىلدىك جانە ادالدىق قاسيەتتەرىن ناسيحاتتايتىن تەاترلاندىرىلعان قويىلىمدار قوياتىن بولادى. بۇل قويىلىمداردى ۇيىمداستىرۋداعى باستى ماقسات – بالالاردى قايىرىمدى ءارى جاۋاپكەرشىلىكتى بولۋعا ۇيرەتۋ, سونداي-اق, ادىلدىكپەن ادالدىق ءار ادامنىڭ ىشكى جان دۇنيەسىندە بولاتىندىعىن بالا ساناسىنا ءسىڭىرۋ. كلۋبتار تاراپىنان 5-8 سىنىپ وقۋشىلارى اراسىندا «مەملەكەتتىك قىزمەت – ەلدىڭ مۇددەسىنە ادال ەڭبەك» ەسسەسى بويىنشا سايىستار وتكىزىلەدى. بۇل سايىستى وتكىزۋدەگى باستى ماقسات وسكەلەڭ ۇرپاقتىڭ بويىندا كۇندەلىكتى ءاربىر ازاماتتىڭ قاجەتتىلىكتەرى مەن مۇددەلەرىنە ادال قىزمەت جاساۋ, ەلدىڭ دامۋ باسىمدىقتارى مەن ماقساتتارىن جۇزەگە اسىراتىن ماڭىزدى ينستيتۋت رەتىندەگى مەملەكەتتىك قىزمەتكە دەگەن تۇسىنىكتى قالىپتاستىرۋ.
بۇدان باسقا, اقمولا وبلىسىنىڭ ءبىلىم بەرۋ باسقارماسى سايتىنىڭ «سىبايلاس جەمقورلىقتىڭ الدىن الۋ» بولىمىنەن قازىرگى قولدانىستاعى زاڭنامالارمەن, بەكىتىلگەن جوسپارلارمەن, اتقارىلعان جۇمىستارمەن جانە سىبايلاستىقتىڭ الدىن الۋعا قاتىستى اقپاراتتارمەن تانىسۋعا بولاتىندىعىن اتاپ وتكەنىمىز ورىندى.
اسقار تۇراپباي ۇلى,
«ەگەمەن قازاقستان»
اقمولا وبلىسى
