ەسىلدىڭ جاعاسىن ەرەن جىرعا بولەپ جاتقان ايتۋلى ايتىسقا قازاق ايتىسىندا العاشقى بولىپ شوۋ جاساعان اقىنداردىڭ ءبىرى موڭعوليادان كەلگەن قابدىجالەل ساحاريا, ايتىستىڭ باياعى جۇيرىك, المامويىن اقسۇڭارى اينۇر تۇرسىنباەۆا جانە ءاردايىم ويلى ءسوزى وندىققا ءدوپ ءتيىپ, تىڭدارمانىن تامساندىرۋدان تانباي كەلە جاتقان ايتىستىڭ كوزمەرگەنى جانداربەك بۇلعاقوۆ باستاعاعان ارزىگۇل قايىمبەكقىزى, ءمولدىر ايتباي, اسەت دۇيسەباي, تالعات مىقي, مۇرادىم ميرلانوۆ, سىرىم اۋەزحان, ىڭكاربەك ءادىلحان, ەسىمجان ناقتىباي ۇلى, قۋانىش نۇرجانوۆ, فارحات مارات ۇلى, قۋاندىق كەنجەبەك ۇلى, نۇرلان بەكتىباەۆ, مۇحامەدجان مانسۇروۆ سىندى كىل كوكمويناق جاس پەرىلەر قاتىسىپ جاتىر.
قر مəدەنيەت جəنە سپورت مينيسترلىگى, «نۇر وتان» پارتياسى استانا قالالىق فيليالى, حالىقارالىق «جاس-اي» مەديتسينالىق ورتالىعى ۇيىمداستىرعان ءسوز دوداسىنا بەلگىلى ابايتانۋشى, ۇلتتىق عىلىم اكادەمياسىنىڭ اكادەميگى عاريفوللا ەسىم, "ارداگەرلەر ۇيىمى" توراعاسى, قوعام قايراتكەر ومىرزاق وزعانباي, قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى توراعاسىنىڭ ورىنباسارى عالىمجان مەلدەش, قر مادەنيەت قايراتكەرى ورازگۇل اسانعازى (توراعاسى), اقىن دۇكەن ءماسىمحان ۇلى, حالىق اقىنى قونىسباي ءابىلوۆ جانە ايتىستىڭ قازانىندا قايناپ وسكەن بالعىنبەك يماشەۆتار قازىلىق ەتۋدە.
استانا جۇرتىن سۇبەلى سوزگە قارق قىلىپ جاتقان ايتۋلى ايتىستى حالىقارالىق, رەسپۋبليكالىق ايتىستاردىڭ جەڭىمپازى, بەلگىلى ايتىس اقىنى سەرىك قۇسانباەۆ جۇرگىزىپ وتىر.
قازىر ءۇشىنشى جۇپتا اينۇر تۇرسىنباەۆا مەن سىرىم اۋەزحان ايتىسىپ جاتىر.
ۇلاربەك نۇرعالىم ۇلى,
«ەگەمەن قازاقستان»
