وبلىستىق مۋزەيدىڭ عىلىمي-ەكسپوزيتسيالىق جۇمىس جانە قوردى ەسەپكە الۋ ءبولىمى مەڭگەرۋشىسىنىڭ مىندەتىن اتقارۋشى ءمولدىر قىزداربەكوۆانىڭ ايتۋىنشا, نەگىزىنەن بۇل اشەكەيلەردى مۋزەيگە جەرگىلىكتى حالىق تاپسىرعان ەكەن. ماسەلەن, 1970 جىلى تاراز قالاسىنىڭ تۇرعىنى وتكىزگەن كۇمىس بىلەزىكتىڭ ءتىلىمى جالپاق, دوڭگەلەك ۇشتارى قوسىلماعان. ونىڭ ورتا تۇسى وسىمدىك-زوومورفتىق ورنەكتەرمەن اۋىسىپ وتىراتىن تومپاقشا كەلگەن ءۇش جارتى سفەرالىق فيگۋرالارمەن اشەكەيلەنگەن. بىلەزىكتىڭ شەتتەرى سىزىقتارمەن ساندەلىپ جاسالعان. سونداي-اق 1979 جىلى تاراز قالاسىنىڭ تۇرعىنى اناسىنان قالعان كۇمىس قوس بىلەزىكتى وبلىستىق مۋزەيگە سىيعا تارتىپتى. بۇل بىلەزىكتىڭ ەرەكشەلىگى – جالپاق, كولەمدى ەتىپ جاسالعان. مۋزەيدەگى ەڭ قۇندى ءارى سالماعى اۋىر بىلەزىكتەردىڭ بىرىنەن سانالاتىن بۇل اشەكەيدە زەرگەر قازاقتىڭ ويۋ-ورنەكتەرىن, جالپى رۋحاني بايلىعىن كورسەتە بىلگەن. شەتتەرىن يرەكتەۋ, ءۇشبۇرىشتى فيگۋرالار سالۋ جانە شيراتۋ, ءورۋ تەحنيكاسىمەن ءارتۇرلى ورنەكتەر سالىنعان. وكىنىشكە قاراي, مۇنى جاساعان زەرگەردىڭ اتى-ءجونى بەلگىسىز بولىپ وتىر. ال 1989 جىلى تاراز قالاسىنىڭ تۇرعىنى اجەسىنەن قالعان XIX-XX عاسىرلارعا جاتاتىن كوزدى بىلەزىكتى دە وسى جەرگە تابىستاعان ەكەن. بۇل اشەكەيگە جۇمىر نەمەسە جالپاق كۇمىستەن بەتىنە بەدەرلى ورنەكتەر جاساپ, التى قىزىل ءتۇستى اسىل تاس كوزدەرى ورناتىلعان.
مۋزەي قورىن تولىقتىرۋ ماقساتىندا, 2005 جىلى ارنايى مۋزەي قىزمەتكەرلەرىنەن جاساقتالعان ەكسپەديتسيا توبىنا ب.مومىش ۇلى اۋىلىنىڭ تۇرعىنى قوس كۇمىس بىلەزىكتى سىيعا تارتىپتى. قوس بىلەزىك قولعا تاعۋعا ارنالىپ جاسالعاندىقتان, جارتىلاي دوڭگەلەك بولىپ كەلەدى. بىلەزىكتىڭ ەكى جاعى سەگىز سانىمەن كولدەنەڭىنەن بەدەرلەنگەن.
حاميت ەسامان,
«ەگەمەن قازاقستان»
جامبىل وبلىسى
